भांगरभूंय | प्रतिनिधी
9985 चौमि जमीन संपादनाचो आदेश जारी
सुनावणी उपरांत 16 हरकती भायरायल्यो
कोळशा खातीर दोट्टीकरण : आरोप
पणजी : दक्षीण अस्तंत रेल्वे खाला कुळें ते वास्को मेरेनच्या रेल्वे मार्गाचें दोट्टीकरण करपा खातीर जमीन संपादीत करपाचो आदेश (अॅवार्ड) मुरगांवच्या उपजिल्होधिकाऱ्यांनी जारी केला. कोळशाचे येरादारी खातीर रेल्वे दोट्टीकरण करपाचे यत्न आशिल्ल्याचो आरोप रेनबो वॉरियर्स तशेंच कार्यकर्त्यांनी केला. दोट्टीकरणाक विरोध कायम आशिल्ल्यान परतून हें प्रकरण पेटपाची शक्यताय आसा.
कुळें ते वास्को मेरेनच्या दोट्टीकरणा खातीर 9985 चौखण मिटर (0.9985) जमीन संपादीत करपाची अधिसुचोवणी जारी जाल्या. सां जुजे दी आरीयल, गिर्दोळी, चांदोर, व्होडार, शेळवण, कुडचडें, काकोडें, सांवड्डें आनी वेळसांव ह्या गांवांतल्या जमनीचें संपादन जातलें. रेल्वे कायदो 1989च्या कलम 20 ए (1) खाला ही जमीन संपादीत जातली. हॉस्पेट – हुबळी – तिनईघाट – वास्को ह्या रेल्वे मार्गाचें दोट्टीकरण करपाचो हो प्रकल्प आसा. ह्या प्रकल्पा खाला कुळें ते वास्को रेल्वे मार्गाचें दोट्टीकरण जातलें. मुरगांवचे उपजिल्होधिकारी जमीन संपादनाचो वावर पुराय करतले.
दोट्टीकरणाक लोकांचो विरोध कायम
रेल्वे दोट्टीकरण प्रकल्पा आड हाचें पयलीं खर आंदोलन जाल्लें. सर्वोच्च न्यायालयाचे समितीन (सीईसी) रेल्वे दोट्टीकरण प्रकल्प आवश्यक ना असो अहवाल दिल्लो. तरी लेगीत आतां रेल्वे दोट्टीकरणा खातीर भूंय संपादनाचो आदेश जारी केला.
कोळशाचे येरादारी खातीर हुकुमशाय : रापणकारांचो एकवोट
लोकांच्यो हरकती तशेंच पर्यावरणाचो विचार करिनासतना सरकारान रेल्वे दोट्टीकरणा खातीर जमीन संपादनाचो आदेश जारी केला. हो निर्णय हुकुमशाये सारखो आसा अशें गोंयच्या रापणकारांचो एकवोटचे सरचिटणीस आेलेंसियो सिमोयश हांणी म्हणलां. लोकशायेच्या मार्गान आंदोलन सुरूच उरतलें. हेर कार्यकर्त्यां कडेन चर्चा करून आंदोलनाची दिशा थारतली अशें तांणी म्हणलें.
रेल्वे म्हामंडळ पर्यावरणाची मार्गदर्शक तत्वां तशेंच नेमांचें उल्लंघन करता. संबंदीत यंत्रणे कडल्यान मान्यताय घेनासताना रेल्वेचे प्रकल्प उबारता. रेल्वे आड राज्य सरकाराची खंयचीच यंत्रणा हरकत उपस्थीत करिना. हो सगलो खटाटोप अदानी, जिंदाल हांकां लागपी कोळशाचे येरादारी खातीर आसा. लोकांच्या हिता परस भांडवलदारांच्या हिताक मोदी सरकार प्राधान्य दिता, हें हातूंतल्यान सिद्ध जाता अशें ओलेंसियो सिमोयश हांणी सांगलें.
भांडवलदारांच्या हिताचोच विचार : रेनबो वॉरियर्स
केंद्रांतल्या सरकाराक अदानी, जिंदाल हांचे हीत सामान्य लोकां परस चड म्हत्वाचें आसा हें हाचें वेल्यान सिद्ध जाता. रेल्वे दोट्टीकरणाक लागून पर्यावरणाचें लुकसाण जातलें. रेल्वे दोट्टीकरण प्रकल्पाची आवश्यकता ना असो अहवाल सर्वोच्च न्यायालयाचे समितीन दिल्लो. तरी लेगीत रेल्वे दोट्टीकरणा खातीर जमीन संपादीत करपाचो निर्णय हो हुकुमशायेचो निर्णय आसा अशें रेनबो वॉरियर्सचे अभिजीत प्रभुदेसाय हांणी म्हणलें.
केंद्र तशेंच राज्य सरकार अदानी, जिंदाल हांचे गुलाम आसात. पर्यावरण वाटावपाची जापसालदारकी दरेका नागरिकाची आसा. रेल्वे दोट्टीकरणा आड लोकांनी परतून रस्त्यार देंवपाची गरज आसा. भांडवलदारां खातीर गांव तशेंच पर्यावरणाचो नाश करप परवडपा सारके ना.
16 हरकती भायरायल्यो
जमीन संपादनाची अधिसुचोवणी जारी करून सरकारान हरकती मागयिल्ल्यो. जमीन संपादनाक 26 जाणांनी हरकती सादर केल्यात. हरकतींची छाननी करून 10 हरकती सुनावणी पयलींच भायरायल्यो. प्रदुशण हें एकूच कारण हरकती फाटल्यान आशिल्लें. हे खातीर छाननी वेळार 10 हरकती भायरायल्यो. सुनावणी उपरांत हेर 16 जाणांच्यो हरकती भायरायल्यो.
सदानंद बोरकार (वेळसांव), ज्योकीम डिसोझा (वेळसांव), एलेतेरिया पेरीस (वेळसांव), फ्रान्सीस रॉड्रिगीश (इसोर्शी), रोमानो रॉड्रिगीश (इसोर्शी), लुएल फर्नांडीस, चिको फर्नांडीस (चांदोर), गोविंद कामत माड (कुडचडें, काकोडें), डेल्फिना फर्नांडीस (गिर्दोळी), एजिडियो डिकोस्टा (गिर्दोळी), जुआंव फर्नांडीस (गिर्दोळी), अलेक्स डिकोस्टा (गिर्दोळी), पेद्रो डिकोस्टा (गिर्दोळी), फॅब्रिकेड इग्रेजा (गिर्दोळी), जिजस चर्च ऑफ गिर्दोळी, चर्च प्रॉपर्टी ऑफ गिर्दोळी हांच्यो हरकती सुनावणी उपरांत भायरायल्यो.
3490 चौमि जमीन संपादनांतल्यान भायर
रेल्वे दोट्टीकरणा खातीर वट्ट 1.9211 हॅक्टर (19211 चौमि) जमीन संपादीत करपाची आशिल्ली. ते विशींची अधिसुचोवणी जारी जाल्ली. उपरांत 0.3490 हॅक्टर (3490 चौमि) जमीन दोट्टीकरणाक गरज नाशिल्ल्यान ही जमीन संपादन प्रक्रियेंतल्यान भायर काडल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
