भांगरभूंय | प्रतिनिधी
मडगांव, प्रतिनिधी ः रुमडामळ पंचायत मैदानाचेर शेनवारा एका शाळेच्या वर्सुकी खेळां दिसाचे उक्तावण करतना नायट्रोजन वायून भरिल्ल्या बलुनाक उजो लागलो. ह्या वेळार उक्तावणाक हाजीर आशिल्ली पुलीस अधीक्षक (ट्रेनिंग) सुचेता देसाय जखमी जाली. उपचारा खातीर तांकां हॉस्पिटलांत व्हेले. उपचारा करुन तांकां डिस्चार्ज दिलो.
मेळिल्ले म्हायती प्रमाण, रुमडामळ अंजुमन इस्लाहुल मुसलमान शाळेचो वर्सुकी खेळां दीस 30 तारखेक मनयताले. हे कार्यावळीक मुखेल सोयरी म्हूण पुलीस महानिरीक्षक ओमवीर सिंग बिश्नोई हाजीर रावपाचे आशिल्ले. पूण, कांय कारणांक लागून तांका ह्या कार्यावळीक हाजीर रावंक मेळ्ळें ना. कार्यावळीक मुखेल सोयरी म्हूण पुलीस अधीक्षक (ट्रेनिंग सेल) सुचेता देसाय हाजीर आशिल्ली.
कार्यावळीच्या उक्तावण सुवाळ्यांत खेळां मशाल पेटयली. ते उपरांत मळबांत बलुन सोडून खेळां दीस सुरू करपाचो आशिल्लो. पुलीस अधीक्षक सुचेता देसाय आनी हेर मानेस्त माचयेर हाजीर आशिल्ले तेन्ना बलुनाक उजो लागपाची घडणूक घडली. ते वेळार नायट्रोजन वायून भरिल्ल्या बलुनाचो स्फोट जावन व्हड उजो पेटलो. हातूंत पुलीस अधीक्षक सुचेता देसाय हांच्या तोंडाक आनी तकलेक दुखापत जाली. हाचे भायर माचयेर हाजीर आशिल्ले हेर मानेस्तूय जखमी जाल्यात. हाचे उपरांत पुलीस अधीक्षकाक रोखडेच खाजगी हॉस्पिटलांत व्हेले. प्राथमिक उपचारा उपरांत तांकां डिस्चार्ज दिलो. खेळां दिसाच्या आयोजकांक संपर्क केलो तेन्ना अशी घडणूक घडल्या. पूण व्हडली दुर्घटना जावंक ना अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
