राहूल गांधी कायद्या परस व्हड न्हय: भाजप

भांगरभूंय | प्रतिनिधी

काँग्रेस न्यायालयाच्या आदेशा आड निदर्शनां करता

काँग्रेसीन न्यायपालिकेचो मान राखचो

पणजी : सुरत न्यालायलान राहूल गांधीक दोशी थारावन दोन वर्सांची ख्यास्त दिले उपरांत लोकप्रतिनिधी कायद्याच्या कलम 8 खाला तांकां लोकसभेन अपात्र घोशीत केला. राहूल गांधी कायद्या परस व्हड न्हय. तांकां अपात्र थारायले उपरांत काँग्रेस जीं निदर्शनां करता तीं न्यायालयाच्या आदेशा आड आसात, अशें भारतीय जनता पक्षाच्या गोंय फांट्यान म्हणलां.

भाजपाचे म्हणयारे अॅड. यतीश नायक हांणी शुक्रारा सांजे भाजप कचेरेंत पत्रकार परिशद घेतली. ह्या वेळार तांणी राहूल गांधींक अपात्र करपाचे घडणुकेचें समर्थन केलें.

राहूल गांधी हांणी कर्नाटकांतल्या कोलार वाठारांतले प्रचार सभेंत सगल्या चोरांचें आडनांव मोदीच कित्याक? अशें उलाेवप केल्लें. हाचेर आक्षेप घेवन गुजरातचे भाजपाचे आमदार पूर्णेश मोदी हांणी बदनामीचो खटलो राहूल गांधी आड दाखल केल्लो. 2019 वर्सा हो खटलो दाखल जाल्लो. खटल्याची सुनावणी जावन सुरत न्यायालयान राहूल गांधीक दोशी थारावन दोन वर्सांची ख्यास्त सुनायली. कायद्या प्रमाण न्यायालयान दोशी थारावन दोन वर्सां परस चड तेप ख्यास्त सुनायत जाल्यार लोकप्रतिनिधी म्हूण संबंदीत व्यक्ती अपात्र थारता. न्यायालयाच्या आदेशा उपरांत लोकसभेन राहूल गांधीक अपात्र थारावपाची प्रक्रिया कायद्या प्रमाण आसा. कायदो सगल्यांक सारखो आसता. कायद्या परस व्हड खंयचीच व्यक्ती नासता. हाका लागून राहूल गांधी खासदार म्हूण अपात्र जावपाची प्रक्रिया ही न्यायाक धरून आसा. खासदार म्हूण अपात्रतायेची कारवाय राहूल गांधी हांणी आपूण जावन ओडून घेतल्या, असो आरोप अॅड. यतीश नायक हांणी केलाे.

काँग्रेसीन न्यायपालिका, कायद्याचो मान राखचो

राहूल गांधीक खासदार म्हूण अपात्र थारायले उपरांत काँग्रेस निदर्शनां करता. काँग्रेसीचे फुडारी न्यायपालिकेच्या विरोधांत उलयतातत. काँग्रेसीन कायदो तशेंच न्यायपालिकेचो मान राखपाची गरज आसा. काँग्रेस फुडारी राहूल गांधी कायद्या परस व्हड आसूंक शकना अशें अॅड. यतीश नायक हांणी सांगलें.

बदनामीचो खटलो 2019 वर्सा सुरू जाल्लो. चार वर्सां उपरांत सुनावणी पुराय जावन आदेश जारी जालो. दोनूय वटानची बाजू आयकून आनी पुराव्यांचो विचार करून हो निवाडो दिला. निवाडो घाईगडबडींत दिला अशें म्हणपाक वाव ना अशें अॅड. यतीश नायक हांणी सांगलें.