रस्त्याच्या जमनी खातीर धनयाच्या मान्यतायेची गरज पडची नाः काब्राल

भांगरभूंय | प्रतिनिधी

गोंय म्हामार्ग कायद्यांत जातली दुरुस्ती

पणजी : राज्य म्हामार्ग तशेंच जिल्हो रस्त्या खातीर जमीन संपादन करपाच्या मार्गांतल्यो आडखळी पयस करपा खातीर गोंय म्हामार्ग कायदो 1974 मदीं दुरुस्ती करपाचो प्रस्ताव आसा. रस्त्याच्या जमनी खातीर धनयाची मान्यताय घेवपाचे बंधन दुरुस्ती उपरांत आसचें ना. भौशीक बांदकाम खात्याचे मंत्री निलेश काब्राल हांणी ही म्हायती दिली.

राष्ट्रीय म्हामार्ग कायद्या खाला गोंय म्हामार्ग कायदो 1974 अस्तित्वांत आयला. नवे रस्ते उबारपा खातीर तशेंच रस्ते दुरुस्त करपा खातीर जमीन संपादीत करपाची गरज आसता. जमीन संपादन कायदो 2013 आयले उपरांत जमीन संपादन करपाची प्रक्रिया खर जाल्या. धनयाचे मान्यताये बगर जमीन संपादीत करपाक मेळना. धनयान मान्यताय दिले उपरांत जमीन संपादन करपाची प्रक्रिया करची पडटा. गोंय म्हामार्ग कायद्यांत दुरुस्ती करपाचो प्रस्ताव आसा. जमीन संपादन करपा खातीर धनयाच्या मान्यतायेची गरज पडची ना. गरजे प्रमाण रस्त्या खातीर जमीन संपादीत करप शक्य जातलें. बाजारांतल्या दरा प्रमाण धनयाक जमनीचें मोल वा लुकसाण भरपाय मेळटली अशें काब्राल हांणी सांगलें.

गोंयांतले खूबशे रस्ते रुंद करपाची गरज आसा. कांय रस्ते दुरुस्त करपाची गरज आसा. रस्त्या खातीर जमनीची गरज लक्षांत घेवन म्हामार्ग दुरुस्ती विधेयक विधानसभेंत येतलें. भौशीक बांदकाम खात्याचे मंत्री निलेश काब्राल हांणी ही म्हायती दिली.

गोंयांत राष्ट्रीय म्हामार्गा सयत हेर रस्त्यांची कामां नेटान सुरू आसात. दिसान दीस वाहनांचो आंकडो वाडत आसा. वाहनांचो आंकडो वाडटा तसो अपघातांचो आंकडे वाडत आसा. अपघातांचेर नियंत्रण दवरपा खातीर सरकारान तरेकवार उपाय येवजण्यो सुरू केल्यात. रस्ते दुरुस्त करपा सयत गतिरोधक तशेंच सिग्नल यंत्रणा बसोवपाची प्रक्रिया सुरू जाल्या. म्हामार्गा सयत शारांतल्या भितरल्या रस्त्यांचेर लेगीत अपघात जातात. हाका लागून रस्त्यांचें रुंदीकरण तशेंच दुरुस्तीचीं कामां व्हड प्रमाणांत जातलीं अशें काब्राल हांणी म्हणलें.

सध्या रस्त्या खातीर जमीन दिवपाची कोणाचीच तयारी ना. हाका लागून आडखळ निर्माण जाल्या. बरेच सुवातींचेर अशीर रस्ते आसात. कायद्यांत दुरुस्ती केले उपरांत रस्त्यां खातीर जमीन संपादन करप सोंपें जातलें. जमनीच्या धनयाचेर अन्याय जावचो ना, हाची तजवीज आसतली. बाजारांतल्या दरा प्रमाण जाग्याचो दर मेळटलो. कायदो दुरुस्तीच्या प्रस्तावाक भौशीक बांदकाम खात्याच्या मंत्र्यांनी मान्यताय दिल्या.