भांगरभूंय | प्रतिनिधी
पणजी : मॉन्सून अजून मेरेन केरळांत पावूंक नाशिल्ल्यान गोंयांत तो आनीक चार दीस तरी पावपाची शक्यताय ना. उण्या दाबाच्या पट्ट्याक लागून आयज सावन पावसाक सुरवात जातली, असो हवामान खात्याचो अदमास आसा.
मॉन्सून केरळांत 4 जून मेरेन पावून तो 7 जून मेरेन गोंयांत पावतलो असो हवामान खात्याचो पयलींचो अदमास आशिल्लो. 4 तारीख जावन गेली, तरी मॉन्सून केरळांत पावूंक ना. मॉन्सूना खातीर पुरक स्थिती आसा. हाका लागून मंगळार मेरेन तो केरळांत पावतलो असो हवामान खात्याचो अदमास आसा.
इशान्ये कडल्या अरबी दर्यांत सोमारा उण्या दाबाचो पट्टो निर्माण जावपाची शक्यताय आसा. उण्या दाबाच्या पट्ट्याक लागून फुडले तीन दीस राज्यांत पावस पडटलो. वराक 30 ते 40 किलोमिटर मदीं वारें व्हांवतलें. गडगड तशेंच जोगलांच्या कडकड्यान पावस कोसळटलो असो अदमास आसा.
मॉन्सून पावूंक नासलो तरी आडवेळ्या पावसाक लागून थंडसाण तयार जातली. अंदूं आडवेळ्या पावसाचें प्रमाण सामकें उणें आसा. दोन दिसां पयलीं पडिल्ल्या पावसाक लागून झाडां हुमटून पडलीं. हाका लागून जीण विस्कळीत जाली. उण्या दाबाच्या पट्ट्याक लागून वाऱ्याची गती वाडटली. हाका लागून जीण विस्कळीत जावपाची भिरांत आसा.
फाटले दोन दीस पावस नाशिल्ल्यान तापमान वाडून गरमी वाडली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
