मुख्यमंत्री दिल्लींत, राजकी मळार चर्चां

भांगरभूंय | प्रतिनिधी

अमित शाह, जे. पी, नड्डा, मांडविया हांची घेतली भेट

भांगरभूंय I प्रतिनिधी
पणजी : अर्थसंकल्पी अधिवेशना पयलीं मुख्यमंत्री डॉ. प्रमोद सावंत हांणी दिल्लींत केंद्रीय गृह मंत्री अमीत शाह हांची भेट घेतली. तेच प्रमाण राष्ट्रीय अध्यक्ष जे. पी. नड्डा, केंद्रीय भलायकी मंत्री मांडवीया हांचीय तांणी भेट घेतली. हे भेटींत राजकी विशयांचेर चर्चा जावपाची शक्यताय आसा. मुख्यमंत्र्यांच्या अचकींत भेटीक लागून गोंयांत राजकी चर्चांक ओतो आयला. मात, भेटींत जाल्ले चर्चेची म्हायती कोणेच दिवंक ना.

गोंयांत आयच्यान प्रशासन तुमच्या दारांत मोहीम सुरू जाता. हे कार्यावळींत दरेक म्हालांत मंत्री लोकांची गाराणीं आयकून घेतले. हे कार्यावळीचे तयारेंत अधिकारी आनी मंत्री आसतना बिरेस्तारा अचकींत मुख्यमंत्री दिल्लींत गेले. सगल्यांत पयलीं तांणी राष्ट्रीय अध्यक्ष जे. पी. नड्डा हांची भेट घेतली. सांज वेळार तांणी केंद्रीय गृह मंत्री अमीत शाह हांची आनी उपरांत केंद्रीय भलायकी मंत्री मनसुख मांडविया हांची भेट घेतली.
आयुर्वेदांत दिल्ल्या योगदाना खातीर राष्ट्रीय आयुर्वेद विद्यापिठान मुख्यमंत्री डॉ. प्रमोद सावंत हांकां फेलोशीप भेटयली. राष्ट्रीय आयुर्वेद विद्यापिठाच्या पदवीदान सुवाळ्यांत मुख्यमंत्र्यांनी संबोधन केले.
खंयचीच पूर्वसुचोवणी दिनासतना मुख्यमंत्र्यांनी दिल्लीक भेट दिली. राष्ट्रीय आयुर्वेद विद्यापिठाच्या पदवीदान सुवाळ्याचे मुख्यमंत्र्यांक निमंत्रण आशिल्लें. ह्या सुवाळ्या निमतान दिल्लींत गेले कडेन तांणी केंद्रीय मंत्री अमीत शाह तशेंच हेरांची भेट घेतली, अशी म्हायती सुत्रांनी दिली.
गोंयांत हालींच पर्यटकांक हॉटेलांत जाल्ले मारपेटीन गोंयचें नांव पर्यटन मळार बदनाम जालां. तशेंच रान वाठाराक लागिल्ल्या उज्याक लागून पर्यावरणाचो प्रस्न निर्माण जाला. तशेंच म्हादयची समस्या कायम आसा. कायदो सुवेवस्था तशेंच येत्या अर्थसंकल्पा विशीं चर्चा जावपाची शक्यताय आसा.
भारतीय जनता पक्षान लोकसभेची तयारी सुरू केल्या. प्रदेश भाजप अध्यक्ष सदानंद शेट तानावडे हांच्या नांवाची उत्तर गोंया खातीर चर्चा आसा. दक्षीण गोंयांंत आदले खासदार नरेंद्र सावयकार तशेंच दिगंबर कामत हांच्या नांवाची चर्चा आसा. हे भेटींत लोकसभा वेंचणुके विशीं राष्ट्रीय अध्यक्ष जे. पी. नड्डा हांचे कडेन चर्चा जावपाची शक्यताय आसा.

मंत्रीमंडळांत फेर बदला विशीं चर्चा जावये
मुख्यमंत्र्यांचे दिल्ली भेटींत कायदो सुवेवस्था तशेंच येत्या अर्थसंकल्पा विशीं चर्चा जावपाची शक्यताय आसा. तशेंच काँग्रेसीच्या आठ आमदारांच्या भाजप प्रवेशाक 6 म्हयने पुराय जाल्यात. संकल्प आमोणकार, डिलायला लोबो ह्या आमदारांक म्हामंडळां मेळ्ळ्यांत, पूण ज्येश्ठ आमदारांक कसलेंच पद मेळूंक ना. मंत्रीमंडळांतल्यान दोन मंत्र्यांक वगळून काँग्रेसींतल्यान भाजपांत प्रवेश केल्ल्या आमदारांची वर्णी लागपाची शक्यताय आसा. बऱ्याच दिसांं सावन ही चर्चा आसा. मुख्यमंत्र्यांच्या शाह आनी नड्डा भेटी उपरांत परतून राजकी चर्चांक ओतो आयला. दिगंबर कामत, आलेक्स सिक्वेरा आनी मायकल लोबो ह्या तिगां मदीं दोगांक मंत्रीपद मेळपाची चर्चा आसा.