भांगरभूंय | प्रतिनिधी
शिवसेनेचे एकनाथ शिंदे सयत 11 आमदारांचें बंड
खबरां संस्था
मुंबयः पुराय महाराष्ट्राचें लक्ष विधानपरिशदेच्या वेंचणूक निकाला कडेन लागिल्लें, तेन्नाच दुसरे वटेन राज्यांत राजकी भुंयकांपाची तयारी सुरू जाल्या. महाराष्ट्रांतल्या ह्या राजकी भुंयकांपाचें केंद्र सुरतांत आसा. शिवसेना फुडारी एकनाथ शिंदे आनी 11 आमदारांनी शिवसेने आड बंड केलां. सध्या हे सगले आमदार सुरतांत आसात. तांची भाजप फुडाऱ्यां कडेन चर्चा जाल्ल्याची म्हायती मेळ्ळ्या. भाजपान 40 आमदारांचो तेंको आशिल्ल्याचो दावो केला.
मेळिल्ले म्हायती प्रमाण एकनाथ शिंदे आनी गुजरात भाजपाचे प्रदेशाध्यक्ष सी. आर पाटील हांचे वांगडा रातीं उसरां बसका जाली. ते उपरांत महाराष्ट्रांत राजकी भुंयकांपाची चर्चा सुरू जाल्या.
विधानपरिशद वेंचणुके उपरातं शिवसेनेंतली भितरली धूसफूस भायर येत आसा. मध्यान रातीं मुख्यमंत्री उद्धव ठाकरे हांणी पक्षाच्या आमदारांची बसका आपयिल्ली. हे बसकेक 13 आमदार हाजीर रावंक नात. ते उपरांत शिवसेनेंतलो हुस्को अदीकूच वाडला.
फाटलीं कांय वर्सां नाराज आशिल्ले शिवसेनेचे फुडारी एकनाथ शिंदे आनी ताच्या गटाचे आमदारांनी तोंकाचें पावल उबारलां, अशी म्हायती मेळ्ळ्या.
महाराष्ट्रांत सुरू जाल्ल्या सत्तानाट्याक लागून ल्हान पक्ष आनी अपक्ष आमदारांचे म्हत्व वाडलां. राज्यांत ल्हान पक्ष आनी अपक्ष आमदारांची संख्या 29 अासा. राज्यसभा आनी विधानपरिशद वेंचणुके उपरांत ह्या पक्षांची भुमिका निर्णायक थारतली.
एकनाथ शिंदे हांणी म्हणलें, आतां मेरेन आपूण पक्षविरोधी कसलेच पावल उबारूंक ना. खंयचोच वेगळो गट स्थापन करूंक ना. तशेंच खंयच्याच पक्षाचे वांगडीपद स्विकारूंक ना. अशें आसतना आपणाक गटफुडारी पदा वयल्यान कित्याक काडलो असो प्रस्न तांणी मुख्यमंत्र्यांक विचारलो. तांणी संजय राऊत हांचेर लेगीत नाराजी उक्तायल्या. संजय राऊत प्रत्यक्षांत एक आनी माध्यमांत भलतेच उलयतात, असो आरोप शिंदे हांंणी केला.
आपणाक मुख्यमंत्री पदाची कसलीच आस्त ना. हिंदुत्वाच्या मुद्यांचेर शिवसेना-भाजपांत युती जावची, हातूंत कितें वायट आसा? असो प्रस्नूय शिंदे हांणी मुख्यमंत्र्यांक विचारला. ह्या वेळार मुख्यमंत्र्यान तांची समजूत काडाचो यत्न केला. पूण शिंदे आपले भुमिकेचेर ठाम अाशिल्ल्याचे दिसता. बेगिनूच आपूण आपली भुमिका स्पश्ट करतलो, अशेंय तांणी सांगलें.
उद्धव ठाकरे- एकनाथ शिंदें मदीं फोना वयल्यान चर्चा
शिवसेने आड बंड केल्ले एकनाथ शिंदे हांचे कडेन मुख्यमंत्री उद्धव ठाकरे हांणी फोना वयल्यान संवाद सादून तांची समजून काडपाचो यत्न केला. दोगांय मदीं सुमार 40 मिण्टां चर्चा जाली, अशी म्हायती मेळ्ळ्या.
शिंदे हांकां गटपदा वयल्यान काडले
नगरविकास मंत्री एकनाथ शिंदे हांणी बंड केले उपरांत शिवसेनेन व्हड कारवाय केल्या. शिंदे हांकां शिवेसेनेच्या गटपदा वयल्यान काडले. तांचे सुवातेर आमदार अजय चौधरी हांणी गटफुडारीपदार नेमणूक केल्या. हो शिंदे समर्थकां खातीर व्हड धपको मानतात.
महाराष्ट्राच्या विधानसभेचें सख्याबळ
महाराष्ट्राच्या विधानसभेची वांगडी संख्या 288 आसा. शिवसेनेचे आमदार रमेश लटके हांकां मरण आयिल्ल्यान तांची सुवात रिती आसा. भाजपाचे 106, शिवसेनेचे 55, राष्ट्रवादी काँग्रेसचे 53, काँग्रेचे 44 आमदार आसात. भाजपान राज्यसभा आनी विधानपरिशद वेंचणुकेंत अपक्षांक आपले कडेन घुंवडापाक येस मेळयलां. आतां एकनाथ शिंदे हांच्या नाराजीनाट्याक लागून अपक्ष आमदार ल्हान पक्षांचें म्हत्व परतून वाडलां. वट्ट 29 आमदारां मदीं 16 आमदारांनी मविआ सरकाराक तेंको दिल्लो. जाल्यार 13 आमदार भाजपाचे वटेन आसात.
अमीत शाह – जे. पी. नड्डांची ताकतिकेची बसका
महाराष्ट्रांतल्या म्हाविकास आघाडीचें सरकार अल्पमतांत येतलें? ही चर्चा सुरू आसतना दुसरे वटेन राजधानी दिल्लींत राजकी घडामोडींक नेट आयला. विधानसभा विरोधी पक्ष फुडारी आनी आदले मुख्यमंत्री देवेंद्र फडणवीस दिल्लींत दाखल जाल्यात. एके वटेन केंद्रीय गृह मंत्री अमीत शाह आनी भाजपाचे राष्ट्रीय अध्यक्ष जे. पी. नड्डा हांची ताकतिकेची बसका जाल्या. महाराष्ट्रांतले भाजपाचे म्हत्वाचे फुडारी आनी केंद्रीय मंत्री नितीन गडकरी हे लेगीत दिल्लींत पावल्यात. ते खातीर महाराष्ट्रांत सत्तानाट्य घडपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
