भांगरभूंय | प्रतिनिधी
दिल्लींत खेटाखेट; 18 जाणांक मरण, 14 बायलो आनी 3 भुरग्यांचो आस्पाव
खबरां संस्था
नवी दिल्ली: रेल्वे स्टेशनांचेर वाडटी गर्दी पळोवन रेल्वेन अलर्ट जारी केला. सगळ्या स्टेशनांचेर एकसमान देखरेख दवरपाक तशेंच प्रवाश्यांची गर्दी जाता अशें दिसताच तत्काळ विशेश ट्रेन चलोवपाक सांगलां. गर्दी वेवस्थापना खातीर 10 फेब्रुवारी सावन प्रयागराजाच्या सगळ्या आठूय रेल्वे स्टेशनांचेर वन वे मार्ग वेवस्था लागू जातली. हे वेवस्थे खाला एके वटेन प्रवेश दितले आनी दुसरे वटेन प्रवाश्यांक भायर काडटले. स्टेशना वटेन वचपी रस्त्यांचेर डायव्हर्जन लागू आसतलें तशेंच प्रवाश्यांक प्रवास आलाशिलो सुवातेच्या माध्यमांतल्यानबूच प्रवेश दितले.
सीसीटीव्ही वरवीं रस्त्याचेर देखरेख केल्ल्यान गर्दीचो अदमास येतलो आनी ज्या स्टेशनाचेर चड गर्दी जातली थंय तत्काळ विशेश ट्रेन चलयतले. हातूंत नैनी आनी प्रयागराज जंक्शना वयल्यान पंडीत दीनदयाल उपाध्याय जंक्शना वटेन, जाल्यार प्रयागराज जंक्शना वयल्यान कानपूर रुटाचेर विशेश ट्रेन चलतली.
मजगतीं, शेनवारा रातच्या 9.26 वरांचेर दिल्ली रेल्वे स्टेशनाचेर जाल्ले खेटाखेटींत 18 जाणांक मरण आयलें. तातूंत 14 बायलो आनी 3 भुरग्यांचो आस्पाव आसा. 25 परस अदीक लोक जखमी जाल्यात. मरण आयिल्ल्यांच्यो कुडी आरएमएल हॉस्पिटलांत हाडल्यात. कर्मचाऱ्यांच्या सुत्रांनी दिल्ले म्हायती प्रमाण, चडश्या कुडींच्या हड्ड्यांचेर आनी पोटाचेर जखमो आशिल्ल्यो. तांकां स्वास गुदमुरून मरण आयलें.
हो अपघात प्लॅटफॉर्म नं. 13, 14 आनी 15 मजगतीं जालो. महाकुंभाक वचपा खातीर दनपारां 4 वरां सावन स्टेशनांचेर गर्दी जावपाक लागिल्ली. रातच्या 8.30 वरांच्या सुमाराक प्रयागराजाक वचपी 3 गाडयो उसरान धांवल्यो, जाका लागून गर्दी वाडली. प्रथ्यक्ष पळोवप्यांनी दिल्ले म्हायती प्रमाण ट्रेनीचो प्लॅटफॉर्म 14 वयल्यान 16 केलो. हाका लागून खेटाखेट जाली.
अपघाताचे चवकशे खातीर दोन वांगड्यांची समिती स्थापन केल्या. तातूंत उत्तर रेल्वेचे दोग अधिकारी नरसिंग देव आनी पंकज गंगवार हांचो आस्पाव केला. समितीन नवी दिल्ली रेल्वे स्टेशनाचे सगळे सीसीटीव्ही व्हिडियो फुटेज सुरक्षीत करपाचे आदेश दिल्यात.
हे आदीं 29 जानेवारीक प्रयागराजाच्या महाकुंभांत 30 जाणांक मरण आयिल्लें. तशेंच कुंभमेळ्याक 10 फेब्रुवारी 2013 त प्रयागराज स्टेसनाचेर खेटाखेट जाल्ली. हे दुर्घटणेंत 36 जाणांक मरण आयिल्लें.
दुर्घटणे फाटलीं म्हत्वाचीं तीन कारणां
प्रयागराज स्पेशल ट्रेन भुमवनेश्वर राजधानी आनी स्वतंत्र सेनानी एक्सप्रेस प्रयागराजाक वचपाच्यो आशिल्ल्यो. भुवनेश्वर राजधानी आनी स्वतंत्र सेनानी ह्यो दोनूय गाडयो उसरान धांवताल्यो. प्लॅटफॉर्म नं. 14 चेर ह्या तीन गाडयांची गर्दी आशिल्ली. प्रयागराज विशेश ट्रेन थंय पावली तेन्ना घोशणा केली, भुवनेश्वर राजधानी प्लॅटफॉर्म नं. 16 चेर येता. हें आयकताच 14 प्लॅटफॉर्माचेर आशिल्ली गर्दी 16 वटेन धांवली. दुसरें कारण म्हणल्यार तिकेट कावंटराचेर खूब लोक आशिल्ले. तातूंतले 90 टक्के प्रयागराजाक वताले. अचकीत ट्रेन आयिल्ल्याची घोशणा जाली आनी लोक तिकेटी घेनासतनाच प्लॅटफॉर्मा कडेन धांवले, हाका लागून खेटाखेट जाली. तिसरें कारण म्हणल्यार दोन सप्तकाचे अखेरेक लोकांची गर्दी आसिल्ली. पूण स्टेशन प्रशासनान कसलोच नियंत्रण विभाग करूंक नाशिल्लो. शेनवारा लेगीत सांजेच्या 7 वरां सावन गर्दी वाडपाक लागिल्ली, पूण कोणेच लक्ष दिवंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
