भांगरभूंय | प्रतिनिधी
लोकसभा मतदारसंघ 2 वयल्यान 4 जावपाची शक्यताय
भांगरभूंय । प्रतिनिधी
पणजी : मतदारसंघांची फेरचणूक जावन 50 मतदारसंघ जाले जाल्यार मतदारसंघांत वर्चस्व आशिल्या मातब्बर फुडाऱ्यांक फटको बसपाची शक्यताय आसा. एसटी आरक्षण, बायलां आरक्षण आनी मतदारसंघांचे फेररचणुकेक लागून व्हड राजकी बदल जावपाची शक्यता आसा. एकंदरीत राज्याचो राजकी नकासोच बदलतलो अशीं चिन्नां आसा.
हाचे पयलीच जनगणनेची प्रक्रिया पुराय जावपाक जाय आसली. पूण कोरोना आनी हेर कारणांक लागून जनगणना जावंक ना. फुडल्या वर्सा मेरेन पुराय देशांत जनगणना जातली. जनगणने उपरांत राज्याची एससी, एसटी तशेंच हेर मागासवर्गियांचो आंकडो कळटलो. जनगणने उपरांत मतदारसंघ फेररचणूक आयोग मतदारसंघांची फेरचणूक करतलो. गोंयची लोकसंख्या वाडली जाल्यार मतदारांचो आंकडो वाडटलो. सध्याची लोकसंख्या ही 2011 चे जनगणनेचेर आदारीत आसा. जनगणनेक 14 वर्सां जाल्ल्यान गोंयची लोकसंख्या निश्चितपणान वाडटली. हाका लागून मतदारसंघांचो आंकडो वाडून तो 50 जातलो. आसा त्या मतदारसंघां मदल्यो पंचायती तशेंच प्रभागां मदीं बदल जातलो. लोकसंख्या वा मतदारांचो आंकडो समान दवरपाचेर भर आसतलो.
कळंगूटे मायकल लोबो हांचो शेक आसा. फाटली वेंचणूक ते काँग्रेसीचे उमेदवारीचेर जिखल्यात. बाबूश मोन्सेरात (पणजी), दिगंबर कामत (मडगांव), सुदिन ढवळीकार (मडकय), जोशुआ डिसोझा (म्हापशें), आलेक्स रेजिनाल्ड (कुडटरी), रोहन खंवटे (पर्वरी), जेनिफर मोन्सेरात (ताळगांव), रवी नायक (फोंडें), मॉवीन गुदिन्हो (दाबोळी) हांचो आपआपल्या मतदारसंघाचेर शेक आसा. सुदिन ढवळीकार आनी जोशुआ डिसोझा सोडले जाल्यार हेर वेगवेगळ्या पक्षांचे उमेदवारीचेर जैतवंत जाल्या. ह्या फुडाऱ्यांच्या मतदारसंघांचे रचणुकेंत बदल जालो जाल्यार ह्या फुडाऱ्यांच्या वर्चस्वाक धोको तयार जातलो. फेरचणुके उपरांत खंयचे मतदारसंघ एसटी खातीर आनी खंयचे मतदारसंघ बायलां खातीर राखीव जातले, हाचेरूय बऱ्योच गजाली निंबून आसात.
आतां 2027 त विधानसभा वेंचणूक जातली. युती तशेंच वेंचणुकेचे तयारीची चर्चा सुरू आसली तरी जनगणने उपरांत सगळीं समीकरणां बदलतलीं.
4 लोकसभा मतदारसंघांतलो 1 एसटींक, 1 बायलांक राखीव!
लोकसभा मतदारसंघांचो आंकडो 2 वयल्यान 4 जावपाची शक्यताय आसा. लोकसभेचे मतदारसंघ 4 जाले जाल्यार 1 बायलां खातीर आनी 1 एसटी खातीर राखीव जावप शक्य आसा. बायलां तशेंच एसटी खातीर राखिवतेची तजवीज करपा खातीर लोकसभा मतदारसंघांचो आंकडो वाडोवचो पडटलो. गोंय हें ल्हान राज्य आशिल्ल्यान हेर राज्यां प्रमाण गोंयची मतदारसंघांची फेररचणूक जावची ना. वेगळें सूत्र वा तंत्राचो वापर करचो पडटलो, अशी म्हायती गोपांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
