भांगरभूंय | प्रतिनिधी
मडगांव : मडगांव न्यू मार्केटांत तीन दुकानां फोडून कावंटरांतल्या पयशांची चोरी करपाची घडणूक घडली. तशेंच सुमार स दुकानां फोडपाचो यत्न चोरांनी केलो आनी सीसीटीव्ही कॅमेरेय फोडले. ह्या सीसीटीव्ही कॅमेर्यांत तीग जाण कैद जाल्यात.
सध्या चोरांनी मडगांवां मार्केटांतल्या दुकानांचेर नदर दवरल्या. राज्यांत नातलां आनी नव्या वर्साचे फाटभूंयेर पर्यटकांची गर्दी वाडल्या. ह्याच काळांत मडगांव मार्केटांतलीं दुकानां फोडपाचो चोरांनी यत्न केलो. तशेंच तीन दुकानां फोडून कावंटरांतले पयशेय चोरले. न्यू मार्केटांतल्या दुकानांनी दुकानदार चड पयशे दवरी नात. मात कावंटरांतले कोणाचे चार हजार जाल्यार कोणाचे पांच हजार अशे पयशे चोरांनी चोरून व्हेल्यात. शेनवारा रातचो हो प्रकार घडलो. चोरांनी मार्केटांतले सीसीटीव्ही कॅमेरे फोडले. दुकानदारांनी सीसीटीव्ही फुटेज पळयली तेन्ना तिगां अनवळखी चोरांचें हें काम आशिल्ल्याचें दिसून आयलें. पुलिसांनी घडणुके सुवातेर वचून पळोवणी केली. नेमकीं कितलीं दुकानां फोडलीं आनी कितल्या दुकानांक फोडपाचे यत्न केले हाची म्हायती पुलीस घेतात. मडगांव न्यू मार्केटांतले चोरये उपरांत विक्रेत्यां वतीन सुरक्षीततायेचो प्रस्न उक्तायलो आनी पुलीस प्रशासनान गस्त वाडोवपाची मागणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
