भाजपाचें लोकसभे खातीर ‘मिशन दक्षीण गोंय’ सुरू !

भांगरभूंय | प्रतिनिधी

दक्षीण गोंय भाजपा खातीर प्रतिश्ठेचो, केंद्रीय फुडारी घेतात नियाळ

भांगरभूंय । विश्वनाथ नेने पणजीः भारतीय जनता पक्ष म्हणल्यारूच भाजपा खातीर वेंचणूक हो एक गंभीर विशय आसात. विधानसभेची जांव, लोकसभेची जांव वा पंचायत पातळी वयली वेंचणूक जांव, ते पुराय प्लानींग आनी पक्षाची सगळी यंत्रणा ते खातीर वावराक लायतात. हेच कारण आसूं येता की आयज भाजपाची गल्ली ते दिल्ली मेरेन सत्ता आसा. आता पक्षान झोकून दिलां ते 2024 सात जावपी लोकसभा वेंचणुके खातीरच्या संघटनात्मक कामांत. हाचोच एक भाग म्हूण गोंयांत दक्षीण गोंय लोकसभा मतदारसंघा खातीर भाजपान बारीकसाणीन काम सुरू केलां. तांकां खंयचेय परिस्थितींत हो मतदारसंघ जिखपाचोच आसा. फाटले लोकसभा वेंचणुकेंत देशभरांत सुमार 160 मतदारसंघांत पक्षाक सामक्या उण्यां मतांनी हार खावची पडिल्ली. त्या 160 मतदारसंघांत गोंयांतल्या दक्षीण गोंय मतदारसंघाचोय आस्पाव आशिल्लो. आतां ह्या अशा मतदारसंघानी भाजपाचे राज्य ते केंद्र पांवड्या वयले पक्षाचे ज्येश्ठ फुडाऱ्यांनी स्वता लक्ष दवरलां.

दक्षीण गोंयांत भाजपाच शक्तिशाली, मात लोकांचो कौल थारतलो निर्णायक

दक्षीण गोंयांतली राजकी स्थिती पळयत जाल्यार 20 विधानसभा मतदारसंघांतल्या 12 मतदारसंघांनी भाजपाचे आमदार आसात जाल्यार 2 अपक्ष आलेक्स रेजिनाल्ड आणि आंतोन वाझा सयत एमजीचो सुदिन ढवळीकार हांणी भाजपाक तेंको दिला. ह्या सगळ्यांचो मेळून आकडो जाता वट्ट 15 आमदार. विरोधांतले काँग्रेसीचे दोग आमदार युरी आलेमांव आनी एल्टन डिकॉस्टा, आम आदमी पक्षाचे दोन आमदार कॅप्टन व्हेंजी व्हिएगस आनी क्रूझ सिल्वा आनी गोवा फॉरवर्डाचो विजय सरदेसाय अशे मेळून 5 जाण आसात. फाटल्या दिसांनी काँग्रेसीचे ज्या 8 आमदारांनी होलसेल भाजपांत प्रवेश केलो तातूंतले 3 आमदार हे दक्षीणेंतले आसात. तातूंतले दिगंबर कामत हांणी भाजपांत प्रवेश केल्ल्याच्यो व्हड फायदो भाजपाक जातलो हें निश्चीत. मुरगांवचेय लोक भाजपा वटेन रावतले. हाचें कारण म्हणल्यार फक्त संकल्प आमोणकार न्हय जाल्यार थंय भाजपाचें संघटणूय मजबूत आसा. कसोटी लागतली ती नुवेंचे आमदार आलेक्स सिक्वेरा हांची. नुव्यां भाजपाक लोकसभे खातीर आघाडी मेळटली अशीं चिन्नां मातूय दिश्टी पडनात. मात जर थंय भाजपाक बऱ्यापैकी मतां मेळोवन दिवपाक सिक्वेराक येस आयलें जाल्यार मंत्रीपदा खातीर नेट लावपाक तांकां तो एक आधार मेळटलो. मात विरोधी 5 आमदारांनी एकठांय येवन उमेदवार दिलो आनी 8 आमदारांच्या होलसेल भाजपांत वचपाचे कृतीआड लोकांनी तिडक उक्तायली जाल्यार दक्षीण गोंयांत आकडे आसुनूय भाजपा निश्प्रभ थारूं शकता. मात हें सगळें विरोधकांचो एकजूट जालो जाल्यारूच शक्य आसा, इतलें मात खरें.

बी. एल. संतोष घेतात स्वता नियाळ, नारायण राणेकूय जापसालदारकी

दक्षीण गोंय मतदारसंघ भाजपान कितलो गंभीरतायेन घेतला हाची देख म्हणल्यार ह्या मतदारसंघाचे संघटणात्मक बांदणीचेर भाजपाचे वरिश्ठ फुडारी पक्षाचे केंद्रीय सरचिटणीस बी. एल. संतोष हे स्वता लक्ष दवरून आसात. बी. एल. संतोष हे भाजपाचे एक म्हत्वाचे वेंचणूक रणनितीकार. दक्षीण गोंयांतले मतदारसंघनिहाय बूथ कमिट्यो स्थापन करपाच्या कामाचो स्वता बी. एल. संतोष हे नियाळ घेतात. ते भायर भाजपान दक्षीण गोंया खातीर केंद्रीय मंत्री आनी महाराष्ट्राचे आदले मुख्यमंत्री नारायण राणे हांचे कडेन लेगीत व्हड जापसालदारकी दिल्या.

सावयकार ऑन ग्रावंड, बाबूच्योय हालचाली सुरू

दक्षीण गोंयचे भाजपाचे उमेदवारीचो विचार करीत जाल्यार दक्षीण गोंयचे आदले भाजपा खासदार अ‍ॅड. नरेंद्र सावयकार हांणी तयारी केल्या. फाटल्या सुमार वर्सभरा सावनूच सावयकार हांणी दक्षीण गोंयच्या वेगवेगळ्या वाठारांनी सरकारी कार्यावळीं जांव वा सणा परबींच्या निमतान लोकांच्यो गाठीभेठी ते घेतात. आदी खासदार म्हूण काम केल्ल्यान ताचोय फायदो तांकां जाता तो दिश्टी पडटा. अ‍ॅड. सावयकार हे भाजपाचे निश्ठावान. पक्षाच्या संघटणात्मक कामांतूय ते आपलो खूबसो वेळ दितात. दुसरे वटेन आदले उपमुख्यमंत्री आनी केपेंचे आदले आमदार बाबू कवळेंकार हांणीय उमेदवारी खातीर हालचाली सुरू केल्यात. बाबू कवळेकार हांचो पक्ष विरहीत स्वताचो असो कांय मतदारसंघानी प्रभाव आनी ताकद आसा. देखीक केपें, सांगे, कुंकळ्ळी. मात बाबू कवळेकार हांची फाटले फावट काँग्रेसीचे एल्टन डिकॉस्टा हांचे आड हार जाल्ल्यान तांचो प्रभाव अजून लेगीत कायम आसा हे तांकां सिद्ध करचें पडटलें.

भाजपाचो दक्षीण गोंया खातीर क्रिस्तांव उमेदवार ?

दक्षीण गोंया खातीर भाजप हे फावट वेगळो विचार करपाक शकता अशें पक्षांतल्या कांय सुत्रांनी भांगरभूंय कडेन उलयतना सांगलें. भाजपा सद्ध्या देशभर अल्पसंख्यांकांक लागीं हाडटा. दक्षीण गोंयांत क्रिस्तांव मतदारांची ताकद खूब आसा. काँग्रेसीचो उमेदवार हो क्रिस्तांव आसपाची शक्यताय चड आसा. हे सगळे फांटभुंयेर भाजपाय एखाद्या क्रिस्तावाक लोकसभेची उमेदवारी दिवपाक शकता. भाजपान हाचे आदीं आदले आमदार मंत्री विल्फेड मिस्किताक लोकसभेची उमेदवारी दिल्ली मात तो यत्न येसस्वी जावंक नाशिल्लो. मात आतांची राजकी परिस्थिती वेगळी आसा. सद्ध्याचे घडीक तसो क्रिस्तांव चेरो लोकसभे खातीर दिश्टी पडना, तरी भाजपा वेगळी राजकी खेळी करून नाराज जाल्ल्या अल्पसंख्यांकांक आपले वटेन ओडपाक शकता.