भांगरभूंय | प्रतिनिधी
15 दिसांत बाल संरक्षण समित्यो स्थापन करात : बाल हक्क आयोग
भांगरभूंय I प्रतिनिधी
पणजी : भुरग्यांची उदरगत तशेंच अत्याचारा पसून तांचें संरक्षण करपा खातीर दरेकी गांव तशेंच पालिकांनी बाल संरक्षण समिती स्थापन करप बंधनकारक आसा. बाल संरक्षण समित्यो स्थापन जाल्यात काय ना, हे विशीं 4 म्हाल तशेंच 11 नगरपालिकां कडल्यान कसलीच म्हायती आयोगाक मेळूंक ना. बाल संरक्षण समित्यो ना जाल्यार त्यो 15 दिसांत स्थापन करच्यो, अशें आदेश बाल हक्क आयोगान संबंदींत गट विकास अधिकारी तशेंच पालिकांक दिल्या.
बाल हक्क आयोगाचे अध्यक्ष पीटर एफ. बोर्जीस हांचे फुडारपणा खाला पणजे सचिवालयांत बसका जाली. हे बसकेक सगल्या म्हालांतले गट विकास अधिकारी तशेंच पालिकांचे मुख्याधिकारी हाजीर आशिल्ले. तशेंच बायलां आनी भुरगीं उदरगत खात्याच्यो संचालिका दीपाली नायक तशेंच आयोगाचे हेर वांगडी हाजीर आशिल्ले. बाल हक्क आयोगाचे अध्यक्ष पीटर बोर्जीस हांणी ही म्हायती दिली.
दरेकी गांवांत तशेंच नगरपालिकां मदी बाल संरक्षण समिती स्थापन करप गरजेचें. गटविकास अधिकाऱ्यांनी पंचायतीक आदेश दिवन ह्यो समित्यो स्थापन करप गरजेचें आसता. समित्यो स्थापन जाल्या काय ना, हे विशींची विचारणा आयोगान गटविकास अधिकाऱ्यां कडेन केल्ली. पेडणें, बार्देस, दिवचल आनी सत्तरी ह्या 4 म्हालांतल्यान समिती विशीं कसलीच म्हायती ना. सगल्या गांवांनी समित्यो स्थापन जाल्यात काय ना, हे विशींची म्हायती गट विकास अधिकारी दिवंक शकले नात.
तिसवाडी म्हालांतल्या 19 गांवांतल्यान 17 गांवांनी बाल संरक्षण समित्यो स्थापन जाल्यात. फोंडें म्हालांतल्या सगल्या 19 गांवांनी, धारबांदोडेंतल्या 5 गांवांनी, मुरगांवच्या 10, साश्ट म्हालांतल्या 30, सांगेंतल्या 7, केपेंतल्या 11 जाल्यार काणकोणांतल्या 7 गांवांनी समित्यो स्थापन जाल्यात. फोंडें, धारबांदोडें, मुरगांव, साश्ट, सांगें, केपें आनी काणकोण ह्या म्हालांतल्या सगल्या गांवांनी बाल संरक्षण समित्यो स्थापन जाल्यात.
पणजे म्हापालिका आनी सांखळे नगरपालिकेंत बाल संरक्षण समिती स्थापन जाल्या. पालिकेच्या मुख्याधिकाऱ्यांनी ही म्हायती दिली. म्हापशें, दिवचल, वाळपय, फोंडें, सांगें, मडगांव, मुरगांव, कुंकळ्ळी, केपें, कुडचडें – काकोडें आनी काणकोण पालिके कडल्यान समिती विशीं म्हायती दिवंक ना. समिती स्थापन जाल्या काय ना, हाची म्हायती पालिका मुख्याधिकाऱ्यां कडेन नाशिल्ली. अहवाल सादर करपाचे आदेश अध्यक्षांनी दिल्या.
पंचायत / पालिकांनी निधीची तजवीज करची
भुरग्यांचें संरक्षण तशेंच उदरगती खातीर पंचायत तशेंच म्हापालिकांनी खासा निधीची तजवीज करची, अशी शिफारस आयोगान केल्या. राज्यांत 24 एप्रील 2023 दिसा पंचायत राज दीस मनयतले. हे दिसा पंचायतींनी 11 ते 18 वर्सां पिरायेच्या भुरग्यां खातीर बाल सभेचे आयोजन करचें. सरपंचांच्या अध्यक्षते खाला 6 म्हयन्यांतल्यान एक बाल सभा जावप गरजेचें. दरेकी नगरपालिकेंत बाल सभे सारक्यो वर्सांतल्यान 2 सभा जावपाक जाय, अशी शिफारस आयोगान केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
