भांगरभूंय | प्रतिनिधी
-आमदार संकल्प आमोणकार हांणी न्हयकार दिल्ल्यान सरकाराचो निर्णय
पणजी : आमदार संकल्प आमोणकार हांणी बालभवनाचे अध्यक्षपद घेवपाक न्हयकार दिल्ल्यान बालभवनाच्या अध्यक्षपदाचो ताबो शिक्षण सचीव प्रसाद लोलयेंकार हांचे कडेन दिला.
शिक्षण संचालक शैलेश झिंगडे हांणी हे विशींचो आदेश जारी केला. आदेशा प्रमाण हाचे मुखार बालभवनाच्या अध्यक्षपदाचो ताबो शिक्षण सचीव प्रसाद लोलयेंकार हांचे कडेन आसतलो.
मजगतीं, फाटल्या विधानसभा वेंचणुकांच्या निकाला उपरांत कांय म्हयन्यांत काँग्रेसीचे आठ आमदार फुटून भाजपांत आयिल्ले. तातूंतल्या पांच जाणांची नेमणूक म्हामंडळां आनी संस्थांचेर केल्या. हातूंतले आमदार संकल्प आमोणकार हांची 30 जानेवारी 2023 दिसा बालभवनाच्या अध्यक्षपदार नेमणूक केल्ली. हे विशींचो आदेशूय जाली जाल्लो. पूण आमोणकार हांणी ह्या पदाचो ताबो स्विकारूंक नाशिल्लो. आतां तांणी हे पद स्विकारपाक न्हयकार दिल्ल्यान बालभवनाच्या अध्यक्षपदाचो ताबो शिक्षण सचीव प्रसाद लोलयेंकार हांचे कडेन दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
