भांगरभूंय | प्रतिनिधी
शिगम्या वांगडा हेंवूय आंदोलन रंगार येतलें अशें दिसता. पूण तें शांतिकायेन जावचें.
अामचो गांव, आमकां जाय, हो आवाज फाटलीं दोन वर्सां सांवड्डें, कुडचडें, सांगें मतदारसंघांत गाजता. कारण जालां झुवारी न्हंयेचेर येवपी उदका स्रोत खात्याचो 280 कोटींचो (आतां ताचें मोल दुपेट जालां आसतलें.) बंधारो. म्हैसाळ धरणाक उदक व्हरपाक आनी वाठारांतल्या सगल्यांची उदकाची तजवीज करपाक हो बंधारो उबारतात, अशें सरकारी यंत्रणेंचें म्हणणें, तर ह्या बंधाऱ्याक लागून हुंवारा पाश्ट सैमीक संकश्ट येतलें, अशें थळावे म्हणटात. आतां आंदोलक पेटून उठल्यात. फाटले 12 दीस ते आंदोलन करतात, पूण सरकाराचो एकूय मनीस आमकां मेळूंक येवंक ना, असो तांचो शीण. खरें म्हणल्यार सरकारी अधिकाऱ्यांनी थंय वचून गांवकारांक बाजू पटोवन दिवंक जाय आशिल्ली. तांचे जे दुबाव आसात, ते पयस करपाक जाय आशिल्ले. आंदोलन चड काळ चलप समाजीक नदरेन योग्य न्हय. सगल्यांक मान्य असो तोडगो काडून मुखार वच्चें. नाजाल्यार दुसरो पर्याय सोदचो. तो मेळचना जाल्यार सरळ तो प्रकल्पूच रद्द करप बरें न्हय? कारण गांवकारांच्या मतान, बंधाऱ्याक लागून दरवर्सा येता ती बुडटी आनीक खर जातली. भाटां, घरां बुडटलीं.
बंधारो प्रकल्पाक लागून गणपती विसर्जन, अस्थी विसर्जन, नुस्तेमारी, न्हांवप, धर्मीक विधींचेर बंधनां येतलीं, अशें लोक म्हणटात. पर्यावरणाच्या लुकसाणा वांगडाच उणींच 500 घरां मातये भरवण जातलीं. उदक सांठून उरल्यार मानग्यांचोय वावर वाडटलो, अशी भिरांत एकल्यान उक्तायली. शिंपणावळ, पिवपाक उदक मेळटलें अशें सरकार म्हणटा, पूण ते कोणाक? कांय वाठारांनी जमीन विकूंक सोदप्यांक बरे दीस येतले, तर हेर कडेन हुंवाराची बादा जातली, असोय विरोधकांचो दावो. बंधाऱ्याचो जागोय बदलिल्लो. पूण थळावे पंचायतीन आमकां विस्वासांत घेवंक ना, असो आरोप फाळणेंच्या गांवकारांनी फाटीं केल्लो. सांवड्डें पंचायतीन काम बंद करपाक लायलां. मात, सगलेच आंदोलक थळाव्या आमदारांचेर बेजार आसात. विशेश म्हणल्यार हांगा सरकारपक्ष भाजपाची व्हडली मतपेटी आसा! आतां आंदोलनाक बशिल्ल्यांक तेंको दिवपाक एक- एक करून विरोधी फुडारी मुखार येवंक लागल्यात. म्हणटकच शिगम्या वांगडा हेंवूय आंदोलन रंगार येतलें अशें दिसता. पूण तें शांतिकायेन जावचें.
फाटलें वर्सभर बसका जायत आसात. लोक म्हणटात, उदक दिवपाक कोणाचोच विरोध ना. पूण हेर पर्याय वापरून तें व्हरचें. पंप घालून उस्पुवचें आनी दिवचें. न्हंयेचे देगेर गांव, भाटां आसात. भरती येतकच उदक भाटाक तेंकता. कांय कडेन सांठून उरता. बांदाचो जागो फक्त 300 मिटरांचेर, म्हणटकच तो बांदतकच उदक भितर घुसूंक शकता. म्हैसाळ धरणाक सध्या मेळटा, ताचे कितलेशेच पटीन उदक (50 एमएलडी) ह्या बंधाऱ्या वरवीं मेळटलें खंय. दुसऱ्या मतदारसंघा खातीर आमी कित्याक संकश्ट ओडून घेवचें, असो कांय आंदोलकांचो दावो. सरकारी यंत्रणांनी थळाव्या लोकांक विस्वासांत घेवंक ना, लेखी कळोवंक ना. बांदाच्या जाग्यार फलकूय नात, देखून एक- दोगांक ह्या प्रकल्पा विशींच दुबाव आसा. तो पयस करप कोणाचें काम? लोकांक नाका जाल्यार हो प्रकल्प आमी तांचेर लादचे नात, अशें एका मंत्र्यान फाटीं म्हणिल्लें. ताचें कितें जालें?
ह्या आंदोलनाची धर्मीक, सांस्कृतीक बाजूय आसा, तीय नदरेआड करपाक जावची न्हय. विवीध धर्मीक विधी, रिती हे न्हंयेचे देगेर जातात. राखणदाराचे जागे, घुमट्यो, देवळां आसात. हो बंधारो तिनूय मतदारसंघांक घातक थारतलो, असो दावो आतां दरेकलो करपाक लागला. म्हणटकच थंयच्या आमदार, नगरसेवक, पंच, जिल्हो पंचायत वांगड्यांनी आपली भुमिका स्पश्ट करप बरें. सगल्यांचोच जर विरोध आसा जाल्यार तांचेर हो प्रकल्प कित्याक लादचो? आंदोलनां उपरांत इतले प्रकल्प रद्द केले, तातूंत आनीक एकाची भर, इतलेंच!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
