फाटल्या देड वर्सांत ध्वनी प्रदुशणाच्यो 1430 कागाळी; गुन्यांव फक्त तिगांचेर

भांगरभूंय | प्रतिनिधी

हणजूण पुलीस स्टेशनाचे शिमेंत घडिल्लो प्रकार

पणजी: गोंयांत ध्वनी प्रुदशशणाचो मुद्दो गाजत आसतनाच हणजूण पुलीस स्टेशनाचे शिमेंत फाटल्या देड वर्सांत ध्वनी प्रदुशणा विशीं 1,430 कागाळी आयिल्ल्यो आनी तातूंतल्या फक्त तिगांचेरूच गुन्यांव नोंद जाल्यात अशी म्हायती उक्ती जाल्या.

शिवोलेची आमदार डिलायला लोबो हांणी जुलयांत जाल्ल्या पावसाळी अधिवेशनांत ध्वनी प्रदुशणा विशीं लेखी प्रस्न विचारिल्लो. ताका जाप दितना मुख्यमंत्री तशेंच गृह मंत्री डॉ. प्रमोद सावंत हांणी 1 जानेवारी 2021 ते 30 जून 2022 ह्या देड वर्साच्या काळांत हणजूण पुलीस स्टेशनाच्या कंट्रोल रुमा कडेन 1,430 कागाळी ध्वनी प्रदुशणा विशीं आयिल्ल्यो.

2021 वर्सा 955 आनी 1 जानेवारी 2022 ते 30 जून 2022 ह्या काळांत 475 कागाळींचो तातूंत आस्पाव आशिल्लो. कागाळ आयले उपरांत पुलिसांच्या पंगडान तत्काळ दुबावीत सुवातीर वचून पळोवणी केली. पूण चडशा सुवातींनी ध्वनी प्रदुशणाचें उल्लंघन जावंक नाशिल्ल्याचें दिसून आयलें. फक्त तिनूच कडेन ध्वनी प्रदुशणाचें उल्लंघन जाल्ल्याचें स्पश्ट जाल्ल्यान तिगां आड गुन्यांव नोंद केले अशेंय मुख्यमंत्र्यानी जापेंत म्हणिल्लें.

पार्टी, कार्यावळीं खातीर संगीत वाजयत आसतना ते विशीं प्रदुशण नियंत्रण मंडळ, पर्यावरण खात्याची परवानगी घेवप गरजेची आसता. पूण गोंयांत खूबशे कडेन पार्ट्यांनी, कार्यावळींनी प्रदुशण नियंत्रण मंडळान घालून दिल्ले मर्यादे परस चड आवाजांत कान फोडपी संगीत वाजयतात. ह्यो पार्ट्यो फांतोड मेरेन चलतात. ताचो फटको थळाव्या लोकांक सोंसचो पडटा. ताका लागून उच्च न्यायालयान रातच्या 10 उपरांत ध्वनी प्रदुशण आडावपाचे निर्देश गोंय सरकारान दिल्यात. ते प्रमाण सरकारान कारवाय सुरू केल्या.