भांगरभूंय | प्रतिनिधी
समितीक अहवाल सादर करपाक 31 डिसेंबर मेरेन मुजतवाड
भांगरभूंय प्रतिनिधी
पणजी : पुर्तुगेज काळांत मोडिल्ल्या देवळां विशीं म्हायती घेतना पुर्तुगेज दस्तावेजांचो आधार घेवचो पडटा. पुर्तुगेज दस्तावेज वाचपाक अणकाराची गरज आशिल्ल्यान मोडिल्ल्या देवळांचो अहवाल सादर करपाक कळाव जातलो. अहवाल तयार करपा खातीर स्थापन केल्ले समितीक सरकारान 31 डिसेंबर मेरेन मुजतवाड दिल्या.
पुराभिलेख खात्याचे मंत्री सुभाष फळदेसाय हांणी ही म्हायती दिली. समितीन अंतरीम अहवाल सादर केला. ह्या अहवालांत पुराय म्हायती नाशिल्ल्यान सरकारान तो उक्तो करूंक ना. समितीक अभ्यास करपाक आनी वेळ जाय. हाचे खातीर 31 डिसेंबर मेरेन समितीक मुजतवाड दिल्या, अशें मंत्री सुभाष फळदेसाय हांणी सांगलें.
गोंय ही देवभूंय म्हूण फामाद आसा. गांवागांवांनी देवळां आसात. अंत्रूज म्हालांतलीं देवळां पर्यटकांक लेगीत आकर्शीत करतात. पुर्तुगेज तेंपार लेगीत बरीच देवळां आशिल्लीं. जायतीं देवळां पुर्तुगेजांनी मोडून उडयली. ह्या देवळांचे अवशेश त्या, त्या जाग्याचेर आसात. मोडिल्लीं देवळां परतून उबारपाची घोशणा मुख्यमंत्री डॉ. प्रमोद सावंत हांणी केल्या. हे खातीर अर्थसंकल्पांत निधीची तजवीज केल्या.
मंगळारा शिवाजी राज्याभिशेक सुवाळ्या दिसा जाल्ले कार्यावळींत पुर्तुगेज राजवटींतल्यो खुणो पुसून उडोवन नव्या गोंयची निर्मणी करतले, अशें मुख्यमंत्री डॉ. प्रमोद सावंत हांणी सांगलें. पुर्तुगेजांनी मोडिल्लीं देवळांचे पुनरुज्जीवन केल्यार पुर्तुगेज खुणो पुसपाक मजत जातली. हाका लागून मोडिल्लीं देवळां बांदपाचो विशय परत चर्चेत आयला.
पुर्तुगेज राजवटींत खंयचीं देवळां मोडल्यात ताचे दस्तावेज एकठांय करून अहवाल सादर करपा खातीर सरकारान समिती स्थापन केल्ली. हे समितीन वावर सुरू करून अंतरीम अहवाल सादर केलो. निमाणो अहवाल अजून सादर जावंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
