भांगरभूंय | प्रतिनिधी
मडगांव: पर्यटन खात्या वतीन पणजे कार्निव्हल मिरवणुकेंत वांटेकार चित्ररथ आनी कलाकारांची व्हड प्रमाणांत गैरसोय जाली. सकाळीं ११ वरां सावन रातीं उसरां मेरेन चित्ररथांक तात्कळत दवरले. चित्ररथांचें योग्य परीक्षण जावंक नाशिल्ल्यान परंपरीक चित्ररथांचेर अन्याय जाला. हातूंत राजकीय हस्तक्षेप जाल्ल्याचो गंभीर आरोप ‘गोवा कार्निव्हल फ्लोट मेकर्स समिती’न केला.
मडगांवां आयोजीत पत्रकार परिशदेंत राहुल परेरा, ऍड्रियन फर्नांडिस आनी परंपरीक चित्ररथ कलाकारांनी पर्यटन खात्याच्या नियोजनाचेर बोट दाखयलें.
राहुल परेरा हांणी सांगलें, फाटल्या २७ वर्सां सावन परंपरीक चित्ररथ तयार करतात. आमकां इनामां मेळटात. अंदूं कुडतर्यांं आनी कुडचड्यां खाजगी कार्निव्हलांत आमकां इनामां मेळ्ळीं. मात पर्यटन खात्याच्या पणजेचे मिरवणुकेंत निकालांत कोफुसांव जाल्ल्याचो दुबाव येता. चित्ररथ मिरवणुके मजगतीं पर्यटन खात्यान लायिल्ल्या व्हड संगीताक लागून चित्ररथांचें संगीत आयकूंक येनाशिल्लें. तशेंच, परीक्षकांचेय कले कडेनय पुरायेन आडनदर जाता. असो आरोप तांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
