पंंचायतींचेर भाजपाचेंच वर्चस्व

भांगरभूंय | प्रतिनिधी

मुख्यमंत्री डॉ. सावंत हांचो करिश्मा कायम, कांय पंचायतीनी प्रस्थापितांक धपको

पणजी : फाटल्या कांय वर्सांत जाल्ली विधानसभा पोटवेंचणूक, जिल्हो पंचायत वेंचणूक तशेंच विधानसभा वेंचणुके उपरांत ग्रामपंचायत वेंचणुकांत लेगीत मुख्यमंत्री डॉ. प्रमोद सावंत हांच्या नेतृत्वाचो करिश्मा दिसून आयला. भोवतेक पंचायतींनी भाजपाक स्पश्ट भोवमत मेळिल्ल्याचे शुक्रारा निकाला उपरांत स्पश्ट जालें.


गोंयांतल्या सगल्या 186 पंंचायतींचे निकाल जाहीर जाल्यात. मंंत्र्यांक आपल्या मतदारसंंघांतल्या पंचायतींचेर वर्चस्व दवरपाक येस आयलांं. भलायकी मंंत्री विश्वजीत राणे, पंचायत मंंत्री मॉवीन गुदिन्हो, पर्यटन मंंत्री रोहन खंवटे, कला आनी संंस्कृती खात्याचे मंत्री गोविंद गावडे हांंणी आपल्या मतदारसंघांतल्या पंचायतींचेर वर्चस्व राखपाक येस मेळयलांं.
आमदार जीत आरोलकार, विरेश बोरकार हांंकां लेगीत पंंचायतींचेर वर्चस्व दवरपाक येस आयलांं. मायकल लोबो तशेंच वीज मंंत्री सुदिन ढवळीकार हांंकां मात कळंंगूट तशेंच मडकय पंचायतीचेर वर्चस्व दवरपाक अपेस आयलांं. कळंंगूट पंचायतींत मायकल लोबो हांंचे 3 समर्थक उमेदवार वेंचून आयल्यात. जाल्यार जोसेफ सिक्वेरा हांचे 6 समर्थक उमेदवार वेंचून आयल्यात. मडकय पंचायतींत मगो समर्थक उमेदवार चार प्रभागांनी वेंचून आयल्यात. पांच प्रभागांनी अपक्ष उमेदवार वेंचून आयल्यात. पर्यटन मंत्री रोहन खंवटे हांंकां सुकूर, पेन्ह द फ्रान्स, साल्वादोर द मुंद पंचायतीचेर वर्चस्व राखपाक येस आयलांं. सुकूर, पेन्ह द फ्रान्स तशेंच साल्वादोर म मुंद पंचायतींचेर रोहन खवटे हांंचे समर्थक वेंचून आयल्यात. पेन्ह द फ्रान्स पंचायतींत 11 प्रभागांंतल्यान रोहन खंवटे हांचे 9 प्रभागांनी समर्थक वेंचून आयल्यात. वेलींग – प्रियोळ पंचायतींत कला आनी संंस्कृती खात्याचे मंत्री गोविंद गावडे हांचे 11 तल्यान 9 प्रभागांतले उमेदवार वेंचून आयल्यात. पंचायत मंंत्री मॉवीन गुदिन्हो हांचे बोगमाळो पंचायतीचेर वर्चस्व सिद्ध जालांं.
भलायकी मंत्री विश्वजीत राणे हांचे गुळेली, ठाणे पंचायतींत समर्थक उमेदवार वेंचून आयल्यात. ते भायर पर्ये मतदारसंंघांत लेगीत तांचे समर्थक उमेदवार वेंचून आयल्यात.
शुक्रारा सकाळीं 8 वरांचेर मतमेजणेक सुरवात जाली. मतमेजणी केंद्रा भायर निकाल जाणून घेवपाक बरीच गर्दी आशिल्ली. दनपारां मेरेन चित्र स्पश्ट जालें.
गोंयांतल्या 186 पंचायतीं खातीर बुधवारा शांतिकायेन 78.70 टक्के मतदान जालें. कळंगूटे प्रभाग 9त (खोब्रावाडो) दोन उमेदवारांच्या वेंचणूक चिन्नांत घोळ जाल्ल्यान आयोगान मतदान स्थगीत दवरपाचो निर्णय जालो. खोब्रावाडो – कळंगूटे प्रभाग 9 खातीर बिरेस्तारा मतदान जालें.
सत्तरी म्हालांत सगल्यांत चड 89.30 टक्के जाल्यार साश्ट म्हालांत सगल्यांत उणें 68.33 टक्के मतदान जालें. 2017त जाल्ले पंचायत वेंचणुकेंत 80.77 टक्के मतदान जाल्लें. फाटले वेंचणुके परस हे खेपे उणें मतदान जाल्लें.

186 पंचायतींच्या 1,464 प्रभागां खातीर बुधवारा मतदान जाल्लें. 7 लाख 96 हजार 70 नोंदणीकृत मतदारांतल्यान 6 लाख 26 हजार 496 मतदारांनी मतदान केलें. ही टक्केवारी 78.70 टक्के जाता.
उत्तर गोंयांत 81.45 टक्के जाल्यार दक्षीण गोंयांत 76.13 टक्के मतदान जालां. 64 उमेदवार विरोधाविणें वेंचून आयल्यात. वट्ट 1,517 मतदान केंद्रांचेर मतदान जाल्लें. दादल्या परस बायलां मतदारांची संख्या उत्तर गोंय तशेंच दक्षीण गोंयांत चड आशिल्ली. बायलांचें मतदान चड जाल्लें. 2,99,707 दादल्यांनी जाल्यार 3,26,788 बायलांनी मतदान केलें. दिवचल म्हालांतल्या नावेली पंचायतींत सगल्यांत चड 81.45 टक्के मतदान जालें. साश्ट म्हालांतल्या सार्झोरा पंचायतींत सगल्यांत उणें 60 टक्के मतदानाची नोंद जाल्ली.

मंत्री, आमदारांचें घरचे उमेदवार जैतिवंंत
मंत्री तशेंच आमदारांचे पूत, घरकान्न तशेंच चलयो जैतिवंंत जाल्यात. मायकल लोबो हांचो पूत डॅनिएल लोबो हो पर्रा पंचायतीच्या प्रभाग दोनांत जैतिवंंत जालो. सभापती रमेश तवडकार हांची घरकान्न सविता तवडकार पैंगीण पंचायतीच्या प्रभाग 9त जैतिवंत जाली. चर्चील आलेमांव हांंची चली रोशेल अालेक्स डिकॉस्टा वार्का पंचायतीची पंच म्हूण वेंचून आयल्या. बेतालभाटी पंचायतींत आदले मंत्री मिकी पाशेको हांची घरकान्न वायोला पाशेको वेंचून आयल्या.
प्रदेश भाजप अध्यक्ष सदानंंद शेट तानावडे हांचो भाव संंदीप तानावडे पिर्णा पंचायतींतल्यान वेंचून आयला. काँग्रेसीचे फुडारी सावियो डिसील्वा हांंची घरकान्न जोस्लीन डिसील्वा वेळ्ळी पंचायतीची पंच जाल्या. तशेंच राखी नायक ही नेत्रावळी पंचायतींतल्यान वेंचून आयल्या. राखी नायक ही शिवसेना तशेंच राष्ट्रवादी काँग्रेसीची पदाधिकारी आशिल्ली.

आदले मंत्री पांडुरंग मडकयकार हांंकां धपको
आदले मंत्री पांडुरंग मडकयकार हांंची चली सुहिरा मडकयकार हिका पोरणें गोंय पंचायतींत हार घेवची पडली. सँड्रा गोन्स्लावीस हिणें तिका हारयल्या. पांडुरंग मडकयकार हांची घरकान्न जनिता मडकयकार विधानसभेंत कुमारजुंवें मतदारसंंघांत हारिल्ली. आतां पंचायत वेंंचणुकेंत चलयेक हार घेवची पडल्या.

दवर्ली रुमडामळ पंचायतींत भाजपाक धपको
भाजपाचे म्हणयारे उर्फान मुल्ला हांंकां रूमडामळ दवर्ली पंचायतींत गोवा फॉरवर्डचे समर्थक उमेदवार उमराव पठाण हांणी हारयल्या. उर्फान मुल्ला हांणी काँग्रेसींतल्यान भाजपांत प्रवेश केल्लो.
प्रस्थापितांची हार
कासावली पंचायतीची चार खेपे सरपंच आशिल्ली मार्था साल्ढाणा हिका हार घेवची पडल्या. ते भायर कुठ्ठाळी पंचायतींत रेमंड डिसा, बोगमाळो पंचायतींत लक्ष्मण कवळेंकार हांकां हार घेवची पडल्या.
राज्यांतलो सगल्यांत जाण्टो पंच
दिवचल म्हालांत वन, मावळींगे पंचायतीच्या प्रभाग 6 मदीं भागो भैरो वरक हो 82 वर्सां पिरायेचो जाण्टेलो वेंचून आयला. ते ‘पगडी’ ह्या नांवान परिचीत आशिल्ले. फाटले पंचायत वेंचणुकेंत लेगीत ते वेंचून आयिल्ले. मुख्यमंत्री डॉ. प्रमोद सावंत तशेंच प्रदेश भाजप अध्यक्ष सदानंद शेट तानावडे हांणी तांकां परबीं भेटयल्या.


मुख्यमंत्री डॉ. सावंत म्हणटात….
– 186 पंचायतींतल्यान 150 परस चड पंचायतींनी भाजपाक स्पश्ट भोवमात मेळ्ळां. जाल्यार उरिल्ल्या पंचायतींतल्या 50 टक्क्यां परस चड पंच भाजपाचे आसात.
-लोकशायेचे नदरेन पंचायत वेंचणुको म्हत्वाचो आशिल्ल्यो. नव्या पंचांनी लोकशाय घटमूट करपाक पुराय यत्न करचे.
-गोंयांत भाजपाचे परतून सरकार स्थापन जाले उपरांत आपूण आत्मनिर्भर भारत-स्वयंपूर्ण गोंय मोहिमेचो दुसरो टप्पो सुरू केला. ग्रामीण वाठारांतल्या लोकां कडल्यान हे मोहिमेक उपाट प्रतिसाद मेळ्ळो. पंचायत वेंचणुकांनी भाजपाक मेळिल्ल्या येसांतल्यान ही मोहीम राज्यांत येसस्वी जाल्ल्याचे दिसून येता.

स प्रभागांनी ‘टाय’
-मांद्रें पंचायतींत प्रभाग पांचात किशोर शेट मांद्रेंकार आनी राजेश मांद्रेंकार हांकां समान मतां पडिल्ल्यान चिटये वरवीं जैतिवंताची निवड जाली. हातूंत राजेश मांद्रेंकार जैतिवंत थारले. केरींतल्या प्रभाग स त धरती नागोजी आनी रेश्मा सावळ हांचे मदीं ‘टाय’ जाली. हातूंत धरती नागोजी जैतिवंत जाली.
-उगेंतल्या प्रभाग 5त दिव्या नायक आनी संजना वडील हांकां समान मतां मेळ्ळीं. थंय दिव्या नायक जैतिवंत जाल्यो. उसकय -पालये-पुनोळा पंचायत प्रभाग 7त गौरवी मडगांवकार आनी गुरूदास गडेकार हांचे मदीं ‘टाय’ जावन गौरवी जैतिवंत थारल्यो.
-पर्येंतल्या प्रभाग 9त रती गांवकार आनी महेश गांवकार हांचे मदीं ‘टाय’ जावन रती गांवकार जैतिवंत थारल्यो. नावेलेंतल्या प्रभाग 8त मिंगेल कार्दोज आनी आलेक्स फर्नांडीस हांकां समान मतां मेळ्ळीं. थंय चिटये वरवीं निवड जाली. हातूंत मिंगेल कार्दोज जैतिवंत थारले