भांगरभूंय | प्रतिनिधी
पणजी: हिंदवी स्वराज्याचे संस्थापक छत्रपती शिवाजी महाराज हांचे जयंती निमतान बिरेस्तारा 19 वेर दिवचल म्हालांत कार्यावळीचें आयोजन समाजीक कार्यकर्ते चैतन्य मानकार हांणी कृष्णराव राणे आनी कृष्णा आरोलकार हांच्या पालवान केलें. शिवभक्तांच्या उत्स्फूर्त सहभागाक लागून पुराय वाठार शिवमय वातावरणान भारावन गेलो.
कार्यावळीची सुरवात सकाळीं 8 वरांचेर बोर्डे, दिवचले शांतादुर्गा हायस्कुला कुशीक शिवाजी महाराज्यांच्या पुतळ्यांक फुलांहार घालून केली. उपरांत लाटंबार्से पंचायत, दिवचल वाठारांत पदयात्रा काडली. हे यात्रेंत नागरिकांनी व्हड प्रमाणांत वांटो घेतलो. विशेश म्हणल्यार थळाव्या बायलांनी परंपरीक वेशभुशा करून दिंडी काडली.
ह्या वेळार बाबासाहेब राणे, महेश म्हांब्रे, त्रिशा के. राणे, कृष्णा आरोलकार, रवींद्र गांवस, वसंत गांवस, दीपक गांवस, कृष्णराव राणे, सुकडो गांवस, संतोष गांवस, रोहन गांवस, सूरज गांवस, गौरीश गांवस, देवेंद्र कुदव, प्रदोश वळवयकार, शुभम ठुबे, तिलक बोहोरा, आर्यन कांबळे, नकुल कांबळे आनी गोविंद केंद्रे आदीं मानेस्त हाजीर आशिल्ले.
मजगतीं, रातच्या 8.30 वरांचेर ‘रायगडाला जेव्हा जाग येते’ ह्या इतिहासीक नाटकाचो प्रभावी सादरीकरणान हाजीर आशिल्ल्यांक महाराजांच्या इतिहासाचो अणभव घडोवन हाडलो. गोंयांत महाराजांच्या तत्वांक पाळो दिवपी शिवमोगी आशिल्ल्यान तांणी ह्या कार्यावळीच्या आयोजनाक लागून आयोजकांचे उपकार मानले.
समाजकार्या खातीर सदांच तयार: मानकार
शिवाजी महाराजांचे कार्यावळीक हाजीर रावप हीच म्हजे खातीर म्हत्वाची आनी भाग्याची गजाल. हांव एक समाजीक कार्यकर्तो आशिल्ल्यान गोंयांतल्यो बायलो, विद्यार्थी आनी तरणाट्यांच्यो समस्या सोडोवपा खातीर आनी खंयच्याय प्रकारच्या समाजीक उपक्रमां खातीर सदांच तयार आसा. थळाव्या कलागुणांक वाव दिवपा खातीर आयज मेरेन आमी खूबश्या उपक्रमांचे आयोजन केलां आनी हाचे मुखारूय आमचो यत्न आसतलो अशें चैतन्य मानकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
