तोरशें-पेडण्यां भिरांकूळ अपघात; आवयक, पुताक जाग्यारूच मरण

अपघातांत सांपडिल्लीं वाहनां.

भांगरभूंय | प्रतिनिधी

एक जखमी, दोग जाण सुदैवान वाटावले

पेडणें: तोरशें-पेडण्यां सरकारी हायस्कुला मुखा वयल्या राष्ट्रीय म्हामार्गार भिरांकूळ अपघात जावन आवय आनी देड वर्साच्या पुताक जाग्यारूच मरण आयलें. जाल्यार तांची वावराडी गंभीर जखमी जाली. तिचेर बांबोळे गोमॅकाँत उपचार सुरू आसात.

सविस्तर म्हायती प्रमाण पुणेंचे पियुष गुंडे घरकान्न अपूर्वा (32) देड वर्साचो पूत, सात वर्साची धूव आनी तांची वावराडी पुण्या सावन एमएच 12 टीएस 8780 ह्या मोटारीन गोंया येतालीं. येता आसतना तोरशें हांगासरल्या सरकारी हायस्कुला मुखा वयल्या राष्ट्रीय म्हामार्गार भिरांकूळ अपघात जालो. ह्या अपघातांत अपूर्वा गुंडे आनी देड वर्साचो पूत हांकां जाग्यारूच मरण आयलें. जाल्यार वावराडी गंभीर जखमी जाली. ह्या अपघातांत पियुष गुंडे आनी सात वर्साची धूव सुदैवान वाटावली.

पियुष गुंडे राष्ट्रीय म्हामार्गार दनपारां 12 वरांचेर पावले तेन्ना केएल 10 एझेड 8096 हो नुस्तें व्हरपी ट्रक मुखा वयल्यान आयलो आनी दोनूय वाहनां मदीं भिरांकूळ अपघात जावन मोटारीचो चुरो जालो. ह्या अपघातांत आवयक, पुताक जाग्यारूच मरण आयलें. हो अपघात जालो तेन्ना दोनूय जखमींक वेळारूच आपत्कालीन सेवा उपलब्ध जावन वैजकी सेवा मेळिल्ली जाल्यार घडये हे दोनूय जीव वाटावतले आसले. अपघात जाले उपरांत एक वरा उपरांत 108 अ‍ॅम्ब्युलन्स घडणूक थळार आयली. ताचे पयलीं त्या दोगांकूय मरण आयिल्लें. जाल्यार जखमी जाल्ले वावराडेक पुलिसांनी आपल्या वाहनांतल्यान हॉस्पिटलांत व्हेले.

घडणुकेची म्हायती पेडणें पुलीस आनी मोपा विमानतळ पुलीस स्टेशनाक मेळटकूच मोपा विमानतळ पुलीस निरिक्षक महेश केरकार हांच्या मार्गदर्शना खाला पुलिसांनी घडणुकेचो पंचनामो केलो, आनी जखमीक बांबोळे उपचारा खातीर धाडून दिले. पियुष गुंडे आनी तांची सात वर्सांची धूव मात ह्या अपघातात सुदैवान वाटावली.

राष्ट्रीय म्हामार्गाचें ज्या दिसा सावन काम सुरू जालां त्या दिसा सावन तोरशें हायस्कूल वाठारांत व्हड प्रमाणांत अपघात जाल्यार. घडणुकेची म्हायती पेडणें उजो पालोवपी दळाक मेळटकूच दळाच्या जवानांनी जखमींक व्हड कश्टान मोटारींतल्यान भायर काडलीं.

तोरशें सरकारी हायस्कुला मुखा वयलो हो म्हामार्ग घातक स्थितींत आसा. कंत्राटदाराच्या हलगर्जीपणाक लागून ह्या रस्त्यार डिव्हायडर ना, कसलेच दिशा फलक नात. धोको दिवपी सुचोवणेचे तक्टे नात. रस्तो सामको मदींच खणून दवरला. तशेंच हायस्कुला कडेन वचपी रस्तो अर्दकुटे स्थितींत दवरला. दोनूय वटांनी राखणे वणतूय कंत्राटदारान अजून मेरेन बांदूंक नाशिल्ल्यान लोकांनी खर निरशेणी उक्तायल्या.