भांगरभूंय | प्रतिनिधी
अटल सेतू बंद केल्ल्यान येरादारी कोंयडेचें प्रमाण वाडलें
पणजी : स्मार्ट सिटीचीं कामां आनी सपाटी करणा खातीर अटल सेतू येरादारी खातीर बंद केल्ल्यान पणजे सयत पर्वरी वाठारांत येरादारीची कोंयडी जाली. पणजेंत ट्रॅफीक जॅम सदांच जाता, तरी सोमारा ट्रॅफीक जॅमाचें प्रमाण चड आशिल्लें. पणजेंत तशेंच पर्वरे वाहन चालकांचे हाल जाले.
सकाळ, दनपार तशेंच सांजेवेळार येरादारीची कोंयडी जाली. अटल सेतू पूल बंद केल्ल्यान सगली येरादारी पोरणें पुला वेल्यान सुरू जाली. हाका लागून सकाळीं तशेंच सांजवेळार पणजेंत तशेंच पर्वरे वाहनांच्यो रांगो लागल्यो. पणजेंत सांजेवेळा सांत इनेज चर्च, विवांता हॉटेल, कांपाल ते मिरामार रस्त्याचेर येरादारीची कोंयडी जाली. कांय जाणांनी दुचाकी पार्क करून चलत वचप पसंत केलें.
सकाळच्या वेळार पणजेंत विद्यार्थी तशेंच नोकरदार वर्ग कामा खातीर येतात. मडगांव, वास्को, फोंडें, म्हापशें, पेडणें, सांखळे अशा सगल्या वाठारांतल्यान लोक पणजेंत येतात. हाका लागून सकाळच्या वेळार वाहनांची गर्दी जाता. पणजी बस स्टॅण्ड, चर्च वाठार, कला अकादमी हांगा सकाळची येरादारीची कोंयडी जाताच.
अटल सेतूक लागून येरादारीच्या कोंयडेचें प्रमाण उणें जाल्लें. सपाटी करणा खातीर अटक सेतू बंद दवरपाचो निर्णय जाल्ल्यान येरादारीची कोंयडी जावपाचें प्रमाण वाडलें. सकाळच्या वेळार मांडवी पुलाच्या दोनूय वटांनी वाहनांच्यो रांगो लागल्यो. पर्वरे लेगीत व्हड प्रमाणांत ट्रॅफीक जॅम जालें. हॉटेल कुकीरो, तीन बिल्डींग तशेंच ट्रेनींग म्हाविद्यालय थांब्या कडेन गाडयांच्यो रांगो लागिल्ल्यो. वाहन चालक तशेंच सगले नागरीक सरकाराक, पणजी म्हापालिकेक दोश दिताले.
अटल सेतू बंद केल्ल्यान समस्या वाडली
अटल सेतू वेल्या रस्त्याचें सपाटीकरण आनी हेर कामां खातीर अटल सेतू बंद करपाचो आदेश उत्तर गोंय जिल्होधिकारी मामू हागे हांणी जारी केला. अटल सेतू बंद केल्ल्यान समस्या वाडल्या. स्मार्ट सिटीचीं कामां पुराय पणजेंत सुरू आसा. हाका लागून सकाळीं आनी सांजवेळा पणजेंत ट्रॅफीक जॅम जाता. अटल सेतू बंद जाल्ल्यान मांडवी पूल आनी पर्वरे वाहनांच्यो रांगो लागल्यो. म्हत्वाच्या कामा खातीर पूल उक्तो करपाक हरकत ना. अधिवेशना पयलीं पूल सुरू करपाची सुचोवणी जिल्होधिकाऱ्यांनी केल्या.
पणजेंत वाहनचालकांचे हाल
पणजी शारांत वाहन चलोवप म्हणल्यार एक सर्कसूच आसा. सगल्याक रस्ते खणून दवरिल्ल्यान सगल्या रस्त्यांचेर येरादारीची कोंयडी जाता. सांत इनेज सिग्नल, काकुलो मॉल, मिरामार, कांपाल वाठारांनी कोंयडीचें प्रमाण चड आसा. सांत इनेज चर्ची कडेन एके वटेनचो रस्तो खणून दवरला. हाका लागून अर्दो उक्तो रस्तो येरादारीक पावना. टेम्पो वा व्हडली गाडी आयली जाल्यार येरादारी ठप्प जाता. सांत इनेज सावन पणजी बस स्टॅण्डार वचपाक अर्द वरा परस चड वेळ लागतालो.
स्मार्ट सिटीच्या कामाक लागून समस्या : म्हापौर
पणजेंत स्मार्ट सिटीचीं कामां सुरू आसात. कांय कडेन गटारांचें काम सुरू आसा. कांय कडेन डांबरीकरण सुरू आसा. हाका लागून सगल्यांक थोडे दीस त्रास काडचे पडटले. येरादारीचे वेवस्थापन करपाचे आदेश पुलिसांक दिल्यात. स्मार्ट सिटी खाला कामां सुरू आशिल्ल्यान म्हापालिकेक हस्तक्षेप करपाक वाव ना अशें म्हापौर रोहीत मोंसेरात हांणी सांगलें.
अधिवेशना पयलीं पूल उक्तो करचो
स्मार्ट सिटीचीं कामां सुरू आसतना अटल सेतू बंद करपाक येरादारी पुलीस फांट्यान विरोध केल्लो. हो विरोध भायरावन जिल्होधिकाऱ्यांनी अटल सेतू बंद करपाक मान्यताय दिली अशें येरादारी पुलीस अधिक्षक बोसेट सिल्वा हांणी सांंगलें. अटल सेतू उक्तो करचो अशी मागणी करपी पत्र जिल्होधिकाऱ्यांक धाडलां. जिएसआयडीसीन अटल सेतूचें काम करपाक मान्यताय दिली. रस्ते ल्हान आनी वाहनांचो आंकडो चड आशिल्ल्यान येरादारी वेवस्थापन करप कठीण जालां अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
