जी- 20 बसकांचे तयारे विशीं प्रतिनिधी मंडळ समाधानी

जी -2 0 चें प्रतिनिधी मंडळ सोमारा मुख्यमंत्री डाॅ. प्रमोद सावंत हांकां मेळ्ळे तेन्ना.

भांगरभूंय | प्रतिनिधी

मुख्यमंत्री डाॅ. सांवत हांचे वांगडा जाली बसका

पणजी : जी – 20 च्या गोंयांतल्या बसकांची तयारी योग्य मार्गाचेर आसा. हे तयारेचो नियाळ घेवपाक जी -20 चें प्रतिनिधी मंडळ गोंयांत आयिल्लें. तांणी मुख्यमंत्री प्रमोद सावंत हांची भेट घेवन तयारे विशीं समाधान उक्तायलें.

ह्या मंडळांत मुख्य समन्वयक हर्षवर्धन शृंगला, पर्यटन मंत्रालयाचे सचीव अरविंद सिंह आनी हेर प्रतिनिधी आशिल्ले.

जी- 20 परिशदे खाला गोंयांत आठ बसका आयोजीत करतले. हातूंत दोन मंत्री पांवड्या वयल्यो तशेंच 6 हेर बसका आसतल्यो. फुडल्या चार म्हयन्यांत त्यो जातल्यो. पयली बसका आंतरराष्ट्रीय भलायकी अधिकारी आनी प्रतिनिधींचे उपस्थितींत जातली. 17 ते 19 एप्रील मजगतीं भलायकी मळा वयल्या कार्यगटाची दुसरी बसका बांबोळे जातली. तिसरी विकास कार्यक्षेत्रा विशीं आसतली. ती बसका 9 आनी 10 मेक गोंयांत जातली. तिचें थळ फुडल्या कांय दिसांनी थारतलें. जूनांत तीन बसका जातल्यो. ह्या पांवड्याची सुरवाात आंतरराष्ट्रीय वित्त रचणूक कार्यगटाचे बसकेन जातली. ती 5 ते 7 जून मजगतीं जातली. जाल्यार 12 ते 14 जून मेरेन गोंयांत एसएआय 20 परिशद जातली. पर्यटन मंत्री पांवड्या वयली बसका आनी उपरांत पर्यटन मळ कार्यगटाची चवथी बसका 19 ते 22 जून मजगतीं जातली. मागीर जुलयांत उर्जा मळाच्या कार्यगटाची बसका जातली. ताचे उपरांत उर्जा मंत्रीगटाची दुसरी बसका जावपाची आसा.

आयज जाल्ले नियाळ बसकेंत मुख्यमंत्री डाॅ. प्रमोद सावंत हांचे सयत जी 20 परिशद आयोजन समितीचे मुख्य समन्वयक हर्षवर्धन श्रृंगला, केंद्रीय पर्यटन सचीव अरविंद सिंह हे हाजीर आशिल्ले. तांणी बसकांचे तयारेचो नियाळ घेतलो.

हें प्रतिनिधी मंडळ गोंयांतल्या विविध परिशदांक हाजिरी लायतले. तशेंच आग्वाद किल्लो, सां कॅथेड्रल आनी हेर म्हत्वाच्या इतिहासीक थळांकूय भेट दितले. गोंयच्या संस्कृतीचो अणभव घेवपाक सांस्कृतीक कार्यावळी आनी उपक्रमांकूय ते भेट दितले.

आयचे बसकेंत डाॅ. सावंत हांणी पुनर्विचार आनी पुनःप्रक्रिया करून तयार केल्ल्या उत्पादनांच्या सादरिकरणांतल्यान शाश्वत विकास हे संकल्पनेचें म्हत्व आनी प्रसार करपाचो मुद्दो मांडलो. ह्या प्रतिनिधी मंडळान जी- 20 प्रतिनिधीक क्रुझ पर्यटनाचो प्रसार करपाक मेजवानी उपक्रम आयोजीत करपाची इत्सा उक्तायली.

गोंयांतल्या बसकांचे तयारेचो भाग म्हणून गोंय संस्कृती, दायज आनी शाश्वत पर्यटनाचो प्रसार करपाच्या उपक्रमांचो आस्पाव करपाचें आश्वासन डाॅ. सावंत हांणी दिलें.