भांगरभूंय | प्रतिनिधी
थळाव्यां मदीं भिरांतीचें वातावरण
वाळपय: चरावणें-ठाणें-सरवणें मार्गार गवे बिबट्यांची हालचाल फाटल्या कांय म्हयन्यांत खूब वाडिल्ल्यान गांवांतल्या लोकां मदीं भिरांतीचें वातावरण पाळ्ळां. कांय दिसां आदीं ह्या मार्गार बिबट्याच्या हल्ल्यांत यशवंत गांवस हांकां मरण आयले उपरांत वाठारांत हुस्क्याचें आनी भिरांतीचें वातावरण चड खर जालां.
रान खात्यान बेगोबेग परिस्थिती कडेन लक्ष दिवन गवे आनी बिबट्यांचेर नियंत्रण दवरचें अशी मागणी गांवकारांनी केल्या. तशेंच राज्याचे रानां मंत्री विश्वजीत राणे आनी थळाव्यो आमदार डॉ. देविया राणे हांणी गंभीर परिस्थिती कडेन लक्ष दिवचें अशी मागणी नेट धरीत आसा.
ज्या वाठारांत गव्यांचो वावर दिसता त्याच वाठारांत बिबट्याचेंय दर्शन जायत आशिल्ल्याचें नागरिकांचें म्हणणें आसा. यशवंत गांवस हांचेर जाल्ल्या हल्ल्या उपरांत भिरांतीचें प्रमाण वाडलां आनी दीसपट्ट्या कामा खातीर प्रवास करपी ग्रामस्थां मदीं असुरक्षीतयोची भावना निर्माण जाल्या.
मजगतीं, आदले मुख्यमंत्री प्रतापसिंह राणे हांणी यशवंत गांवस हांच्या कुटुंबाची भेट घेवन सांत्वन केलें तशेंच ग्रामस्थां कडेन चर्चा करतना रानां खात्यान ताकतिकेन उपाय काडप गरजेचें आशिल्ल्याचें मत उक्तायलें. तशेंच नागरिकांनी ह्या मार्गा वेल्यान प्रवास करतना चड जतनाय घेवची अशें आवाहनूय केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
