भांगरभूंय | प्रतिनिधी
मडगांव : घोगळ हावसिंग बोर्ड कडेन एका फ्लॅटांत शॉर्टसर्किट जाल्ल्यान उजो लागलो. मडगांव उजो पालोवपी दळान उज्यांत आडकल्ल्या दोगां भावंडांक दार मोडून भायर काडलीं. हातूंत सुमार देड लाखांचें लुकसाण जालें.
मेळिल्ले म्हायती प्रमाण, मडगांव घोगळांतल्या हावसिंग बोर्ड दत्तमंदिरा लागसारचे बीआर एन्क्लेव्ह इमारतींतल्या देशमुख हांच्या फ्लॅटाक उजो लागपाची घडणूक घडली. शेनवारा सांजेवेळार उसरा हो उजो लागलो. देशमुख हांच्या फ्लॅटांत प्रवेशद्वारावेले एसीक हो उजो लागलो. एसी आनी प्लास्टीक विरगळून सकयल पडून उज्यान पेट घेतलो. ह्या वेळार फ्लॅटांत देशमुख हांची भुरगीं मंथन (२१) आनी समिथा (१६) हीं भितर आडकून उरलीं. हो उजो लागिल्ल्याची म्हायती मडगांव उजो पालोवपे दळाक मेळटाच ते रोखडेच घडणुके सुवातेर पावले. लायट बंद केले उपरांत उज्याचेर उदकाचो फवारो मारलो. उपरांत उजो पालोवपी दळाच्या जवानांनी दार मोडून फ्लॅटांत प्रवेश केलो आनी त्या दोगांय भावंडांक भायर काडलीं.
हो उजो शॉर्टसर्कीटाक लागून लागिल्ल्याचो अदमास आसा. हातूंत लायटीच्यो वायरी आनी हेर सामान जळून सुमार देड लाखांचें लुकसाण जालें. उजो पालोवपी दळाक सुमार २० लाखांची मालमत्ता वाचोवपाक येस आयलां. मडगांव उजो पालोवपी दळाचेर जवान अनुष्ठा ताटे, डी. आर. खांडेपारकार, आर. जी. नायक, आनंद मिशाळ हांणी हो उजो नियंत्रणांत हाडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
