भांगरभूंय | प्रतिनिधी
वाडटे बेरोजगारीक सरकारूच जापसालदार नाः मुख्यमंत्र्यांचो दावो
पणजी : गोंयांत जे बेरोजगार आसात, ताचे मदीं 70 टक्के पदवीधर आसात. बीए, बीकॉम, बी.एससी सयत कांय अभियंते लेगीत बेरोजगार आसात. गोंयांत बेरोजगारीचें प्रमाण 13 टक्के आशिल्ल्याचो अहवाल कांय दिसां पयलीं जाहीर जालां. बेरोजगारीचें प्रमाण वाडपाक फक्त सरकार जापसालदार आसा व्हय? हाचो विचार करपाची गरज मुख्यमंत्री डॉ. प्रमोद सावंत हांणी उक्तायल्या.
बाबासाहेब आंबेडकर आनी ज्योतिबा फुले हांणी बायलांच्या शिक्षणा खातीर उर्बा दिली. त्या वेळार बायलांचें शिक्षण ही काळाची गरज आशिल्ली. आतां कुशळटायेचें शिक्षण ही गरज आसा. बेरोजगारीचें प्रमाण उणें करपाक प्रधानमंत्री नरेंद्र मोदी हांणी देशांत कुशळटायेचेर भर दिवपी शिक्षण पद्दत सुरू केल्या, अशें मुख्यमंत्री डॉ. प्रमोद सावंत हांणी सांगलें.
पणजे एका हॉटेलांत विद्या प्रबोधिनी शिक्षण संस्थेन आयोजीत केल्ले परिशदेंत मुख्यमंत्री उलयताले.
नॅक ही संस्था 1994 वर्सा सुरू जाली. उंचेल्यो शिक्षण संस्था तशेच विद्यापिठांतल्या सुविधांची पळोवणी करून मानांकन दिवपाचें काम ही संस्था करता. गोंयांत 64 उच्च शिक्षण संस्था आसात. हाचें मदीं फक्त 26 संस्थांक नॅकचें मानांकन मेळ्ळां. राज्यात शिक्षणीक सुविधा तयार जावपाची गरज आसा.
मिरामार हांगा राष्ट्रीय जलक्रीडा संस्था स्थापन जाल्या. हे संस्थेंत प्रवेश घेवपी गोंयकारांचें प्रमाण 25 टक्क्यां परस चड ना. 2014 वर्सा आपूण साई इन्स्टिट्यूट स्थापन केल्ले. ह्या संस्थे वरवीं वैजकी उपाचारा संबंदान पदविका अभ्यासक्रम सुरू केलें. 800 विद्यार्थ्यां मदीं 750 प्रशिक्षीत विद्यार्थी आतां नोकरी करतात. हॉस्पिटॅलिटी क्षेत्रांत आतां हजारांनी नोकऱ्यो तयार जातल्यो. ह्या नोकऱ्यांचो लाव घेवपा खातीर पर्यटन, हॉटेल वेवस्थापन, पर्यटन गायड ह्या क्षेत्रांत कुशळ मनीसबळ तयार जावपाची गरज आसा. कुशळटाय अभ्यासक्रम सुरू करपा खातीर करण बजाज हांची सल्लागार म्हूण नेमणूक जाल्या.
आयुष हॉस्पिटलाचें 11 डिसेंबराक प्रधानमंत्री नरेंद्र मोदी हांचें हस्तुकीं उक्तावण जातलें. हे संस्थेंत आयुर्वेदाचें पदवी आनी पदव्युत्तर अभ्यासक्रम सुरू जातलें. अभ्यासक्रमाच्यो 50 टक्के जागे गोंयच्या विद्यार्थ्यां खातीर राखून दवरल्या. गोंयच्या विद्यार्थ्यांनी ह्या जाग्यांचो लाव घेवपाक जाय. राज्यांत खेळां विद्यापीठ स्थापन करपाचोय विचार सुरू आसा.
मोपा विमानतळा सयत जुवारी पुलाचें काम लेगीत पुराय जाता. मुळाव्यो सुविधा उबारपाक सरकाराचे सर्वोच्च प्राधान्य आसा. गोंय हे नामनेचे पर्यटन थळ आशिल्ल्यान दिसान दीस पर्यटकांचो आंकडो वाडत रावतलो. हाका लागून हॉस्पिटॅलिटी क्षेत्रांत हजारांनी रोजगार तयार जातले. रोजगार निर्मिती खातीर प्रधानमंत्री नरेंद्र मोदी हांणी 2014 वर्सा स्कील इंडिया मोहीम सुरू केल्या. गोंय लेगीत ही मोहीम फुडें व्हरता, अशें मुख्यमंत्री डॉ. प्रमोद सावंत हांणी सांगलें.
कुशळटाय शिक्षणाक पर्याय ना
राज्य सरकारान तरेकवार कुशळटाय अभ्यासक्रम सुरू केल्यात. राज्यांत एनआयटी, आयआयटी, बिट्स पिलानी अशो संस्था सुरू जाल्यात. ते भायर आतां संवसारीक कायदो विद्यापीठ, फॉरेन्सीक विद्यापीठ, शेतकी म्हाविद्यालय सुरू जालां. उंचेले शिक्षण संचालनालय तशेंच तंत्रीक शिक्षण संचालनालयान तरेकवार संस्थां कडेन कुशळटाय शिक्षणा खातीर कबलाती केल्यात. योगा थेरापिस्ट पदां खातीर 25 पदांची जायरात प्रसिद्ध जाल्ली. पूण फक्त 3 पात्र उमेदवार राज्यांत मेळ्ळे. पंचकर्म थेरापिस्ट पदा खातीर लेगीत गोंयांत उमेदवार उपलब्ध जायनात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
