भांगरभूंय | प्रतिनिधी
आयज देशांतले १३५ कोटी लोक हुतात्म्यांक लागून मुक्तपणान स्वास घेतात. बऱ्याच क्रांतिकारी, महापुरुसांच्या निसुवार्थी वावर, यत्न आनी बलिदानाक लागून 1947 वर्सा भारत स्वतंत्र जालो. क्रांतीकारांनी कसलोच सुवार्थ बाळगिनास्तना, पुरस्कारांची, मानधनाची अपेक्षा धरिनासतना आपल्या कुटुंबा कडेन आडनदर करून, करियर पणाक लावन, जीव धोक्यांत घालून स्वतंत्र भारताची मशाल 1947 वर्सा पेटयली.
1928 वर्सा इंग्लंडा सावन सायमन कमिशन नांवाचें एक शिश्टमंडळ भारतांत आयलें. कारण तांकां भारतांतल्या घडामोडींचो अभ्यास करपाचो आसलो. तेन्ना लाला लजपतराय हांणी फुडाकार घेवन ‘Simon go back’ची घोशणा दिली. सगळ्या भारताक तांणी एकठांय हाडलो. ही गजाल सायमन कमिशनाच्या अधिकाऱ्याक पचली ना. फुडाऱ्यां खाला हजारांनी निदर्शक जमले. हाका लागून सायमन आयोग कुलकुल्लो. भियेलो. जॅम्स स्काॅट हांणी गर्दी धांवडावपाक लाठीचार्ज करपाचो आदेश दिलो. लाला लाजपत राय जखमी जाले आनी तातूंतच तांकां 17 डिसेंबर 1928 दिसा मरण आयलें. तांच्या मरणाक लागून पुराय भारत दुख्खाचें ल्हार पातळ्ळें.
भगतसिंह, राजगुरू आनी सुखदेव हांकां हें दुख्ख पळोवं नज जालें. तांकां भिरभिरी मारली. तांणी लाला लजपतराय हांच्या मरणाचो बदलो घेवपाचें थारायलें. लाला लजपतराय हांच्या मरणाक जापसालदार आशिल्लो अधिकारी स्काॅट हांकां जिवेशीं मारपाचें तांणी थारायलें. लालांच्या पयल्या म्हयन्याळ्या श्राद्धाच्या दिसा भगतसिंह, राजगुरू आनी सुखदेव वेशभूषा करून स्काॅटाच्या राबित्यांत गेले. तो दिसतकच सुखदेवान सिनाल केलें. ते बरोबर भगतसिंह आनी राजगुरू हांणी एकाच वेळार फारपेट केलो आनी थंयच्यान फुज्ज्यो काडल्यो. तो अधिकारी आक्ताक मेलो. पूण तो अधिकारी जाॅन सँडर्स आशिल्लो. ब्रिटीशांनी तिगांयकूय धरपाचे खर यत्न करपाक सुरवात केली.
भूमिगत जाल्ल्यान तिनूय क्रांतीकारी जायते दीस ब्रिटीशांक मेळ्ळे नात. पूण कोणे तरी फितुरी केल्ल्यान ते सांपडले. त्याच काळांत तांणी एसंब्लींत पत्रकां, बाँम्बूय उडयिल्ले. सँडर्स हांची हत्या केल्ले खातीर २३ मार्च 1931 दिसा भारत मातेच्या तिनूय पुतांक ब्रिटीशांनी लाहोराक फांशी दिली. सगळो देश स्तब्ध जालो आनी सगळे कडेन शोक पातळ्ळो. भारताच्या स्वातंत्र्या खातीर आपलो जीव दिवपी ह्या तीन पुतांक कोणूच विसरचो ना.
हुतात्मा जाल्ले तेन्ना भगतसिंग सांधू ( 23, जल्म – बंगाय, सध्या पाकिस्तान) सुखदेव थापर (23, जल्म- लुधियाना) आनी शिवराम हरी राजगुरू (22, जल्म- खेड- महाराष्ट्र) हे सामके तरणाटे आशिल्ले.
भगतसिंह, राजगुरू आनी सुखदेव हांचो बलिदान पळोवन 135 कोटी लोकांक आयजूय राग येता. पूण, 95 टक्के राजकी फुडारी हुतात्म्यांक विसरले, अशें दिसता. देशाचे उदरगती परस ते स्वताचे उदरगती कडेन चड लक्ष दितात. लोकांच्या हिता खातीर सगळी शक्त वापरले बगर हुतात्म्यांच्या आत्म्याक शांतताय मेळची ना, हें आयच्या फुडाऱ्यांनी मतींत दवरचें.
क्रांतीकारी, हुतात्मे हांसत हांसत फांसार चडले, कारण तांचो एकूच हेतू आशिल्लो. मातृभूमीची राखण करून सामान्य लोकांक न्याय मेळोवन दिवप आनी भारताच्या स्वातंत्र्या उपरांत सुख आनी शांतताय निर्माण करप. पूण आयचे राजकी फुडारी ‘लोकांक सांगतात ब्रह्मज्ञान आनी स्वता सुकें पाशाण’ हाकाच लागून मुठभर राजकी फुडारी ह्या शेतीप्रधान देशांत लक्ष्मीपुत्र जाल्यात. आजचो राजकी फुडारी पांच वर्सां लोकांचो प्रतिनिधी जाता, पूण त्या पांच वर्सांनी तो ‘लक्ष्मीकांत’ जाताच. कितें म्हणचें हांचे देशसेवेक? गिरेस्त लोक दिसानदीस गिरेस्त जावपाक लागल्यात आनी सामान्य मनीस, शेतकार गरिबींत मुंगरत आसात. हाची जाण राजकी फुडाऱ्यांनी दवरून देशसेवेचेर आनी लोकसेवेचेर लक्ष केंद्रीत करचें. राजकी फुडाऱ्यांक खंयचेच लढायेचेर वचपाची गरज ना. लोकसेवा योग्य रितीन करची. तेन्नाच हुतात्म्यांच्या आत्म्याक शांती मेळटली.
राजकी फुडाऱ्यांनी खंयचेंय काम करतना हुतात्म्यांचो आदर्श घेवचो आनी हुतात्म्यांचें बलिदान फुकट वच्चें ना, हाची जतनाय घेवची. हे भारत मातेच्या शहिद पुतांनो, हांव तुमकां प्रणाम करतां. जब तक सूरज चांद रहेंगा, तब तक शहिदों का नाम रहेंगा”. जय हिंद!
रमेश लांजेवार,
9921690779
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
