भांगरभूंय | प्रतिनिधी
मुख्यमंत्रीः सरकारी कर्मचारी संघटणेक घेतले विस्वासांत
भांगरभूंय I प्रतिनिधी
पणजी : गोंय सरकारी कर्मचारी संघटणेचे मागणे प्रमाण तीन म्हयन्यांची नोटीस दिवनूच कामचुकार सरकारी कर्मचाऱ्यांक सक्तीची निवृत्ती दितले. हे विशींचे सगले निर्णय सरकारी कर्मचारी संघटणेक विस्वासांत घेवनूच घेतले, अशें मुख्यमंत्री डॉ. प्रमोद सावंत हांणी सोमारा पत्रकारां कडेन उलयतना स्पश्ट केले.
कामांत घाळपणां, कामचुकारपणा करपी तशेंच बरी कामगिरी नाशिल्ल्या सरकारी कर्मचाऱ्यांक सक्तीन निवृत्ती दिवपाच्या एफआर 56 (जे) ह्या कलमाची राज्य सरकारान राज्यांत अंमलबजावणी सुरू केल्या. सरकाराच्या ह्या निर्णयाक लागून सरकारी कर्मचाऱ्यां मदीं हुस्को निर्माण जाला. जाल्यार अखील गोंय सरकारी कर्मचारी संघटणेन सरकाराच्या ह्या निर्णयाक येवकार दिला. पूण प्रामाणिकपणान काम करपी कर्मचाऱ्यांक ह्या निर्णयाचो फटको बसचो न्हय, हे खातीर कर्मचाऱ्याक सक्तीन निवृत्त करपा पयलीं तीन खेपे ‘कारणां दाखय’ नोटीस दिवची. संबंदींत कर्मचाऱ्याची बाजू आयकून घेवनूच ताचेर योग्य तो निर्णय घेवचो, अशी मागणी सरकारी कर्मचारी संघटणेन केल्या.
जे सरकारी कर्मचारी कामचुकार आसात, कामांत घाळपणां करतात, तांकां सक्तीन निवृत्त करचें. पूण तांकां तीन खेपे चूक सुदरपाची संद दिवची. तशेंच हे विशीं निर्णय घेवपी समितीन तांची बाजू आयकून घेवची.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
