भांगरभूंय | प्रतिनिधी
धनयांनी उक्तायलो घातपाचो दुबाव; लाखांनी रुपयांचें लुकसाण
पणजीः काकरा बांबोळी दर्यावेळेर उजो लागून पांच नुस्तेमारी व्हड्यांचो गोबर जालो. सोमारा फांतोडेर ही घडणूक घडली. एक नुस्तेमार फांतोडेर 4 वरांचेर नुस्तेमारी खातीर वतना ताका उजो लागिल्लो दिसलो अशें थळावो पंच वांगडी संदीप सावंत हांणी सांगलें. ताणें उदक घालून उजो पालोवपाचो यत्न केलो. उपरांत उजो पालोवपी दळाक उज्याची म्हायती दिली. मात तो मेरेन व्हड्यांचो गोबर जाल्लो अशें तांणी सांगलें.
उजो लागलो काय लायलो हें मात कळपाक शकलें ना. उज्यांत व्हडीं तशेंच जाळां लासून गेलीं. कितल्या रुपयांचें लुकसाण जालें तें सांगप कुस्तार आसा अशें सावंतान सांगलें. व्हड आकाराच्या व्हड्याचें मोल सुमार 2 लाख आसा. ल्हान व्हड्याचें मोल ताचे परस उणे आसता. जाळाक 10 ते 50 हजार रुपया पडटात अशी म्हायती तांणी दिली.
उजो कसो लागलो हे जरी स्पश्ट जावंक नासलें तरी घातपाताचो दुबाव व्हड्यांच्या धनयांनी उक्तायला. आगशी पुलिसांनी अनवळखी मनशां आड गुन्यांव नोंद केला. उजो लागिल्ल्या व्हड्यांतलीं दोन व्हडीं लांकडाच्यो आनी दोन फायबराच्यो आसात. तणाक उजो लागून तो व्हड्यां मेरेन पावलो असो अदमास आसा. दर्यावेळेर आनिकूय व्हडीं आशिल्लीं. तेन्ना फक्त पांच व्हड्यांक उजो कसो लागलो असो व्हड्यांच्या धनयाचो प्रश्न आसा.
पंच वांगड्यांची अर्थीक मजत
सान्ता क्रुझची सरपंच जेनिफर ऑलिव्हिएरा, उपसरपंच डॉमनीक परेरा हांणी काकरा दर्या वेळेर वचून घडणुकेची पळोवणी केली. लुकसाण जाल्ल्या नुस्तेमारांक आपल्या पंगडांतले आठ पंच वांगडी म्हयन्याचो पगार अर्थीक मजत म्हणून दितले अशें डॉमनीक परेरा हांणी पत्रकारांक सांगलें. जिल्होधिकारी, नुस्तेमारी खात्याक नुस्तेमारांक बेगोबेग मजत दिवची अशें आमी केल्या अशी म्हायती दितना उजो लागलो काय लायलो हे पुलिसांनी सोदून काडचें अशी मागणी तांणी केल्या. लुकसाण जाल्ल्यांक अर्थीक मजत दिवपाची तजवीज पंचायतीच्या बजेटांत करतले अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
