भांगरभूंय | प्रतिनिधी
वेर्णे उद्देगीक वसणुकेंतल्या प्लॉटांची पावणी 1 जानेवारी पसून सुरू
पणजी ः उद्देगीक उदरगत म्हामंडळान उद्देगां खातीर ‘ओपन’ पोर्टल सुरू केलां. राज्यांतल्या उद्देगांनी 1 जानेवारी 2025 पयलीं पोर्टला खातीर जाय आशिल्ली म्हायती दिवची. अशें करुंक ना जाल्यार ऑनलायन सेवा मेळची ना अशें म्हामंडळाचे अध्यक्ष आमदार आलेक्स रेजिनाल्ड हांणी स्पश्ट केलें. शेनवारा पणजेत जाल्ले पत्रकार परिशदेंत ते उलयताले. ह्या वेळार उद्देग खात्याचे संचालक प्रवीण अभिषेक हाजीर आशिल्ले.
10 नोव्हेंबराक ओपन पोर्टल सुरू केलां. हाचे वरवीं उद्देगांक जाय आशिल्ले वेगवेगळे परवाने आनी हेर सेवा ऑनलायन उपलब्ध आसा. प्लॉटांची पावणी आनी म्हामंडळान केल्ल्या हेर प्रक्रियांनी पारदर्शकता हाडपा खातीर आमी ऑफलायन पद्दत बंद करून ऑनलायन पद्दत सुरू केल्या. हाचे वरवीं प्रशासकीय हस्तक्षेप उणो करपाचो हो आमचो यत्न आसा. पोर्टला वरवीं म्हायती सगळ्यांक उपलब्ध करून दिल्या अशें रेजिनाल्ड हांणी सांगलें.
पूण, आतां मेरेन राज्यांतल्या 3060 उद्देगांतल्यान फकत 1964 उद्देगांनी ह्या पोर्टला खातीर म्हायती दिल्या. आनी तातूंतल्यान फकत 615 उद्देग ह्या पोर्टलाचेर लायव्ह दिसतात. हाचे आदीं आमी कोविड काळांत राज्यांतल्या उद्देजकांक माफी येवजण सुरू केल्ली. ते उपरांत एक्झिट येवजण चालीक लायली. मुळाव्यो सेवा दिवपा खातीर 132 प्रकल्प हातांत घेतल्यात अशेंय रेजिनाल्ड हांणी सांगलें.
राज्यांतल्या वेगवेगळ्या उद्देगां विशीं, तांचे उत्पादन आनी कामगारांची वेगवेगळी म्हायती ओपन पोर्टलाचेर दिल्या अशें प्रविमल अभिषेक हांणी सांगलें. उद्देगधंद्यांक समर्पीत केल्लें हें देशांतलें पयलें ओपन सोर्स सॉफ्टवेअर आसा. हाचे वरवीं उद्देगां कडेन संबंदीत सगळ्यो सेवा ऑनलायन उपलब्ध केल्यात. प्लॉटांची पावणी, परवानो वा हेर शुल्क भरप, बांदकाम येवजणेक ऑनलायन मान्यताय अशो सेवाय ह्या पोर्टलाचेर उपलब्ध आसात.
1 जानेवारीच्यान प्लॉटांची पावणी…
वेर्णे उद्देगीक वसणुकेंतल्या 20 प्लॉटांची पावणी 1 जानेवारीच्यान सुरू जातली. हाचे भायर राज्यांतल्या हेर 9 सुवातींनीय वेवसायीक प्लॉटांची पावणी जातली अशी म्हायती आलेक्स रेजिनाल्ड हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
