भांगरभूंय | प्रतिनिधी
शेतकी खात्याच्या अधिकाऱ्याची म्हायती
पणजीः सद्या आंब्याचो हंगाम बरे तरेन सुरू आसा. पिकाक सद्या तरी कसलोच फटको बसूंक ना. बऱ्या दर्जाचें पीक तयार जावन एप्रील मेरेन आंबो तयार जावये अशें शेतकी खात्याच्या वरिश्ठ अधिकाऱ्यान सांगलें.
सद्या गोंयच्या वेगळ्या वेगळ्या वाठारांनी आंबे तयार जावपाक सुरवात जाल्या. तशेंच काय आंब्यांचो चंवर अजून उरला. सद्या तोरां ही व्हड प्रमाणांत तयार जावन बाजारांत लेगीत दाखल जाल्यात. ते भायर मानकुराद आंबो सारखो तयार जावन बाजारांत कांय प्रमाणांत दिश्टी पडिल्लो. पूण ताचे दर स हजार रुपया डझन म्हळ्यार एक आंबो रु. 500 इतल्या दरांत विकताले.
हे विशीं अदीक म्हायती दितना शेतकी खात्याच्या वरिश्ठ अधिकाऱ्यान सांगलें, आंब्याचो हंगाम खूब बरो चल्ला आनी फुडाराक पीक बरें मेळपाची आस्त आसा.
आमी सद्या आंब्याच्यो बागायती रेनाक काडल्यात आनी ज्या लोकांनी ती रेनाक घेतल्यात तांणी अंदूंचें पीक बरें येतलें म्हूण विस्वास उक्तायला. जितली बागायती आमी रेनाक काडल्यात तातूंतल्यान आमकां बरो दर फावो जाला. पिकाक अजून मेरेन कसलोच फटको बसूंक ना. देखून फुडाराक व्हड प्रमाणांत पीक तयार जावपाची शक्यताय आसा, अशें अधिकाऱ्यान सांगलें.
आंबे अजून मेरेन व्हड प्रमाणांत लागपाक सुरवात जाल्या. आतां मात्शें मात्शें धरपाक लागल्यात आनी कांय कडेन जून जाल्यात. एप्रील मेरेन वेवसायीक रितीन आंबे बाजारांत येवपाक सुरवात जातली. सद्या बाजारांत कांय प्रमाणांत आंबे येवपाक लागल्यात. पूण एप्रील सावन आंबे व्हड प्रमाणांत मेळटले अशें अधिकाऱ्यान म्हणलें.
आमचें आंब्याच्या बागायतीचें विश्लेशण करप सुरू आसा. शेतकी खात्याच्यो स बागायती आसात. तातूंत कुळें, केरी, म्हापशें, पेडणें, वाळपय आनी मडगांव ह्या वाठारांचो आस्पाव आसा. सद्या कुळें बागायतीक निकतोच चंवर फुटिल्ल्यान कुळें सोडून सगल्या बागायतींची पावणी करून ती रेनाक काडल्यात अशी म्हायती अधिकाऱ्यान दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
