भांगरभूंय | प्रतिनिधी
फोंडें, प्रतिनिधी : उसगांवच्या पोरण्या पुलार सध्या कमानी जोडणी केल्ले सुवातेर व्हड फोंडकुलां पडिल्ल्यान गाडयांच्या ड्रायव्हरांत बरेच त्रास सोंसचे पडटात. खासा करून हांगाच्यान विध्यार्थ्यांक घेवन वचपी दुचाकी चालकांक धोको निर्माण जाला. बांदकाम खात्यान बेगीनूच हीं फोंडकुलां पुरोवपाची मागणी थळावे करतात.
पोरण्या पुलार सध्या दिसपी फोंडकुलां दुचाकी चालकां खातीर धोक्याचे जाल्यात.
पुलाच्या कमानी जोडिल्ले सुवातेर पडिल्ल्या फोंडकुलांक लागून अपघाताची शक्यताय वाडल्या. ह्या वाठारांत आशिल्ल्या हायस्कुलांतल्या विद्यार्थ्यांक पालक दुचाकी वेल्यान घेवन गेल्ल्यान अपघाताची शक्यताय आसा. तशेंच चारचाकी गाडयांकूय ह्या फोंडकुलांचो त्रास सोंसचो पडटा. तशेंच भामय आनी उसगांव वाठारांतले लोक ह्या पुला वेल्यान चलत यो- वच करतात. ह्या पुलार कसलीय व्हड घडणूक घडचे पयलीं पुलाचें डांबरीकरण करपाची मागणी थळावे करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
