भांगरभूंय | प्रतिनिधी
कुशळटाय उदरगत संचालनालयाची येवजण
पणजी : अभ्यासांत लक्ष लागपा सयत करियरांत येसस्वी जावपा खातीर आयटीआय विद्यार्थ्यांचें समुपदेशन जातलें. कुशळटाय उदरगत संचालनालयान हे विशींची येवजण तयार केल्या. हे येवजणे खाला समुपदेशक, पर्यवेक्षक तशेंच हेर कर्मचाऱ्यांची नेमणूक जातली. निवडक विद्यार्थ्यांचे नेमान समुपदेशन जातलें.
अर्थीक नदरेन गरीब आनी सरासरी बुद्धीमत्ता आशिल्ले विद्यार्थी आयटीआय अभ्यासक्रमा कडेन वळटात. आयटीआयंत गणीत ड्राॅईंग, वर्कशॉप विशयां सयत तंत्रीक विशय आसतात. अभ्यासा सयत प्रात्यक्षिकांक लागून विद्यार्थ्यांचेर ताण आसता. पालकांच्यो भुरग्या कडल्यान मोट्यो अपेक्षा आसतात. ताणाक लागून विद्यार्थी मानसीक चेपणा खाला आसता. सोरो, गुटखा अशें वेयसन तांकां लागपाची शक्यताय आसता. ताण सहन जालो ना जाल्यार आत्महत्ये सारखी तोंकाची कृती तांचे कडल्यान घडप शक्य आसता. हाका लागून आयटीआय विद्यार्थ्यांचें समुपदेशन जावप गरजेचें आसा. विद्यार्थ्यांचें समुपदेशन करपा खातीर समुपदेशक तशेंच पर्यवेक्षकांची नेमणूक जातली.
राज्यांत 10 उद्देगीक प्रशिक्षण संस्था (आयटीआय) आसात. हातूंत वर्साक 5 हजार विद्यार्थी प्रवेश घेतात. इलेक्ट्रिशियन, फिटींग, वेल्डर, टर्नींग, रेफ्रिजरेशन अशे तरेकवार फांटे आयटीआय संस्थेंत आसात. अभ्यासा सयत नोकरेची मुलाखत तशेंच करियर वेंचपा खातीर विद्यार्थ्यांचें समुपदेशन जावपाची गरज आसा.
मानसीक तशेंच अभ्यासाच्या ताणाचे वेवस्थापन, आयटीआयच्या वातावरणा कडेन जुळोवन घेवप, रागाचेर नियंत्रण दवरप ह्या विशयांचें समुपदेशन विद्यार्थ्यांक करतले. येवजणे खाला कंत्राटी पद्दतीचेर समुपदेशक तशेंच पर्यवेक्षकांची नेमणूक जातली. समुपदेशक तशेंच पर्यवेक्षकांच्या निवडी खातीर समिती स्थापन जातली. समिती पात्र उमेदवारांची निवड करतली. समुपदेशक तशेंच पर्यवेक्षकांक मानसशास्त्र वा समाजीक कार्यांतली पदवी वा पदव्युत्तर शिक्षण आसपाची गरज आसा. समुपदेशकांक म्हयन्याक 28 हजार, पर्यवेक्षकांक म्हयन्याक 35 हजार जाल्यार डेटा एंट्री ऑपरेटरांक 20 हजार रुपया पगार आसतलो. आयटीआयचे प्राचार्य तशेंच शिक्षक वर्गा कडेन सल्लामसलत करून समुपदेशकांक काम करचें पडटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
