भांगरभूंय | प्रतिनिधी
डॉ. प्रमाेद सावंतः खासगी कामकाज दिसाचो अधिवेशनांत आस्पाव
पणजी : अर्थसंकल्प मांडपाची तारीख निश्चीत जावंक नासली तरी तो ह्याच अधिवेशनांत सादर जातलो. अर्थसंकल्पाचेर चर्चा मात पावसाळी अधिवेशनांत जातली. शुक्रारा खासगी कामकाजाचो दीस चार दिसांच्या अधिवेशनांत आसतलो अशें मुख्यमंत्री डॉ. प्रमोद सावंत हांणी सांगलें.
गोंय विधानसभेचें अर्थसंकल्पी अधिवेशन 27 मार्च ते 31 मार्च ह्या दिसांनी जातलें. अधिवेशनाचें कामकाज निश्चीत करपा खातीर कामकाज सल्लागार समितीची सोमारा बसका जाली. अर्थसंकल्पाचेर चर्चा फुडल्या अधिवेशनांत करपाचो निर्णय जाला. अर्थसंकल्प सादर करपा सयत मुख्यमंत्री लेखानुदान मंजूर करून घेतले.
अर्थसंकल्प ह्याच अधिवेशनांत सादर जातलो. अर्थसंकल्पाची तारीख मात निश्चीत जावंक ना. अर्थसंकल्प सादर केले उपरांत ह्याच अधिवेशनांत चर्चा करपाची सरकाराची तयारी आशिल्ली. चर्चेक तीन दीस पुरो आशिल्ले. विरोधकांनी फुडल्या अधिवेशनांत चर्चा करपाचो प्रस्ताव मांडलो. हो प्रस्ताव मान्य जाला. तशेंच खासगी कामकाजाच्या दिसाची विरोधकांनी मागणी केल्ली. खासगी कामकाज दिसाचो अधिवेशनांत आस्पाव आसतलो. मुख्यमंत्री डॉ. प्रमोद सावंत हांणी बसके उपरांत ही म्हायती दिली.
30 मार्चाक रामनम आशिल्ल्या कारणान कामकाजाक सुटी आसतली. रामनमीची सुटी ही मर्यादीत सुटी आसा. भौशीक सुटयो तशेंच मर्यादीत सुटयांची वळेरी डिसेंबरांत निश्चीत जाता. हाका लागून आता रामनमीक भौशीक सुटी जाहीर करप शक्य जावचें ना अशें मुख्यमंत्र्यांनी सांगलें.
फुडलें अधिवेशन 4 सप्तकांचें
करपाची विरोधकांची मागणी
विधानसभेचें पावसाळी अधिवेशन 4 सप्तकांचें करपाची मागणी गोवा फॉरवर्डाचे आमदार विजय सरदेसाय हांणी केली. अर्थसंकल्प सादर केले उपरांत चर्चेक 3 दीस जाय. ह्या अधिवेशनांत चर्चेक 3 दीस मेळनात. हाका लागून चर्चा फुडल्या अधिवेशनांत करपाचो निर्णय जाला. दिसाक अतारांकीत प्रस्नांचो आंकडो 15 वेल्यान 25 जावपाक जाय. तशेंच कामकाजाचे आदले दिसा प्रस्नाच्यो जापो मेळपाक जाय. जाप पयली मेळ्ळी जाल्यार अभ्यास करून पुरवणी प्रस्न विचारप शक्य जाता. आतां सभाघरांत प्रस्न आयलो तरी लॅपटॉपाचेर जाप लोड जाल्ली नासता अशें विजय सरदेसाय हांणी सांगलें.
लक्षवेधी सुचोवण्यांचो आंकडो वाडोवचो
सद्या दिसाक 3 लक्षवेधी सुचोवण्यो घेतात. हो आंकडो वाडपाची मागणी केल्या अशें आमदार वेंझी व्हिएगश हांणी सांगलें. हाचेर अजून निर्णय जावंक ना. कामकाज सल्लागार समितीची बसका म्हणल्यार एक सोपस्कार आसता. अर्थसंकल्प मांडले उपरांत चर्चा करपा खातीर वेळ मेळपाक जाय. अर्थसंकल्प वाचून ताचेर अभ्यास करपाक वेळ जाय. हाका लागून अर्थसंकल्पाचेर चर्चा फुडल्या अधिवेशनांत दवरल्या. फुडलें अधिवेशन 28 दिसांचे करचें अशी मागणी विरोधकांनी केली. अधिवेशन 12 दिसांचें करपाची सुचोवणी मुख्यमंत्र्यांनी केली. विरोधकांनी आक्षेप घेतलो. फुडलें अधिवेशन 20 दिसांचें करपाचेर सध्या एकमत जालां अशें वेंझी व्हिएगस हांणी सांगलें.
रामनमीक भौशीक सुटी आसची
रामनम हो एका समाजाचो अध्यात्मीक सण. ह्या सणाक भौशीक सुटी जाहीर जावपाक जाय. फेस्ताक जशी सुटी आसता, तशी रामनमीक आसपाक जाय अशी मागणी आमदार वेंझी व्हिएगश हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
