अपघात : वेर्णें, साळगांव, दिवचल संवेदनशील वाठार

भांगरभूंय | प्रतिनिधी

येरादारी पुलीस विभागाच्या वर्सुकी अपघात विश्लेशण अहवालांत म्हायती

भांगरभूंय । प्रतिनिधी

पणजी : गोंयांत 2024 त 2,682 अपघातांत 286 जाणांक मरण आयिल्लें. जाल्यार वयल्या काळांत 97.51 टक्के अपघात वाहन चालकांनी घाळपणान गाडी चलयल्ले खातीर जाल्यात अशें निश्पन्न जालां. 2024 त सगळ्यांत चड अपघात वेर्णें जाल्यार सगळ्यांत चड मरणां दिलचल पुलीस स्टेशनाचे हद्दींत जाल्यांत. जाल्यार साळगांव पुलीस स्टेशनाचे हद्दींत 46.67 टक्के अपघातांत वाड जाल्यात. ताका लागून वयले वाठार संवेदनशील आशिल्ल्याची म्हायती येरादारी पुलीस विभागाच्या वर्सुकी अपघात विश्लेशण अहवालांतल्यान मेळ्ळ्या.

गोंय पुलिसांनी रस्त्यां वयले वाडटे अपघात आनी तातूंत जावपी मरण हांकां आळाबंद घालचे खातीर येरादारी पारेकार (ट्रफीक सेंटिनल) येवजण सुरू केल्ली. लोकांनी विरोध केल्ल्यान ती येवजण बंद केल्ली. ही येवजण आतां नव्या स्वरुपांत सुरू करपाचो पुलीस खात्यान विचार केला, अशी म्हायती मुखार आयल्या.

तशेंच, पुलिसांनी विवीध उपक्रम, मोहिमो हातांत घेतल्यो. तरी लेगीत अपघात जायत आसात. तातूंत मुखेलपणान पेड्डेर रस्ते आनी रस्त्याचें चुकीचे पद्दतीन बांदकाम, वाहन चालकांचीं घाळपणां, येरादारी नेम मोडप, अशीं खूबशीं कारणां अपघाताक कारणीभूत थारतात. येरादारी नेम मोडप्यांचेर खर कारवाय करची, अशे निर्देश पुलीस खात्यान वेळावेळार जारी केल्यात. ते खातीर विशेश मोहिमो चालीक लावन वाहन चालकांचेर कारवाय करपाचे निर्देश जारी केल्यात.

येरादारी पुलीस विभागाच्या 2024 तल्या वर्सुकी विश्लेशण अपघात अहवाला प्रमाण, गोंयांत सगळ्यांत चड अपघात वेर्णें पुलीस स्टेशनाचे हद्दींत जाल्यात. ते परांत 213 अपघात पणजे, 188 पर्वरे, 179 पोरणें गोंय, 169 मायणा- कुडटरी आना हेर पुलीस स्टेशनांनी मेळून 2,682 अपघात जाल्यात. ते भायर सगळ्यांत चड मरणां 22 दिवचल पुलीस स्टेशनाचे हद्दींत जाल्यांत. ते उपरांत फोंडें पुलीस स्टेशनाचे हद्दींत 20, आगशी 19, पोरणें गोंय आनी वेर्णा पुलीस स्टेशनाचे हद्दींत दरेकी 18 जाल्यार हेर पुलीस स्टेशनांचे हद्दींत मेळूंन 284 मरणां जाल्यांत.

मोटारींक चड अपघात

गोंयांत 2,682 अपघातांतले सगळ्यांत चड 41.15 टक्के (1,104) अपघात मोटारींचो जाल्यार 40.74 टक्के (1,093) अपघात दुचाकींचो आसा. ते भायर 18.11 टक्के (485) अपघातांत हेर गाडयांचो आस्पाव आसा.

सगळ्यांच चड 288 मोटार अपघात पणजी पुलीस स्टेशनाचे हद्दींत जाल्यात. ते उपरांत 184 पर्वरे, 165 वेर्णां, 126 पोरणें गोंय, 103 आगशी जाल्यार हेर पुलीस स्टेशनांचे हद्दींत मेळून 1,104 मोटार अपघात जाल्यात. ते परांत 124 मायणा – कुडटरी, 122 पणजी, 117 पोरणें गोंय, 83 दिवचल आनी हेर पुलीस स्टेसनांचे हद्दींत मेळून 1,093 दुचाकींचे अपघात जाल्यात.

पोरूंचें तुळेंत साळगांव 7 चड अपघात

साळगांव पुलीस स्टेशनाचे हद्दींत 2023 त 15 अपघात जाल्ले. जाल्यार 2024 त 22 अपघात जाल्यात. 2023 चे तुळेंत 2024 त 7 अपघात वाडल्यात. ताका लागून 46.67 टक्के अपघातांत वाड जाल्ल्याची म्हायती येरादारी पुलीस विभागाच्या वर्सुकी अपघात अहवालांत स्पश्ट जालां.