भांगरभूंय | प्रतिनिधी
पणजी : राज्य गुंतवणूक उर्बा मंडळाचे (आयपीबी) ३८ वे बसकेंत ७३३ कोटींच्या ९ प्रकल्पांक मान्यताय दिली. हाचे वरवीं २,३१९ जाणांक रोजगार मेळटलो, अशें ह्या वेळार पत्रकारां कडेन उलयतना मुख्यमंत्री डॉ. प्रमोद सावंत हांणी म्हणलें. विशेश म्हळ्यार नोकर्यांनी गोंयकारांक प्राधान्य मेळचें हे खातीर सरकार यत्न करतलें.
मेळिल्ले म्हायती प्रमाण, गोवा गुंतवणूक उर्बा मंडळान बुधवारा णव प्रकल्पांक मान्यताय दिली. हाचे वरवीं राज्यांत ७३३ कोटी रुपया गुंतवणूक हाडपाची आनी २,३१९ जाणां खातीर रोजगार निर्माण करपाचो सरकाराचो हेत आसा. हे बसकेंत मंजुर केल्ल्या प्रकल्पांनी नवीन गुंतवणूक, वांगडा वखदां निर्माण, गुदांव, मशीन टूल्स आनी पिवपाच्या मळावेलीं उत्पादन सुविधांचो विस्तार करप हांचो आसपाव आसा. मुख्यमंत्री सावंत हांचे अध्यक्षते खाला ही बसका जाली.
हांगच्या प्रकल्पांत प्रॉक्टर अँड गॅम्बलची उपकंपनी ‘जिलेट डायव्हर्सिफायड ऑपरेशन्स प्रायव्हेट लिमिटेड’ खाला विस्तार आनी झायडस लायफसायन्सेस लिमिटेडच्या एका प्रकल्पाचो आसपाव आसा. हाचे भायर सिप्ला आनी हेर भोवराष्ट्रीय कंपन्यांक कुंडय उद्देगीक वसणुकेंत उत्पादन केंद्राच्या विस्ताराक मान्याताय मेळ्ळ्या. गोंय सरकारन लॉजिस्टिक्स मळाक उद्देगाचो दर्जो दिला. हाचे खाला मेसर्स एक्सप्रेस मशीन्स ऍण्ड स्कॅफोल्डिंग प्रायव्हेट लिमिटेडाक राज्यांत आनीक एक व्हड गोदाम (स्टोरेज) सुविधा स्थापन करपाक मंडळान मान्यताय दिल्या. हाचे वांगडा, राज्य गुंतवणूक प्रोत्साहन मंडळाची पूर्व मान्यताय मेळिल्ल्या केपेंच्या इंडियन होटल्स कॉर्प. लिमिटेड. च्या ईको-टुरिझम प्रकल्पाच्या विस्ताराकूय मान्यताय दिल्या.
मजगतीं हे बसकेंत, संघटनात्मक पुनर्रचणूक, गोंय आयपीबी लँड बँक आनी हेरांचेर खोलायेन चर्चा जाली. राज्यांतल्या नोकर्यांनी गोंयच्या लोकांक प्राधान्य दिवचे अशे निर्देश मंडळाक दिले. विवीध दिग्गज कंपन्यांनी गोंय सरकारा कडेन सादर केल्ले एकंदर प्रस्ताव पळयल्यार राज्यांत ‘ईज ऑफ डूइंग बिजनेस’चे फाटभूंयेर सेगीत बरी सुधारणा जाल्या. मात गोंय सरकार ‘विकसीत गोंय’च्या दुश्टीकोनांतल्यान आपल्या धोरणांत आजूनय सुधारणा करपा खातीर वचनबद्ध आसा अशेंय हे बसकेंतल्यान दिसून आयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
