होडा पॅत्रोल पंप मारपेट प्रकरणात राजकी हस्तक्षेप चल्ल्याचो आरोप

भांगरभूंय | प्रतिनिधी

भांगरभूंय । प्रतिनिधी
वाळपयः होंडा हांगा फांतोडेर पॅत्रोल पंपा वयल्या कामगारांक मारपेट करपी अटक केल्ल्या बिठ्ठोण हांगच्या कादर शेख आनी सलीम चौरात ह्या दुबावितांक आपले सुवादीन करपाची मागणी करून थळाव्या लोकांनी होंडा पुलीस चौकीर धरणे धरलें. मात पुलिसांनी तांकां दाद दिली ना. ह्या मारपेट प्रकरणांत राजकी हस्तक्षेप चल्ला असो आरोप थळाव्या लोकांनी केला. सत्तरीत तालुक्यांत कसलेच तरेची अरेरावी खपोवन घेवचे नात अशी शिटकावणी लोकांनी दिल्ल्यान सत्तरी तालुक्यांत घसघसे पळोवपाच्या निमतान येवून सोरो पियेवन मस्ती करपी लोकांची आतां धडगत आसची ना अशें दिसपाक लागलां.
होंडा हांगा एक पॅत्रोल पंपार काम करपी महादेव गांवकार हाका कादर शेख आनी सलीमान मारपेट केल्ली. वाळपय पुलिसांनी निमाणे तांका सोदून काडून सोमाराक दनपारां अटक केली. सुमार 300 थळाव्या लोकांनी ताकां आपले सुवादीन करपाची मागणी होंडा पुलीस चौकेर वचून केल्ली. सत्तरीचो मामलेदार कौशीक देसाय आनी पुलीस उपअधिक्षक सागर एकोस्कार हांणी तांची समजूत काडपाचो यत्न केलो. दुबावितांक सगळ्या सामकार माफी मागपाक लावची अशी लोकांची मागणी आशिल्ली. मात पुलिसांनी ती मानून घेतली ना.
दुबावितांचो सत्ताधारी पक्षाकडेन संबंद आशिल्ल्या पुलीस तांकां फाटल्यान घालतात अशें कांय लोकांनी सांगलें. रातीं जाल्ले चर्चे उपरांत थळाव्या लोकांतले धा जाण वरिश्ठ पुलिसां कडेन उलोवणी करपाक वतले आनी उपरांत फुडलो निर्णय घेतले अशी म्हायती मेळ्ळ्या.