भांगरभूंय | प्रतिनिधी
पणजीः गोंयांतल्या दिव्यांग सरकारी कर्मचाऱ्यांक हे मुखार 8 बदला 12 दिसांची कॅज्युयल लिव्ह (प्रासंगीक रजा) घेवपाक मेळटली. कार्मीक खात्याचे अवर सचीव अवीत नायक हांणी हे संबंदांतलो आदेश जारी केला.
हेर सरकारी कर्मचाऱ्यांक वर्साक 8 कॅज्युयल लिव्ह घेवपाक मेळटा. गोंयांत दिव्यांग सरकारी कर्मचाऱ्यांक लेगीत हेर कर्मचाऱ्या वरीच 8 कॅज्युयल लिव्ह घेवपाक मेळटाल्यो. पूण 2008त केंद्र सरकारान दिव्यांक कर्मचाऱ्यांक वर्साक 12 कॅज्युयल लिव्ह दिवपाचो निर्णय घेतिल्लो. राज्य सकारान लेगीत केंद्राच्या ह्या निर्णयाची अंमलबजावणी करपाचें थारायिल्लें. पूण आतां मेरेन ताची अंमलबजावणी जावंक नाशिल्ली. मात हे मुखार विवीध सरकारी खात्यांनी काम करपी दिव्यांक कर्मचाऱ्यांक वर्साक 8 बदला 12 कॅज्युयल लिव्ह घेवपाक मेळटल्यो. हाचो फायदो दिव्यांग कर्मचाऱ्यांक मेळटलो, अशी म्हायती समाज कल्याण खात्याचे संचालक अजीत पंचवाडकार हांणी ‘भांगरभूंय’ कडेन उलयतना दिली. मजगतीं, दिव्यांगांची सर्वांगी उदरगत सादचे खातीर आनी समाजाचो तांचे विशीं आशिल्लो दिश्टीकोन बदलचे खातीर सरकार विवीध मार्गांनी यत्न करता. देशभरांतल्या दिव्यांगांक एकठांय हाडून तांचे प्रस्न सोडोवचे खातीर गोंयांत पर्पल फेस्ताचेंय आयोजन केलां. जाल्यार फुडल्या अर्थीक वर्सां सावन दिव्यांगां खातीर स्वतंत्र सरकारी खातें सुरू करपाचीय घोशणा मुख्यमंत्री डॉ. प्रमोद सावंत हांणी कांय दिसां आदींच केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
