भांगरभूंय | प्रतिनिधी
पेडणें, प्रतिनिधी : पेडणें मतदार संघांतल्यान २०१७ चे विधानसभा वेंचणुकेंत आपूण मुखेल दावेदार आसतलों. तिकेट मेळूं वा ना मेळूं. तें येवपी काळ थारायतलो, अशें आदले उपमुख्यमंत्री बाबू आजगांवकार हांणी एके कार्यावळी वेळार थळाव्या पत्रकाराच्या प्रस्नाक जाप दितना सांगलें.
२०२२ चे वेंचणुकेंत पेडणें मतदार संघांतल्यान भाजपाची उमेदवारी बाबू आजगांवकार हे पदाचेर आसून लेगीत भाजपान तांकां मडगांवां वेंचणूक लढोवपाचो आदेश दिलो. थंय ते वेंचणुकेक बसले आनी हारलेय. पेडणें मतदारसंघाची उमेदवारी मगो पक्षांतल्यान आयिल्ले प्रवीण आर्लेकार हांकां दिली. उपरांत आर्लेकार आमदार म्हणून वेंचून आयले.
आयज पेडणें म्हाल नागरीक समितीन कुळ मूंडकार जनजागृती शेतकरी संमेलन आयोजीत केल्लें. उपरांत थळाव्या पत्रकारांनी एक प्रस्न केलो तेन्ना आजगांवकार हांणी सांगलें, २०२७ ची उमेदवारी खंयच्या पक्षाची आसतली हें तांणी आजूनय स्पश्ट करूंक ना. पूण येवपी काळांत योग्य ती उमेदवारी आपल्याक मेळटली.
आपूण भाजपाचो सामको निश्ठावान सेवक आशिल्ल्याचेंय तांणी म्हणलें.
पेडणें मतदार संघ हो राखीव मतदार संघ. मगो पक्षाचे देऊ मांजरेकार सोडून हेर म्हालांतले उमेदवार आमदार म्हणून भाजप, कॉंग्रेस, मगो पक्षाचे तिकेटीचेर वेंचून आयल्या. थळाव्या उमेदवारांक हांगाचे लोक वेंचून दिनात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
