हेमोफिलिया सोसायटीची जाली बसका

हेमोफिलिया सोसायटीचे वांगडी.

भांगरभूंय | प्रतिनिधी

पणजी:  हेमोफिलिया सोसायटी पणजे फांट्याची वर्सुकी बसका सरिता चव्हाण हांचे अध्यक्षते खाला जाली. 

हे कार्यावळींत सरिता चव्हाण हांची सोसाइटीच्या अधक्षयपदार निवड जाली. कार्यकर्ते प्रकाश वामन कामत हांकां सोसायटीचें वांगडी पद दिलें. 

ह्या वेळार उलयतना सोसाइटीचे लाय्फ मेंबर प्रकाश कामत हांणी म्हणलें, समाजांत हिमोफिलिया विशीं जागृताय करप सामकें गरजेचें. आजूनय खूबश्या लोकांक हिमोफिलिया जालां आनी तांकां हाची म्हायती ना. ते योग्य ट्रिटमेंट घेनात. सोसायटीन प्रस्थापीत प्रसार माध्यमां आनी समाज माध्यमां हांचो आदार घेवन जागृताय करची. सगळे तरेच्या संस्थांनी एकठांय येवन हाचेर कितेंय उपाय करपा खातीर आवाज काडचो, अशें आवाहन कामत हांणी केलें.

हिमोफिलिया हें अनुवंशीक दुयेंस. ह्या व्यक्तीं मदीं रक्तांत 13 घटकां मदलो एक घटक उणो आसता वा हाजीर नासता. ताका लागून असल्या व्यक्तींच्यो रक्ताच्यो शिरो व्हांवपाक लागतात. शिरांतल्यान येवपी रक्ताक लागून तांच्या जिवाक धोको निर्माण जावपाक शकता. 

हे बसकेंत उपाध्यक्ष रामा कंवठणकार हांचे वांगडा 40 पालक आनी दुयेंती हाजीर आशिल्ले.