भांगरभूंय | प्रतिनिधी
तरेकवार असहिष्णुतेच्या रुपांत दुस्वासी आनी चिथावणीखोर वक्तव्य (हेट स्पीच) संवसारभर वाडत आसा. आयज सर्वसमावेशक समाजाक लागिल्ली ही कीड. सोशल मिडिया वरवीं ‘हेट स्पीच’ पयलीं परस चड नेटान फुडें वता. ऑनलायन आनी ऑफलायन दोनूय प्रकारांनी, दुस्वास भाशण लोकांक ते कोण आसात ताचेर आदारून लक्ष्य करून अमानुशीकरण करता– चड करून राजकी फायदो सोदपी पात्रां कडल्यान.
जायते फावटी हें करपी फुडें येनात. ते रासवळ समाजांत समाज माध्यमां विशीं आशिल्ल्या अज्ञानाचो फायदो घेवन आपलो अजेंडा फुडें व्हरतात. हेट स्पीच हे पिडेचेर बेगोबेग इलाज केलोना तर ती समाजांत फूट घालपांत यशस्वी थारता. युनेस्को शिक्षण आनी माध्यम आनी म्हायती साक्षरते वरवीं ‘हेट स्पीच’चो प्रतिकार करता. हे विकृतीचीं मुळावीं कारणां नश्ट करपा खातीर अभिव्यक्ती स्वातंत्र्या विशीं आंतरराष्ट्रीय मानकांक चालना दिता आनी देशांक प्रभावी प्रतिसाद तयार करपाक आदार दिता.
दर वर्सा 18 जून दिसा दुस्वासाच्या भाशणाक प्रतिकार करपा खातीर संसारीक दीस मनयतात. द्वेशभाशण दिसपट्टें पयलीं परस चड नेटान आनी पयस पातळत आसा. ताका कृत्रिम बुद्धी (एआय) वरवीं जल मेळटा. डिजिटल प्लॅटफॉर्मय कळटां- नकळटां विखारी मजकूर पातळायतात.
दुस्वासी भाशण आनी कृत्रीम बुद्द
दुस्वासाचे विध्वंसक परिणाम नवें न्हय, पूण नव्या संचारण तंत्रगिन्याना वांगडा ताचें प्रमाण आनी परिणाम वाडला, जाका लागून संवसारीक पांवड्यार फूट घालपी विचारसरणी पातळावपाक दुस्वासी भाशण हें एक प्रभावी साधन जालां. द्वेशपूर्ण भाशणां नियंत्रणांत दवरलीं ना जाल्यार संघर्श आनी मानवी हक्कांचे उल्लंघनाक सबळगें दिवन शांतताय आनी उदरगतीक आडमेळीं वाडटलीं. शांतताय निर्माण करप, लिंगिक समानताय, तरणाट्यांक आदार दिवप ह्या सारक्या वाठारांनी द्वेशभाशणाचो अनिश्ट परिणाम मान्य करून मानवी हक्कांची राखण आनी कायद्याचें राज्य वाडोवपा खातीर संयुक्त राश्ट्रांनी खूब आदीं सावन दुस्वासा आड यत्न केल्यात.
द्वेश भाशणा विशींच्या संयुक्त राश्ट्रांच्या रणनिती आनी कृती आराखड्यांत द्वेशभाशणाची व्याख्या अशी केल्या : धर्म, वंश वा लिंग ह्या सारक्या अस्मिताय घटकांचेर आदारीत व्यक्ती वा गटांचेर हल्लो करपी वा भेदभाव करपी संवाद. ऑनलायन द्वेशभाशणाक लागून आव्हानां आसून लेगीत सरकारां, नागरी समाजान आनी व्यक्तीनीं ताका प्रभावीपणान आडावपा खातीर रणनिती तयार करपाचें काम चालूच दवरूंक फावो.
द्वेशभाशणाक संबोधीत करपाक तंत्रगिन्यान आनी सोशल मिडिया कंपनींचो आस्पाव आशिल्ल्या भागीदारीची म्हत्वाची भुमिका आसा. जर ताका सत्तेची फूस आसत तर दुस्वाशी उलोवपा आड उबो रावप अडचणीचें, भिरांकुळय थारूं येता, खास करून जेन्ना तें आमच्या दिसपट्ट्या संवादांत वा कामाचे सुवातीर दिसता. आपल्याक बादत, टार्गेट जायत म्हणून हेट स्पीच आड उलोवपाचें जायतेजाण टाळतात. पुण अश्या वेळार मौन हानीकारक उतरां आनी वृत्तीचीं मुळां रुजोवंक दिवंक शकता. म्हणून हेट स्पीच आड आवाज जायच.
जुलय 2021 वर्सा संयुक्त राष्ट्र संघटनेच्या सार्वत्रिक सभेन संवसारभर “द्वेशभाशणाचो व्यापक प्रसार आनी प्रसार” हांचे विशीं जागतीक हुस्को उजवाडायलो आनी “द्वेशभाशणाक आडावपा खातीर आंतरधर्मीय आनी आंतरसंस्कृतीक संवाद आनी सहिश्णुताय वाडोवप” ह्या विशयाचेर एक थाराव आपणायलो. भेदभाव, परक्यांचो दुसास्व आनी द्वेशभाशणां आडावपाची गरज ह्या थारावांत मान्य केल्या आनी आंतरराष्ट्रीय मानवी हक्क कायद्या प्रमाण देशां सयत सगळ्या संबंदीत वावुरप्यांक हे घडणुकेचेर उपाय काडपाचे यत्न वाडोवपाक उलो मारला.
ह्या थारावांत 18 जून 2019 दिसा सुरू केल्ल्या द्वेशभाशणा विशीं संयुक्त राष्ट्र संघटनेची रणनिती आनी कृती येवजणेचेर आदारून 18 जून हो आंतरराष्ट्रीय द्वेशभाशणा आडावपाचो दीस म्हूण जाहीर केला. हो दीस मनोवपाखातीर संयुक्त राश्ट्रां सरकारांक, आंतरराश्ट्रीय संघटनांक, नागरी समाज गटांक आनी व्यक्तींक द्वेशभाशणां वळखुपाक मदत करता. फुडें वचून ताचेर उपाय घेवपाक आनी तांकां आडावपाची रणनिती चालीक लावपी कार्यावळी आनी उपक्रम घडोवन हाडपाक उलो मारता.
वांगडी सहकारी म्हणून खाजगी क्षेत्र, प्रसार माध्यमां आनी इंटरनॅट म्हामंडळां, अध्यात्मीक फुडारी, शिक्षणतज्ञ, नागरी समाजांतले फुडारी, द्वेश भाशणाचो परिणाम जाल्ले तरणाटे वा फकत व्यक्ती म्हणून, द्वेशभाशणाच्या प्रसंगां आड उघड उलोवपाचें नैतीक कर्तव्य आमकां सगळ्यांक पार पाडचें पट्टलें. आनी अशे तरेन ही विकृती आळाबंदा हाडपाक म्हत्वाची भुमिका साकारची पडटली.
दुस्वाशी भास पातळावप हें हिंसाचाराची सुरवातीची शिटकावणी जावंक शकता. देखून अत्याचार गुन्यांवां सयत
द्वेषपूर्ण भाशणां नियंत्रित करप
ताचो परिणाम उणो करपाक योगदान दितलें.
प्रकाश वामन कामत
9422443093
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
