‘हॅली टुरिझम’ हॅलिकॉप्टर सेवा सुरू

हॅली टुरुझम सेवेच्या उक्तावणा वेळार ब्लेड इंडिया कंपनीच्या अधिकाऱ्यां वांगडा हॅलिकॉप्टरांतल्यान पासय मारतना मुख्यमंत्री डॉ. प्रमोद सावंत.

भांगरभूंय | प्रतिनिधी

भांगरभूंय । प्रतिनिधी

म्हापशें: ‘हॅली टुरिझम’ हॅलिकॉप्टर सेवा गोंयांतल्या वैजकी, साहसी आनी चार्डट पर्यटन वेवसायाक चालना दितली. हे सेवेंतल्यान गोंयांतल्या नव्या पर्यटन वेवसायाक चालना मेळटली. हे सेवे वरवीं गोंयांत प्रवेश करपा सयत गरजे वेळार हेर राज्यांनी वचपाक मेळटलें, अशें मुख्यमंत्री डॉ. प्रमोद सावंत हांणी सांगलें.

शुक्रारा सकाळां आग्वाद सिकेरीच्या हॅलीपेडाचेर हॅली- ट्युरिझम सेवेचें मुख्यमंत्री डॉ सावंत हांणी उक्तावण केलें आनी हॅलिकॉप्टरांतल्यान पासय लेगीत मारली. ब्लेड इंडिया आनी राज्य सरकाराच्या जोडपालवान ही सेवा सुरू केल्या. ह्या वेळार कंपनीचे संस्थापक करणपाल सिंग आनी सनी गोगलानी तशेंच हेर मानेस्त हाजीर आशिल्ले.

गोंयांत दर वर्सा 8 दशलक्ष पर्यटक येतात. हॅल- ट्युरिझम सेवेक लागून पर्यटन वेवसायांत आनीक वाड जातली. गोंयांतल्या भितरल्या भारांत जय अजून पर्यटनाचे नदरेन चालना दिवंक ना, अशा वाठारांतल्यान ही सेवा सुरू जातली. वैजकी आपत्कालीन सेवे खातीर हे नवे सुविधेचो लाव निश्चीत जातलो, अशें मुख्यमंत्री डॉ. सावंत हांणी सांगलें.

सनी गोगलानी हांणी सांगलें, मळब मार्गांतल्यान गोंयच्या सैमाचो आनंद घेवचे खातीर हे सेवेचो वापर करतले. रस्त्याचेर वाडिल्ले येरादारीक लागून खूब खेपे पर्यटकांक त्रास सोंसचो पडटा. हे सेवे वरवीं येरादारी सेवेंतलें सोंपेपण वाडटलें. सध्या ही सेवा विमानतळा वयल्यान उत्तर गोंय आनी दक्षीण गोंयांतल्या हॅलीपेडाचेर दितले. ही सेवा सर्वसामान्यां परवडटली. गोंयांतल्या म्हत्वांच्या स्थलांची जोडणी सहजतायेन जावची, दोन स्थळां मदलें अंतर उणें जावचें, वेवसायाक चालना मेळची ह्या उद्देशान ही सेवा सुरु केल्या. गोंया भितरले सेवे वांगडाच शेजारच्या महाराष्ट्रांतल्या कोल्हापूर, मुंबय, पुणे सारकिल्ल्या शारांनी वचपा खातीर हे सेवेचो वापर करतले. ही सेवा महाराष्ट्र आनी कर्नांटकांत सुरू आसा, अशी म्हायती सनी गोगलानी हांणी दिली.