भांगरभूंय | प्रतिनिधी
नवे संकल्प करात, नव्यो येवजण्यो आंखात. अडिल्ल्यांक मजतीचो हात दियात. जाण्ट्यांक आदार दियात. येवजिल्ल्या कामांत तुमकां येश मेळूं हें देवा लागीं मागणें.
डिसेंबर म्हयनो सुरू जालो काय सगल्या गोंयकारांक नव्या वर्साची सुलूस लागता. चातक जे प्रमाण पावसाची दोळ्यांत तेल घालून वाट पळयता तशीं बायलां, भुरगीं, तरणाटे, तरणाट्यो केन्ना एकदा 31 डिसेंबराची रात येता, हाची वाट पळयतात. हे रातीची तयारी 15 दीस पयलींच केल्ली आसता. तरेकवार कार्यावळींच्या आयोजना भितर आॅर्केस्ट्रा, सिनेगीत नाच सर्त, पदांच्या भेंडयांचो खेळ सुरू जाता. थारिल्ले सुवातेर वाड्या वयलीं बायलां एकठांय जातात. तांचो एकवट दिश्टी पडटा. सगलीं खोशयेन पोरण्या वर्साक आदेवश दिवन नव्या वर्साक येवकार दितात.
आयची तरणाटी पिळगी ते रातीं कितें करीत तें सांगपाक येना. कांय जाण सोरो पियेवन नाचप, घुंवळे वखदां घेवप, व्हडा व्हडा पदां म्हणटात, लावडस्पीकर लावन चले आनी कांय चलयांचो नाच, धुमशेणां चलतात… हाका लागून वाठारांतल्या लोकांक रातभर त्रास जाता. हो उपद्रव वर्साचोच जावन आसा. रस्त्यान वचपी लोकांक आडोवन तांचे कडल्यान पयशे घेवपीय खूब जाण आसात. रातभर जागरण, बोवाळ करून लोकांक, दुयेंत मनशांक त्रास दिवप म्हणजेच ही 31 डिसेंबराची रात.
हें वर्स आमचें न्हय. तें ब्रिटीशांचें. हे दीस आमचे क्रिस्तांव भाव, भयणां इगर्जेंत वचून परंपरे प्रमाण नवें वर्स मनयतात. चर्चींनी येशू क्रिस्ताची प्रार्थना करतात आनी हॅपी न्यू इयर म्हूण एकमेकांक परबीं दिवप, ही तांची परंपरा. बोवाळ, धुमशेणां घालचे परस ही परंपरा सगल्यांनी आपणावंक जाय. हांव तरणाटे पिळगेक इतलेंच सांगूंक सोदतां, 31 डिसेंबराची रात सोरो, घुंवळे वखदां घेवन मनोवची न्हय. शांतीकायेन, उमेदीन, एकमेकांक परबीं दित मनयात. नव्या वर्सा उरिल्लीं कामां पूर्ण करपाचो सोपूत घेयात. ते खातीर जाय ती जिद्द, चिकाटी, आत्मविस्वास बाळगात. वायट व्यसनां सोडटले, असो सोपूत घेयात. नवे संकल्प करात, नव्यो येवजण्यो आंखात. अडिल्ल्यांक मजतीचो हात दियात. जाण्ट्यांक आदार दियात. येवजिल्ल्या कामांत तुमकां येश मेळूं हें देवा लागीं मागणें. सगल्यांक नव्या वर्साचीं परबीं. हॅपी न्यू इयर 2024.
सिद्धी तिळवे
फोंडें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
