भांगरभूंय | प्रतिनिधी
सरदार वल्लभभाई पटेल आंतरराष्ट्रीय विमानतळा वेल्यान लंडनाक वचपी बोईंग 787-8 हें विमान उड्डाणा उपरांत फक्त 31 सेकंदांत मेघानीनगर हांगासरल्या नागरी वस्तींत कोसळिल्ल्यान जाल्ल्या भिरांकूळ अपघातांत गुजराताचे आदले मुख्यमंत्री विजय रुपाणी हांचे सयत 275 जाणांक दुखेस्त आनी दुर्दैवी मरण येवपाची घडणूक बिरेस्तारा घडली. ह्या भिरांकूळ अपघातांत देशांत दुख्खाचें ल्हार पातळ्ळें. हें विमान बीजे मॅडिकल कॉलेजीच्या हॉस्टेलार कोसळिल्ल्यान त्या हॉस्टेलांतल्या 34 विद्यार्थ्यांकूय दुर्दैवी मरण आयलें. हे घडणुके उपरांत पुराय संवसारभर हळहळ उक्तायत आसात. अर्थांत विमानाचो अपघात घडून तातूंत निश्पाप प्रवाशांचे बळी गेल्ल्याची ही पयलीच घडणूक न्हय. हाचे आदींय अश्यो खुबश्यो घडणुको घडल्यात आनी तातूंत खूबशा प्रवाशांक आपलो जीव व्हगडावचो पडला.
पाेरूंच दक्षीण कोरियांत जेजू अॅरचें बँकॉक ते मुआन ह्या मार्गार वचपी विमान मुआन विमानतळार देंवतना भिरांकूळ अपघात जालो. ह्या अपघातांत विमान भस्मसांत जावन 179 प्रवाशांक मरण आयिल्लें. 2023 वर्सा ऐन संक्रातीच्या दिसा नेपाळांत ही मोटी घडणूक घडिल्ली. नेपाळांतल्या मुखेल शारां पैकीं एक आशिल्ल्या पोखर ह्या शारा कुशीक एक प्रवासी विमान कोसळून जाल्ल्या अपघातांत 60 परस चड प्रवाशांक दुखेस्त मरण आयिल्लें. अहमदाबादांत जाल्लो विमान अपघात हो विमानांत तंत्रीक इबाड जाल्ल्यान जाल्ल्याचें सांगतात. विमानाचो ब्लॅक बॉक्स मेळ्ळाे, पूण अपघाताचें कारण अजून लेगीत समजूंक शकलें ना. सरकारान ह्या विमान अपघाताची चवकशी करपा खातीर चवकशी आयोग नेमला. हो चवकशी आयोग ह्या अपघाताची खोलायेन चवकशी करतलो. ताका लागून रोखडेंच ह्या अपघाताचें खरें कारण मुखार येतलें.
चडशे विमान अपघात हे पेड्ड्यार हवामानाक लागूनच जाल्ल्याचें सांगतात. खरें म्हणल्यार उड्डाणा पयलीं दरेक पायलटाक हवामानाचो अदमास सांगतात. ह्या आदाराचेर तो आपली रणनिती थारायता. ह्या विमानाचें दोगूय पायलट अणभवी आशिल्ले. ताका लागून तांचे कडल्यान चूक जाली अशें दिसून येना. म्हणल्यार विमान अपघातांत फक्त पायलटाचीच चूक आसता अशें न्हय. सुकण्याचो विमानाक धपको बसून अपघात जाल्ल्याच्योय खुबश्यो घडणुको हाचे पयलींय घडल्यात. ऐनवेळार इंजिनांत इबाड जाल्ल्यान अपघात जातात. वातावरणांत बदल जाल्ल्यानूय अपघात जातात. वातावरणाची दृश्यमानताय अचकीत उणी जावन अपघात घडिल्ल्याच्योय घडणुको घडल्यात. वातावरणाची दृश्यमानताय उणी आसत जाल्यार पायलट उड्डाण करिनात. अर्थांत पर्वत वाठारांनी दृश्यमानताय उणी आसताच. दोंगराची उणी- चड उंची आशिल्ल्यान आनी सेगीत बदलपी हवामान, धुकें हाका लागून अपघात जावपाची शक्यताय आसता. पूण हालीं अद्ययावत संगणक प्रणाली आशिल्ल्यान विमान कितल्या उंचाये वेल्यान वता, हवामानांत कसले बदल घडत आसात हाचो अदमास पायलटांक येत आसता. तरी लेगीत कांय पायलट अतिआत्मविस्वासान विमान उड्डाण करतात. हवामानाची पर्वा करिनासतना स्वता सयत प्रवाशांचोय जीव घाताक घालतात. तंत्रीक कारण, पेड्डेर हवामान, सुकण्याचो धपको हीं कारणां कितेंय आसलीं तरी विमान अपघातांत ज्या प्रवाशांचो जीव वता तो मात परतून केन्नाच येना.
हालींच्या दिसांनी विमान अपघातांचें प्रमाण खूब वाडलां. 1970 सावन आयज मेरने 11 हजारां परस चड ल्हान व्हड विमान अपघात जाले. तातूंत 83 हजारां परस चड प्रवाश्यांक मरण आयलें. हो आंकडो हुस्को करपा सारको आसा. भारतांतूय हालीं विमानांत इबाड जाल्ल्याच्यो खुबश्यो घडणुको घडल्यात. पोरूं वर्सा दिल्ली सावन बंगळुरूक वचपी विमानाक इमर्जन्सी लँडिंग करचें पडलें. पायलटान येसस्वी लँडिंग केल्ल्यान अपघात टळिल्लो. विमान उड्डाण करीत आसतना विमानांतल्यान उज्याच्यो ठिणग्यो उडत आशिल्ल्याचें पायलटाच्या लक्षांत आयिल्ल्यान विमानाचें इमर्जन्सी लँडिंग करचें पडलें. प्रवाशांचे नशीब बरें म्हूण त्या वेळार अपघात टळिल्लो आनी शेंकड्यांनी प्रवाशांचो जीव वाटाविल्लो. त्या प्रवाशांचें नशीब बरें आशिल्लें म्हूण त्या विमानाचो अपघात जालो ना. पूण आमच्या देशांत विमान अपघातांत खूबशा लोकांक आपलो जीव व्हगडावचो पडला. तातूंत खूबशे राजकी आनी महनीय व्यक्तींचो आस्पाव आसा. काँग्रेस फुडारी संजय गांधी, आदले केंद्रीय मंत्री माधवराव सिंधिया, लोकसभेचे आदले सभापती आनी तेलगू देसम पक्षाचे फुडारी जीएमसी बालयोगी, मेघालयाचे ग्रामीण विकास मंत्री सायप्रियम संगमा, हरियाणाचे ज्येश्ठ फुडारी ओमप्रकाश जिंदाल, अरुणाचल प्रदेशाचे मुख्यमंत्री दोरजी खांडू, आंध्र प्रदेशाचे मुख्यमंत्री वाय एस राजशेखर रेड्डी हीं तातूंतलीं कांय म्हत्वाचीं नांवां आसात. तातूंत आतां विजय रुपाणी हांच्या नांवाची भर पडल्या.
तीन वर्सां पयलीं भारताचे पयले चीफ ऑफ डिफेन्स स्टाफ (सीडीएस) जनरल बिपीन रावत हांकां एका हेलिकॉप्टर अपघातांत मरण आयिल्लें. विमान अपघातांत अशा व्हड मनशांक मरण येवप हें देशा खातीर व्हड लुकसाणीचें आसा. फक्त व्हड सिलिब्रेटीच न्हय जाल्यार सर्वसामान्य प्रवाशांचो जीव लेगीत तितलोच म्हत्वाचो आसा. सर्वसामान्य मध्यमवर्गीय नागरिकां खातीर जाल्यार विमान प्रवास हें सपन आसता. आनी जर अशे अपघात जाले जाल्यार त्या सपनांचीच न्हय तर तांच्या पुराय कुटुंबाचो गोबर जाता. ताका लागून अशे अपघात जावचे न्हय हाची जतनाय संबंदीत यंत्रणेन घेवंक जाय.
श्याम ठाणेदार
99222546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
