ही पंचायत वेंचणुकेची तयारी

भांगरभूंय | प्रतिनिधी

भारतीय जनता पक्ष हो सदांच इलेक्शन मुडांत आसता. पक्षाच्यो बसका, मेळावे, कार्यशाळा जायत आसतात. पक्षाचे प्रभारी तशेच हेर फुडारी ह्या ना त्या कारणान राज्याक भेट दित आसतात. तांच्यो सभा जातात. सभे खातीर लोकांक हाडपाचें काम थळावे फुडारी तशेच कार्यकर्ते करतात. मेळावे तशेच सभांक लागून आपशीच प्रसिद्धी मेळटा. हाका लागून सामको शिस्तबद्ध आशिल्लो भारतीय जनता पक्ष हो सेगीत लोकांच्या संपर्कांत आसता. पक्षाचे मंत्री, आमदार तशेच पदाधिकारी हे तरेकवार कार्यावळींक लागून लोकांक मेळत आसतात. हाचो लाव तांकां बरेच प्रमाणात वेंचणुकेंत जाता. वेंचणुके खातीर तांका बुथ समिती तशेच हेर समित्यो स्थापन करच्यो पडनात. काँग्रेस तशेच हेर पक्षां मदी अशें जायना. पक्षाचो प्रभारी स म्हयन्यांतल्यान आयलो जाल्यार आयलो. तो आयले उपरांत एकदा समिती वा आमदारांची बसका घेता. हेर फुडारी तर वेंचणूक जाहीर जाली काय एक वा दोन दीस येतात. तेन्नाच तांच्यो सभा जातात. तेन्नाच ते प्रचार करतात. आमदार सुद्धा आपल्या मतदारसंघां पुरतेच मर्यादीत आसतात. वेंचणूक जाली, निकाल लागलो काय गट समित्यांचें अस्तित्वच सोंपता. वेंचणुके पयली आदल्यो गट समित्यो बरखास्त करून नव्यो समित्यो स्थापन जातात. हाचो परिणाम – फुडारी वा कार्यकर्त्यांचो लोकां कडेन संपर्क आसना. वेंचणूक जाहीर जाली काय उमेदवार तशेच फुडारी मतां खातीर लोकां कडेन वतात. जाग आयल्ली दिसता ती वेंचणुके पयलींच्या 1-2 म्हयन्यांत.
सेगीत जनसंपर्क हे भाजपाच्या येसाचें मुखेल कारण. हाचे उरफाटें जनसंपर्काचो उणाव हें काँग्रेसीच्या अपेसाचें मुखेल कारण. विधानसभा वेंचणुकेत भाजपाक काठार भोवमत मेळ्ळे. इकरा जागे मेळिल्ल्यान काँग्रेसीक विरोधांत बसचें पडलें. विधानसभा वेंचणुके उपरांत जुनांत पंचायत वेंचणुको जातल्यो. त्यो सप्तकभर मुखार गेल्यात. पंचायत वेंचणुको पक्षीय पांवड्यार जावच्यो नात. हाका लागून खंयचोच पक्ष अधिकृतपणान उमेदवार उबो करचो ना. तरी आमदार – मंत्री हांचे समर्थक व्हडा प्रमाणात वेंचणुकेंत उबे रावतले. मंत्री तशेच आमदार सुद्धा आपल्या समर्थकांक वेंचून हाडपाचे येत्न करतले. मतदारसंघातल्या पंचायतींचेर वर्चस्व राखपाचे आमदारांचे सेगीत येत्न आसतात. प्रभागांतलीं कामां जावपाक जाय, म्हूण चडशे पंच तशेच सरपंच सदांच सत्ताधारी पक्षा वांगडा रावतात. सरकार एका पक्षाचे आनी मतदारसंघाचो आमदार दुसऱ्या पक्षाचो आसत जाल्यार पंच तशेच सरपंचांची बरीच गोची जाता. विश्वजीत राणे, सुदिन ढवळीकार, मायकल लोबो हांचें मतदारसंघांचेर पूर्ण वर्चस्व आसा. भलायकी मंत्री राणे हांचें तर वाळपय तशेंच पर्ये अशें दोन मतदारसंघाचेर वर्चस्व आसा. हाका लागून सत्तरी म्हालांतल्या सगळ्या पंचायतींचेर भगवो फडकवप हो तांचे खातीर प्रतिष्ठेचो विशय जाला. पंचायत वेंचणुको पक्षीय पावंड्यार जायनात. पक्षाचे कार्यकर्ते वेंचणुकेक मोठ्या प्रमाणाचेर उबे रावतले, अशें भाजपाचे प्रदेश अध्यक्ष सदानंद शेट तानावडे हांणी जाहीर केलां. पंचायत वेंचणूक आसूं, नगरपालिका आसूं वा जिल्हो पंचायत आसूं, भारतीय जनता पक्ष वेंचणूक गंभीरतायेन घेता. विधानसभे खातीर पक्षाचे कार्यकर्ते अधिकृत उमेदवारां खातीर वावुरतात. उपरांत वेंचून आयिल्ले पक्षाचे आमदार पंचायतींत कार्यकर्त्यांक वेंचून हाडपा खातीर वावुरताक. आदले मुख्यमंत्री सर्गेस्त मनोहर पर्रीकार हे सुद्धा कांय गांवांनी समर्थकांच्या प्रचारा खातीर वताले. आतांय मुख्यमंत्री डॉ. प्रमोद सावंत हे आपल्या मतदारसंघातल्या पंचायतींनी प्रचार करतले. पाळी – कोठंबी, वेळगे, सुर्ला, कुडणे, न्हावेली, आमोणा आनी हरवळें ह्यो पंचायती साखळी मतदारसंघात येतात. मुख्यमंत्री डॉ. सावंत हे खेपो खुब उण्या मताधिक्क्यान जैतिवंत जाल्यात. मतदारसंघा वेली पकड घटमुट करपा खातीर पक्षाच्या कार्यकर्त्यांक वेंचून हाडपाचे मुख्यमंत्र्यांचे येत्न आसतले.
फांटले वेंचणुके पयलीं सरकारान स्वयंपूर्ण गोंय मोहीम सुरू केल्ली. काय पंचायतींनी तिका बरेच येस आयलां. ही मोहीम आजून चालू आसा. हे मोहिमेचो भारतीय जनता पक्षाक पंचायत वेंचणुकेंत लाव जातलो. सरकार तुमच्या दारी, हो उपक्रम सुद्धा परतून सुरू जातलो. पंचायत वेंचणूक दोळ्यां मुखार दवरून आतां हो उपक्रम सुरू जातलो. आतां भाजपची राज्य कार्यकारिणी बसका सुद्धा जावपाची आसा. ह्यो सगळ्यो गजाली म्हणजे पंचायत वेंचणुकेची तयारी. हेर पक्षांनी मात पंचायत वेंचणुकां विशी उमेदीचें वातावरण दिसना. विधानसभा वेंचणुकेंत काँग्रेसीक 11 जागे मेळ्ळे. पक्षाची कामगिरी खुब बरी जावंक नासली तरी समाधानकारक जाल्या. वेंचणुके उपरांत विधीमंडळ पंगडाचें नेतृत्व मायकल लोबो कडेन दिलें. प्रदेश अध्यक्षपदा वेल्यान गिरीश चोडणकार हांची हकालपट्टी करून अमित पाटकार हांची नेमणूक केल्या. अमित हे नव्या दमाचे उमेदी वावुरपी. ते अध्यक्ष जाले उपरांत सुद्धा पक्षा मदली मरगळ पयस जावंक ना. पक्षा सावन पयस गेल्ल्या कार्यकर्त्यांक परतून हाडपा खातीर पक्षान हालींच चेतना यात्रेचें आयोजन केलें. चेतना यात्रा जाली तरी पक्षात आजून तरी नवे तेज दिसना. काँग्रेस वा हेर पक्ष पंचायत वेंचणुकां कडेन गंभीरतायेन पळयनात. पंचायत वेंचणुको पक्षीय पावंड्यार जायनात. हाका लागून पक्ष वांटो घेवचो ना. आमचे इत्सुक कार्यकर्ते वेंचणूक लडोवपाक मेकळे आसात, अशें सदांचेच वक्तव्य पक्ष करता. पंचायत वेंचणुकांच्या अनुशंगान लोकां मेरेन वचपाची तशेच नवे कार्यकर्ते करपाची संद काँग्रेस पक्षाक आशिल्ली. तिचो उपेग करताना काय काँग्रेस पक्ष दिसना. भारतीय जनता पक्ष मात सरकार तशेच संघटणेच्या बळाचेर पंचायतींचेर सुद्धा वर्चस्व दवरपाचे येत्न करता.
पंचायती ह्यो स्थानिक स्वराज संस्था. चडशा पंचायतीं कडेन निधी नाशिल्ल्यान त्यो सरकाराच्या अनुदानाचेर निंबून आसा. या अनुदानाचो सुद्धा गैरवापर जाता, अशो कागाळी आसात. पंचायतीं मदली अस्थिरताय हो सुद्धा चर्चेचो विशय. मतदानाची तारीक आजून निश्चित जावंक नासली तरी अंदूं लोकांक पावसांत मतदाना खातीर भायर सरचें पडटलें. पंचायती ताब्यात दवरपाचे मंत्री तशेच आमदारांचे येत्न आसले तरी मतदारांनी स्थानिक स्वराज संस्थांचेर लोकाभिमुख प्रतिनिधी वेंचून हाडप गरजेचें.

गणेश जावडेकार
9860610762