हिमाचलांत ‘मुख्यमंत्र्याचो’ पेंच

भांगरभूंय | प्रतिनिधी

पांच दावेदार; निवड काँग्रेसी खातीर त्रासदायक

खबरां संस्था
शिमलाः विधानसभा वेंचणुकेचो निकाल लागिल्ल्या गुजरातांत भाजपान मुख्यमंत्री कोण जातलो हें कालूच जाहीर केलें. तशेंच सोपूतविधी सुवाळ्याचो म्हूर्तय घोशीत केलो. पूण प्रदीर्घ काळा उपरांत हिमाचलांत भोवमतान जैत मेळयिल्ल्या काँग्रेसींत आतां ‘कौन बनेगा मुख्यमंत्री?’ खेळ सुरू जावपाचीं चिन्नां दिसतात.

हिमाचल प्रदेशांत काँग्रेसीन भोवमतान जैत मेळयलां. पूण आतां मुख्यमंत्रीपदा खातीर पांच जाणांनी दावो केला. हाचो पयलो फटको केंद्रीय निरिक्षक म्हूण दिल्लींतल्यान अायिल्ल्या फुडाऱ्यांक बसला.
भाजप ‘ऑपरेशन लोट्स’ करतलो हे भिरांतीन काँग्रेसीन कांय फुडाऱ्यांक ताकतिकेन शिमल्याक सुरक्षीत दवरल्यात. पूण ह्याच निरिक्षकांच्या वाहना मुखार मुख्यमंत्रीपदाची दावेदार आशिल्ल्या प्रतिभा सिंह हांच्या समर्थकांनी शक्ती प्रदर्शन केलें. खासा मोहिमेचेर आयिल्ले छत्तीसगढचे मुख्यमंत्री भूपेश बघेल हांचो ताफो शिमल्यांतल्या हॉटेला मुखार आडावन तांणी शक्ती प्रदर्शन केलें. प्रतिभा सिंह काँग्रेसीच्यो खासदार आसात. तांणी विधानसभेची वेंचणूक लडोवंक ना. पूण पक्षाच्या प्रचाराची धुरा तांणीच येसस्वी रितीन सांबाळ्ळी, अशें कांय राजकी तज्ञांचें म्हणणें आसा.
ते भायर सुखविंदर सिंग सुखु, मुकेश अग्निहोत्री आणि हर्षवर्धन चौहान हे हेर मुख्यमंत्रीपदाचे दावेदार आसात.
मजगतीं, पक्षांत कसलीच गटबाजी ना. सगले आमचे वांगडा आशिल्ल्याचे प्रतिभा सिंह हिणें सांगलें. तशेंच अापणाक मुख्यमंत्री जावपाचे आशिल्ल्याचो स्पश्ट संदेश तिणें दिला. वेंचणुकेची जापसालदारकी सोनिया गांधी आनी श्रेश्ठींनी आपणा कडेन सोंपयिल्ली. आपूण राज्याचे नेतृत्व करपाक सक्षम आसा, अशें तिणें म्हणलें.
वीरभद्र सिंह हांच्या नांवार वेंचणूक लडोवन आनी 40 सुवातांचेर जैत मेळोवन तांच्याच कुटुंबाक कुशीक दवरप योग्य न्हय. वीरभद्र हांचे कडेन लोकांचें घटमूट भावनीक संबंद आशिल्ल्यानूच भोवमतान काँग्रेसीक जैत मेळ्ळें, अशा उतरांत तिणें दिल्लीक थेट शिटकावणीच दिल्या.
छत्तीसगडाचे मुख्यमंत्री भूपेश बघेल आनी हरियाणांतले फुडारी भूपेंद्र सिंह हुड्डा हांकां निरिक्षक म्हूण हिमाचल प्रदेशांत धाडल्या. मुख्यमंत्र्यांची निवड करपा खातीर मजत करपाची आनी पक्षाच्या नवनिर्वाचीत आमदारां वांगडा मेळून ह्या प्रस्नाचेर उपाय काडपाची जापसालदारकी तांचेर सोंपयल्या. मुख्यमंत्रीपदा खातीर जायते दावेदार आशिल्ल्यान दरेक फुडाऱ्याचे समर्थक रस्तार देंवन शक्ती प्रदर्शन करीत आसात.
हिमाचलचे आदले मुख्यमंत्री वीरभद्र सिंह हांची घरकान्न प्रतिभा सिंह हिचें नांव मुख्यमंत्रीपदा खातीर आघाडेचेर आसा. ते उपरांत हिमाचल काँग्रेसचे आदले प्रदेशाध्यक्ष सुखविंदर सिंह सुक्खू आनी मुकेश अग्निहोत्री हांचीय नांवां सर्तींत आसात.

भाजपाच्या ‘ऑपरेशन लोट्स’ची भिरांत
हिमाचल प्रदेशांत काँग्रेसीन दणदणींत जैत मेळाेवन सत्तास्थापनेची तयारी चलयल्या. पूण मुख्यमंत्र्याची निवड काँग्रेसी खातीर त्रासदायक थारता. मुख्यमंत्रीपद कोणाक दिवचें हाचे वयल्यान पक्षांत तणाव वाडत आसा. हो वाद बेगीन सुटावो जालो ना जाल्यार काँग्रेसीक भाजपाच्या ‘ऑपरेशन लोट्स’ची भिरांत आसा. भाजपान हेर राज्यांनी ‘ऑपरेशन लोट्स’ मोहीम राबोवन सत्ता हातासपाचीं ताजी उदाहरणां आसात. बंडखोर आमदार भाजपाच्या गोटांत जावपाचीय भिरांत आसा. बेगिनांत बेगीन मुख्यमंत्र्याची निवड जावन सत्ता स्थापन करप काँग्रेसीच्या हिताचे थारतलेे.