भांगरभूंय | प्रतिनिधी
भांगरभूंय । खबरां मेज
पणजीः हिंदू गिरायकांक सक्तीन ‘हलाल’ अन्न पदार्थ विकते घेवपाची सक्ती करची. ताचे खातीर हलाल नाशिल्ले पदार्थ उपलब्द करून दिवचे अशी मागणी हिंदू जनजाग्रुती समितीच्या शिश्टमंडळान उत्तर गोंयच्या जिल्होधिकाऱ्यांक एक निवेदन भेटोवन केल्या. शिश्टमंडळांत भारत माता की जय संघटनेचे प्रा मुकूंद कवठणकार आनी सुरेश डिचोलकार, गोमंतक मंदिर म्हासंघाचे जयेश थळी, शिव प्रतिश्ठानाचे मंदार गावडे, वीर सावरकार संघटनेचे अरूण नायक, राष्ट्रीय हिंदू वाहिनीचे उत्तर गोंय संयोजक सुभाष कुशवाह, हिंदुत्वनिश्ठचे लक्ष्मीकांत केरकार, सनातन संस्थेची शुभा सावंत हांचो आसपाव आशिल्लो.
भारत सरकाराच्या भलायकी आनी कुटूंब मंत्रालयान अन्न सुरक्षा आनी मानकें प्राधिकरण (एफएसएसएआय) तशेंच दरेका राज्यांत स्वतंत्र अशी अन्न आनी वखदां प्रशासन खातीं (एफडीए) आसतना भारतांतल्या मुसलमान फकत मांसूच न्हय जाल्यार धान्य, फळां, वखदां आनी हेर वस्तू इस्लाम प्रमाम वैध म्हणल्यार हलाल आसची अशी मागणी करपाक लागल्यात. भोवसंख्य हिंदूचेर ती अन्याय करपी आसा अशें निवेदनांत म्हणलां.
देशांत फकत 15 टक्के आशिल्ल्या मुसलमान समाजाक इस्लाम धर्मा प्रमाण हलाल खावपाक दिवचें म्हणून हेर 85 टक्के समाजाचेर हलालाची सक्ती कित्याक करपाची, फकत धर्माचेर निर्मणी केल्ली हलाल प्रमाणपत्र वेवस्था हेर समाज घटकांचेर कित्याक लादपाचो हो प्रकार हेर धर्मिय लोकांच्या हक्कांचे गदा हाडपी आसा. धर्मीक भेदभाव करपी हलाल प्रमाणपत्रांचेर भारतांत बंदी घालची, ज्या खाजगी आस्थापनांक हलाल प्रमाणपत्र दिवपाची मंजूरी दिल्या ती बेगोबेग फाटल्यान घेवची. ज्यो संस्था हलाल प्रमाणपत्र दितात तांची सीबीआय वतीन चवकशी करची अशी मागणी ह्या निवेदनांत केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
