भांगरभूंय | प्रतिनिधी
नागरिकांक पडला प्रस्न; सरकार 23 लाख रुपया दिवपाक तयार
वास्को: सरकार हेडग्या गोरवांक धरून गोशाळेंत व्हरपा खातीर 23 लाख रुपयांची हायड्रोलिंक व्हॅन दिवपाक तयार आसून लेगीत मुरगांव पालिका अजूनय फाटीं कित्याक सरता? असो प्रस्न वास्कोच्या नागरिकांनी उक्तायला. मुरगांव पालिकेन सरकाराचे हे येवजणेचो लाव घेवन, बेगीनूच समजिकाय कबलात करची आनी नागरिकांक, वाहनचालकांक हेडग्या गोरवां पसून जावपी त्रास पयस करचे अशी मागणी मुरगांवच्या नागरिकां कडल्यान जाता.
वास्कोचे आमदार दाजी साळकर हांणी ही समजिकाय कबलात मुरगांव पालिकेन बेगीनूच करची अशें नगराध्यक्षाक सांगिल्ल्याचें स्पश्ट केलें.
नुस्तेंमारी खात्याचे मंत्री निळकंठ हळर्णकार ‘मंत्री तुमच्या दारांत’ कार्यावळीचो एक भाग म्हणून हांगा आयिल्ले तेन्ना तांणी सरकाराच्या वेगवेगळ्या येवजण्यां विशीं म्हायती दिली. ह्या वेळार तांणी हेडग्या गोरवांक धरून गोशाळेंत व्हरपा खातीर सरकारान सुमार 23 लाख मोलाची हायड्रोलींक व्हॅन दिल्ल्याचें सांगलें. पणजी महानगर पालिका, म्हापशें पालिकेक हे येवजणेचो लाव जाला अशें सांगतना तांणी मुरगांव पालिकेनूय हे येवजणेचो लाव घेवचो अशें आवाहन केलें. तशेंच चिखले पशुवैजकी दवाखानो सुरू करतले. ताका लागून ज्या लोकांकडेन पाळिल्लीं सुकणीं, जनावरां आसात तांची बरी वेवस्था जातली. हांगा गोशाळा सुरू करपाच्यो वावड्यो सुरू आशिल्ल्याचें तांणी सांगलें. थंय गोशाळा सुरू जातली अशी उलोवणी आसा अशें तांणी सांगलें. व्हॅनान धरपी भटक्या गोरवां गोशाळाक धाडटले, ते खातीर पालिके कडेन संबंदीत पक्षां कडेन समन्वय करचो पडटलो. ते उपरांत गोशाळांतल्या त्या गोरवां खातीर जाल्लो खर्च सरकार भरतलें अशें तांणी सांगलें. व्हॅनी वरवीं धरिल्लीं हेडगीं गोरवां गोशाळेंत धाडटलीं. ताका लागून पालिकेक संबंदितां कडेन समजिकाय कबलात करची पडटली. उपरांत गोशाळेंत त्या गोरवांचो जो कितें खर्च येतलो तो सरकार फारीक करतलें अशें साळकार हांणी सांगलें.
पालिके खातीर मुख्याधिकारी आनी पंचायती खातीर गट विकास अधिकार्यांनी समजिकाय कबलात करपाची गरज आसा. जर सरकार इतली बरी येवजण राबयता जाल्यार मुरगांव पालिका कित्याक फाटीं सरता असो प्रस्न वास्कोच्या नागरिकांक पडला. हांगच्या हेडग्या गोरवांक लागून नागरिकांक त्रास सोंसचे पडटात. ह्यान पयलीं जनावरां अचकीत वाहनां फुडल्यान आयिल्ल्यान खूबशे अपघात घडल्यात. दोग तीग जाणांक जीव होगडावचो पडिल्लो. हालींच मुरगांव पालिका इमारती फुडल्यानच्या एफ एल गोम्स रस्त्याचेर दोन हेडग्या बैलांच्या झुजाक लागून एके गाडयेच्या धनयाक लुकसाण सोसचें पडलें. हेर लोकांनी दुसरे दिकेन धांव घेतिल्ल्यान ते वाटावले.
पंचायतीचो विचार केलो जाल्यार चिकोळणा व्हडा प्रमाणांत हेडगीं गोरवां पळोवपाक मेळटात. रातच्या वेळार गोरवां रस्त्याचेरूच बशिल्ल्यान, तशेंच तांच्या शेणाक लागून दोनचाकी वाहनांक अपघात जातात. हे विशीं बोगमाळो चिकोळणा पंचायतीन हायड्रोलीक व्हॅनचो विचार करपाची गरज उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
