भांगरभूंय | प्रतिनिधी
पयरूच बंद दारा फाटल्यान बसका जावन सगलो मानपान पयस जालो म्हणपाचें आयकूंक आयलें. दोतोरांनी व्हडल्यो वल्गना केल्ल्यो, सगल्यां मुखार माफी माग नासल्यार संपार वतले. माफी मागूंक जाय आशिल्ल्यान काय ती मागलिना उरफाटें रिकामे खुर्चे मुखार दिमी मारून दोतोरांनीच माफी मागली आनी संप फाटीं घेतलो. अर्थांत हें एका दोतोरा कडल्यानूच भायर आयलां म्हणटकूच आमकां तें खरें मानचेंच पडटलें. कारण बंद दारा आड कितें घडलें तें थंय आशिल्ल्यांकूच कळपाचें आनी एकलो सोडल्यार हेर सगले अजून मेरेन मोनेच आसात. आतां थंय जर कोणेय व्हिडियो काडून तो सगल्याक केल्लो जाल्यार कोणे कोणाक उजरायलो, कोणे कोणाक फाफशिलो, कोण उलयलो आनी कोण मोनोच रावलो सगलें कितें तें भायर येवपाचें. पूण व्हिडियो ना वा ओडियो ना मागीर कशें कळपाचें?
घडये थंय वेगळेंच कितेंय घडलां आसत. मुख्यमंत्री तांची फायलूच घेवन थंय गेला आसत. जे कोण संपाची धमकी दिताले तांचे मुखार फायल उगती करून तुमी फाटीं सरतात काय कारवाय करूं, म्हणुनूय विचारलां आसत आनी तोंड धांपून सगल्यांनी दिमी मारल्या आसत. कोणूय जेन्ना सरकारी नोकरेंत आसतना प्रायव्हेट कामां करता ताका राजकारण्यांक हांजी हांजी करचीच पडटा. नासल्यार नोकरी वचपाची भिरांत आसता. म्हणटकूच कोण तापयता आनी कोण अपमानीत करता ताचे कडेन दुर्लक्ष करचेंच पडटा. आतां अशेंच घडलां म्हणून सांगूंक जावचें ना. कोणे व्हिडियो काडूंक ना न्ही? काडिल्लो जाल्यार कळपाचें. तसो आरोग्यमंत्र्या वतीन भायर सरिल्लो व्हिडियो लोकांनी पळोवंक नासलो जाल्यार घडये दोतोर आपणेंच मंत्र्याक बरेंऽऽ दिलें म्हणून सांगता आसलो. पूण व्हिडियो पळेल्ल्यान लोकांक सत कळ्ळें आनी म्हणून तर लोकांनी सोशल मिडिया वेल्यान दोतोराची बाजू घेत मंत्र्याचेर फोग काडलो.
तसो खंयच्याय मंत्र्यान सरकारी कर्मचाऱ्याचेर जावं दोतर वा इंजिनियराचेर फोग काडलो, ताका उजरायलो वा ताचो अपमान केलो म्हणून अजाप जावचेली गरज ना. एकदां खंयच्याय राजकरण्याच्या हातांत सत्ता आयली म्हणजे ताका आपशींच मस्ती येता. आपूण कोणतरी वेगळो अशें दिसूंक लागता ताका. आपूण सांगता तेंच खरें आनी सगल्यांनी तें मानून घेवंकूच जाय अशें तांकां दिसूंक लागता. हांव सांगतां तूं आयक हेंच तांकां सांगचें आसता. आनी आमी मुकाट्यांनी सगले सोसतात. हें फक्त आयच्या राजकारण्यांचे बाबतींत न्हय, कालूय हेंच चलतालें, आजूय तेंच घडटा आनी घडये मुखारूय अशेंच घडटलें. गोंयच्या पयल्याच मुख्यमंत्र्यान आपणे सांगिल्ल्या उमेदवाराक शिक्षण खात्यांत काम दिलें ना म्हणून सगल्या लोकां मुखार शिक्षण अधिकार्याची लायकी काडून ताका अपमानीत केल्लो हाची याद आसा तर पळेयात.
काँग्रेसीच्या राज्यांत एक मंत्री आपल्या चमच्यांचे कसलेंय काम केलें ना जाल्यार तांकां आपोवन बुरश्या उतरांनी तापतालो. ताका त्या वाठारांत काम करप्यांनी दर दिसा ऑफिसाक वच्चे पयलीं आपल्या घरा येवन आपणाक सलाम मारची अशें दिसतालें. आनी जो अशें करिना ताका कामांतलो काडून उडय म्हणपाचें तो ऑफिसाक कळयतालो. ‘जेका खालतेपोण घेवंक गोमोना तो आमकां नाकाय’ हीं ताचीं उतरां आसलीं. एकदां म्हजेय कडेन तो असोच वागलो. पूण हांव वोगी रावलों ना. ताका सगल्या हुजीर सडीक दिलें आनी सांगलें तूं पांचूच वर्सांचो मंत्री, हांव मरसर इंजिनियर आसतलों. कामाक आसूं नासूं पूण इंजिनियरूच उरतलों. उपरांत ताणें म्हाका जायतो सतावचेलो येत्न केलो पूण हांव बावगलों ना. उपरांत तो पडलो. मागीर खासदार बी जालो पूण ताचीं फितां देवलीं. आज तर ताका कोणूच विचारी नात.
कांय वर्सां आदीं रातच्या वेळार हॉस्पिसियोच्या केज्युलटींत एकलो मोती दोंगरावेलो मनीस गेलो. ताका जोर आयिल्लो. केज्युलटींत त्याच वेळार अपघातांत जखमी जाल्ल्या कांय जाणांक हाडिल्ले. दोन दोतोर तांचे सेवेंत आसले. तांणी हाका बसूंक सांगलें. जखमींक पळेता म्हणसर देड दोन वरां गेलीं. उपरांत हाका तपासलो आनी सादोच जोर आशिल्ल्यान गुळयो बरोवन दिल्यो. आपणांक इतलो वेळ बसोवन दवरलो हाचो ताका राग आयलो. ताणें मुख्यमंत्र्याक फोन लावन कळयलें. रातभर काम करून सकाळचे दोतोर घरा पावता म्हणल्यार मुख्यमंत्र्याचें आफोवणें. गेले बाबडे तशेच. मुख्यमंत्र्याचे घरकान्नीन दोगांयकूय वयर सकयल केले. नोकरेंतल्यान काडून उडोवपाची धमकीय दिली. तो जोर आयिल्लो मनीस हांचे वावराडेचो घोव हें बाबड्यांक खबरूच नासलें. तोंड धांपून दोतोरांनी सगलें आयकलें आनी परतले. पूण हो सगलो अपमान तांचे मदींच उरलो. ताचो व्हिडियो कोणे काडलो ना आनी हें लोकांक कळ्ळें ना. कोण कांय उलयले ना वा हॉस्पिसियोंतले दोतोर संपारूय गेले ना. आतां ते दोतोर रिटायर जाले आसतले.
तर सांगपाचें म्हणल्यार अपमान कालूय जातालो आनी आजूय जाता. मंत्री, आमदार वेंचून येतकूच हुकुमशहा जातात, लोकशाहींतले राजा. आनी लोकांकूय अशेच वागपी राजकारणी आवडटात. म्हणून तर ते परत परत वेंचून येतात. म्हणटकूच आरोग्यमंत्र्यान जें कितें केलें तातूंत ताका दोश दिवपांत अर्थ ना. ताणें तेंच केलां जें चलत आयलां आनी लोकांक आवडटा. दोतोर आपले पद्दतीन वागलो, मंत्री आपले पद्दतीन मागीर हातूंत चूक कोणाची? आमचे नदरेन तरी चूक व्हिडियो ग्राफराची जाणें मंत्र्याचीं उद्दामपणां रेकाॅर्ड केलीं आनी सोशल मिडियाचेर घालीं. तीं लोकां मेरेन पावंक नासलीं तर कोणाचोच अपमान जावचो नासलो आनी मानापमानाचें नाटक करपाची पाळी येवची नासली. पळेयात पट्टा तर.
अभयकुमार वेलींगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
