भांगरभूंय | प्रतिनिधी
15व्यो राष्ट्रपती, सर्वोच्च पदा वयली पयली आदिवासी महिला
खबरां संस्था
नवी दिल्लीः भारताच्यो नव्यो राष्ट्रपती द्रौपदी मुर्मू हांणी काल राष्ट्रपती पद आनी गोयनियतेचो सोपूत घेतलो. सकाळीं 10 वरांचेर संसद भवनांत सोपूतविधीची कार्यावळ जाली. भारताचे सरन्यायाधीश एन. व्ही. रमण्णा हांणी द्रौपदी मुर्मू हांकां पद आनी गोपनियतेचो सोपूत दिलो. कांय दिसा पयलीं जाल्ले राष्ट्रपतीपदाचें वेंचणुकेंत यशवंत सिन्हा हांकां हारोवन द्रौपदी मुर्मू जैतिवंत जाल्यो. द्रौपदी मुर्मू ह्यो राष्ट्रपती जावपी पयल्यो आदिवासी महिला थारल्यात.
द्रौपदी मुर्मू ओडिशांतल्यो अादिवासी फुडारी आसात. ओडिशांतल्या बीजेपी- बीजेडी युती सरकारांत 2002 ते 2004 ह्या काळात त्यो मंत्री आशिल्ल्यो. तांणी झारखंडाचे णवे राज्यपाल म्हूण लेगीत पदभार सांबाळ्ळा.
देशांत आतां मेरेन आदिवासी समुदायांतली खंयचीच व्यक्ती राष्ट्रपती जावंक ना. आदिवासी समाज ह्या पदा पसून पयस उरिल्लो. ताका लागून आदिवासी समाजांतले व्यक्तीक राष्ट्रपती जावपाचो भोवमान मेळचो, अशी मागणी जाताली. आतां मुर्मू हांच्या माध्यमांतल्यान ही गजाल साध्य जाल्या.
राष्ट्रपतीपदाची जापसालदारकी व्हड. देशाच्या सर्वोच्च पदार वेंचून दिल्ले खातीर भारतियांचे उपकार.
‘कारगील विजय दीस’ भारतीय सैन्याच्या शौर्य, संयमाचें प्रतीक
26 जुलय हो ‘कारगील विजय दीस’. हो दीस भारतीय सैन्याच्या शौर्य आनी संयम ह्या दोगांचें
प्रतीक. कारगील विजय दिसा निमतान देशाच्या सैन्याक आनी देशांतल्या सगल्या नागरिकांक शुभेत्सा.
स्त्री शक्तीचें भुमिकेक नवी उंचाय
नेताजी सुभाषचंद्र बोस, पंडित नेहरू, सरदार पटेल, बाबासाहेब आंबेडकर, भगतसिंग, सुखदेव, राजगुरू, चंद्रशेखर आझाद हांचे सारक्या जायत्या स्वातंत्र्यसैनिकांनी आमकां राष्ट्राचो स्वाभिमान सर्वोच्च दवरपाची शिकवण दिली. राणी लक्ष्मीबाई, राणी वेलू नचियार, राणी गाईदिनलुय आनी राणी चेन्नम्मा हांचे सारक्या जायत्या म्हान व्यक्तींनी राष्ट्ररक्षण आनी राष्ट्र उबारणेंत स्त्री शक्तीचें भुमिकेक नवी उंचाय दिल्या.
राष्ट्रपती द्रौपदी मुर्मू हांच्या भाशणांतले म्हत्वाचे मुद्दे
26 जुलय हो ‘कारगील विजय दीस’. हो दीस भारतीय सैन्याच्या शौर्य आनी संयम ह्या दोगांयचें प्रतीक. कारगील विजय दिसा निमतान देशाच्या सैन्याक आनी देशांतल्या सगल्या नागरिकांक शुभेत्सा.
स्वातंत्र्यसैनिकांनी स्वतंत्र भारतांतल्या नागरिकां कडल्यान ज्यो अास्त दवरल्यात त्यो पुराय करपाक प्राधान्य दिवचें पडटलें.
फुडल्या 25 वर्सांत ‘सबका प्रयास, सबका कर्तव्य’ ह्या दोन मार्गांचेर वाटचाल करची पडटली. ह्या 25 वर्सांत अमृतकाळ उदरगतीचे मार्गार वतलो. नगरसेवक ते राष्ट्रपती जावपाची संद आपणाक मेळ्ळ्या. ही भारताची म्हानता, लोकशायेची शक्त. ते खातीरूच एका गरीब घरांत जल्मल्ली हांव देशाच्या सर्वोच्च पदार पावपाक शकली.
राष्ट्रपती जावप हें म्हजें वैयक्तीक येस नासून हें भारतांतल्या दरेक गरिबांचें येस. भारतांत गरीब सपनां पळोवंक शकता आनी पुराय करपाक शकता हेच हातूंतल्यान सिद्ध जाता.
जायत्या वर्सां पसून सुविधां पसून पयस राविल्ले दलीत, गरीब आदिवासी म्हज्यांत आपलें प्रतिबींब पळोवंक शकतात.
कॉलेजांत वचपी म्हज्या गांवांतली हांव पयलीं व्यक्ती. राष्ट्रपती पदार काम करतना भारतियांच्या हिताक प्राधान्य आसतलें. लोकांचें कल्याण हेंच म्हजें ध्येय आसतलें.
भारताच्या पर्जळीत फुडाराचो प्रवास सगल्यांक वांगडा घेवन करपाचो आसा. देश स्वातंत्र्याची 50 वर्सां मनयतना म्हज्या राजकी जिणेक सुरवात जाल्ली.
आज 75 व्या वर्सांत आपणाक ही नवी संद मेळ्ळ्या. 25 वर्सांचें व्हिजन पुराय करपाक यत्न जातना ही जापसालदारकी मेळप म्हजें सौभाग्य.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
