भांगरभूंय | प्रतिनिधी
दक्षीण गोंय जिल्लोधिकाऱ्यान जारी केलें परिपत्रक
मडगांव ः भारत आनी पाकिस्तान तणावाच्या फाटभुंयेर दक्षीण गोंय जिल्लोधिकाऱ्यांनी हवाई हल्लो आनी ब्लॅकआउट आदेश जारी जाल्यार नागरी संरक्षणा खातीर कांय मार्गदर्शक तत्वां जारी केल्यांत. थळाव्या संस्थांनी, आपत्कालीन सेवांनी आनी सामान्य लोकांनी नागरी संरक्षण नेम आनी राष्ट्रीय नागरी आकस्मिक शिष्टाचारा प्रमाण नेमांक खरपणान पाळो दिवचो अशें सांगलां.
दक्षीण गोंय जिल्लोधिकारी एगना क्लिटस हांणी जारी केल्ल्या मार्गदर्शक तत्वांनी हवाई हल्ल्या वेळार सायरन वाजल्या उपरांत आनी सायरन थांबल्या उपरांत खंयच्यो कारवाय करच्यो न्हय हाची म्हायती दिल्या. हवाई हल्लो जावपाची शिटकावणी दिवपा खातीर दोन मिनटांचो सायरन जातलो. जाल्यार हवाई हल्ल्याची भिरांत सोंपल्या उपरांत लेगीत दोन मिनटांचो सायरन वाजयतले.
० ह्या काळांत सामान्य लोकांनी सुरक्षीत सुवातींनी वच्चें. आलाशिरो मेळना जाल्यार जनेलां बंद करून घराच्या भायल्या वण्टीं पसून पयस सुरक्षीत सुवातेर रावचें.
० भियेनायतना शांतताय दवरची. टेलिफोन नेटवर्काचो गरजे भायर वापर करप टाळचो. घरांतलीं लायटी आनी हेर लायटीचीं उपकरणां बंद करची. जनेलांवयले पडदे बंद करचें.
० येरादारी खातीर मार्गदर्शक तत्वां मदीं खाजगी गाडयो रस्त्या कुशीक लायटी बंद करून उब्यो करच्यो. तशेंच भौशीक येरादारी सुरक्षीत सुवातेर लायटी बंद दवरून उब्यो करच्यो.
० आपत्कालीन कक्ष बॅकअप पॉवर, संवादाची साधनां आनी लायटी येवजणे सयत चालू दवरपाक जाय. लश्करी अधिकारी, थळावें प्रशासन आनी आपत्कालीन कक्षांनी समन्वय सादचो. शिफ्टांत सेवा चालू दवरपा खातीर तज्ञ आनी प्रशिक्षीत तैनात दवरचे.
० सुरक्षेचो संदेश मेळ्ळ्या उपरांत सामान्य जिवीत परतून सुरू जातलें. त्या वेळार जाल्लें लुकसाण विशीं संरक्षण प्राधिकरणाक वा जिल्लोधिकारी कार्यालयांतल्या नियंत्रण कक्षांत कळोवचें. मुळाव्यो सेवा आनी सुविधांक लुकसाण जाल्यार तीं परतून सारकीं करतले अशें आदेशांत म्हणलां.
दक्षीण गोंय जिल्लोधिकारीन जारी केल्ल्या आदेशांत सगल्या थळाव्या संस्थांक आनी भौशीक संस्थांक हें परिपत्रक चालीक लावपाचे निर्देश दिल्यात. तशेंच ह्या मार्गदर्शक तत्वांक पाळो दिवंक ना जाल्यार आपत्ती वेवस्थापन कायदो आनी भारतीय संरक्षण नेमा खाला नागरी संरक्षण नोमांचें उल्लंघन मानतले अशेंय आदेशांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
